| e-texts navigator |
| Wylie |
248b1 རྨོངས་པའི་ཁྱད་པར་ལས་ཏེ། གཞན་རྣམས་བསྟེན་པར་བྱ་བ་མ་ཡིན་ནོ། །དེ་ནས་རྒྱལ་པོ་ཐམས་ཅད་དབང་བསྐུར་བ་བཞིན་དུ་ཡོ་བྱད་ཐམས་ཅད་བསགས་ཏེ། སློབ་དཔོན་དང་མཁན་པོ་མཉེས་པར་བྱའོ། །དེ་ནས་བླ་རེ་བྲེས་ཏེ་རྒྱལ་མཚན་དང་། བ་དན་དང་གདུགས་དཀར་པོ
248b2 མགོ་བོར་འཛིན་བཞིན་པ་དང་། རྔ་ཡབ་དཀར་པོ་གཡོབ་བཞིན་པ་དང་། བཀུར་སྟི་ཆེན་པོས་དུང་དང་། རྔ་བོ་ཆེ་དང་། རྫ་རྔའི་དགའ་བའི་སྒྲ་ངེས་པར་སྒྲོགས་པ་དང་། རྒྱལ་བའི་སྒྲ་དང་། བཀྲ་ཤིས་ཀྱི་ཚིགས་སུ་བཅད་པས་མངོན་པར་བསྔགས་པ་དང་། བདེ་ལེགས་ཀྱི་ཚིགས་སུ་བཅད
248b3 པ་རྒྱལ་བས་གསུངས་པ་རྣམས་ཀྱིས་མངོན་པར་བསྟོད་བཞིན་པས་བསྐོར་བ་དང་། བཀྲ་ཤིས་དེ་བྱས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས། འདི་སྐད་ཅེས་བརྗོད་པར་བྱའོ། །སློབ་དཔོན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི
248b4 སྔགས་ཀྱི་སྤྱོད་པ་མངོན་པར་བསྒྲུབ་པ་ལ་ཡང་དག་པར་རྗེས་སུ་འཇུག་པ་དང་། འཇིག་རྟེན་པ་ཐམས་ཅད་ལས་འདས་པའི་གསང་ཆེན་རྣམ་པར་ཐར་པའི་དཀྱིལ་འཁོར་དུ་ཡང་དག་པར་རྗེས་སུ་འཇུག་པ་དང་། ཆོས་ཀྱི་རྒྱལ་སྲིད་ཐམས་ཅད་ཀྱིས་སངས་རྒྱས་ཉིད་མངོན་པར་རྟོགས
248b5 པར་འདོད་པ་དང་། མདོར་བསྡུས་ནས་བརྗོད་ནས་སངས་རྒྱས་ཉིད་འབྱུང་བའི་ཕྱིར་བདག་ཉིད་སྤྲོ་བར་བགྱིའོ་ཞེས་སོ། །དེ་ནས་ཀུ་ཤའི་ཁྲེས་ལ་ཉེ་བར་འདུག་སྟེ་ཤར་དུ་མངོན་པར་ཕྱོགས་པས་དཀྱིལ་འཁོར་མཐོང་ཞིང་རྟོགས་པ་ལ་དང་པོ་རེ་ཞིག་རིག་པའི་མངོན་པར་དབང་བསྐུར་བ་བྱིན
248b6 ནས་ཕྱག་རྒྱ་ཆེན་པོ་རྩ་བའི་རིག་པ་བཟླས་པར་བྱའོ། །དེ་ནས་རིག་པ་དང་། སྔགས་དག་གང་གནས་པ། གྲོ་གའི་འདབ་མ་ལ་གི་ཝང་གིས་བྲི་བར་བྱའོ། །བྲིས་ནས་ཙནྡན་དང་གུར་གུམ་དག་གིས་ལག་པ་དག་དང་ཁམ་ཕོར་ཁ་སྦྱར་བཀྲུས་ནས་དེ་ནས་གྲོ་གའི་འདབ་མ་ཁམ་ཕོར་ཁ
248b7 སྦྱར་གྱི་ནང་དུ་བཞག་པར་བྱས་ནས་དཀྱིལ་འཁོར་གྱི་ནང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་ཞབས་ཀྱི་དྲུང་དུ་གཞག་པར་བྱའོ། །དེ་ནས་དེར་ཉེ་བར་འདུག་སྟེ་རིག་པ་རྩ་བའི་སྔགས་བརྒྱ་རྩ་བརྒྱད་སྔ་མ་ཉིད་དུ་བརྗོད་པར་བྱའོ། །དེ་ནས
iiif viewer powered by OpenSeadragon
