| e-texts navigator |
| Wylie |
209a1 དེ་ནས་བཅོམ་ལྡན་འདས་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ལ་མིག་མི་འཛུམས་པར་བལྟས་ཏེ་ཞབས་གཉིས་ལ་བཏུད་ནས་ཡི་གེའི་ཚིག་རབ་ཏུ་སྨྲས་པ་འདི་རྣམས་ཀྱིས་བཅོམ་ལྡན་འདས་ལ་མངོན་པར
209a2 བསྟོད་དོ། །ཕྱག་འཚལ་སྐྱེས་བུ་མཁྱེན་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །སྤྱོད་པའི་དོན་ཀུན་སྒྲུབ་པ་པོ། །ཕྱག་འཚལ་སྐྱེས་བུ་གཙོ་ཁྱོད་ལ། །དོན་མེད་ཐམས་ཅད་བཟློག་པ་པོ། །ཕྱག་འཚལ་སྐྱེས་བུ་སེང་གེ་ཁྱོད། །ངན་སོང་ཐམས
209a3 ཅད་འཇོམས་པ་པོ། །དཔའ་བོ་ཆེན་པོ་ཁྱོད་ཕྱག་འཚལ། །བསོད་ནམས་དྲི་ནི་མཐའ་ཡས་པ། །ཕྱག་འཚལ་སྐྱེས་བུ་པད་དཀར་ཁྱོད། །སྲིད་གསུམ་འདམ་ནི་རྣམ་སྦྱོང་བ། །ཕྱག་འཚལ་སྐྱེས་བུ་པདྨ་ཁྱོད། །སྡུག་བསྔལ་ཐམས་ཅད་རྣམ་གྲོལ
209a4 བྱེད། །ཐམས་ཅད་གྲོལ་ཁྱོད་ཕྱག་འཚལ་ལོ། །གདུང་བ་ཐམས་ཅད་ལེགས་འདུལ་བྱེད། །ཞི་བ་ཁྱོད་ལ་ཕྱག་འཚལ་ལོ། །སྔགས་ཀྱི་སྤྱོད་དོན་སྒྲུབ་པ་པོ། །ཐམས་ཅད་ཁྱོད་ལ་ཕྱག་འཚལ་ལོ། །བཀྲ་ཤིས་ཀུན་གྱིས་བཀྲ་ཤིས་པ། །བཀྲ
209a5 ཤིས་ཁྱོད་ལ་ཕྱག་འཚལ་ལོ། །ཆོས་རྣམས་ཐམས་ཅད་ཀུན་ཏུ་རྟོགས། །སངས་རྒྱས་དམ་ཚིག་ཁྱོད་ཕྱག་འཚལ། །ཆོས་རྣམས་ཀུན་གྱི་དེ་བཞིན་ཉིད། །སྤྲོས་པ་མེད་པའི་རྣམ་པ་ནི། །ཡང་དག་རྗེས་འཇུག་སྟོན་པ་པོ། །དེ་བཞིན་གཤེགས་པ
209a6 ཁྱོད་ཕྱག་འཚལ། །ཤེས་དང་ཤེས་བྱའི་དངོས་པོ་ཀུན། །ལེགས་པར་བྱས་ཤིང་ཡང་དག་ཐོས། །ཐེག་གསུམ་ལམ་དང་མྱང་འདས་ལ། །རབ་ཏུ་གནས་འཇུག་རབ་གནས་པ། །ཀུན་མཁྱེན་ཁྱོད་ལ་ཕྱག་འཚལ་ལོ། །ཞེས་ཡི་གེའི་ཚིག་རབ་ཏུ
209a7 སྨྲས་པ་འདི་རྣམས་ཀྱིས་བསྟོད་པའི་ཚིག་གིས་བཅོམ་ལྡན་འདས་ཀྱི་སྤྱན་སྔར་མངོན་པར་བསྟོད་ནས་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས་འདི་ནས་གང་གཱའི་ཀླུང་བརྒྱ་སྟོང་ཕྲག་གི་བྱེ་མ་དང་མཉམ་པའི་འཇིག་རྟེན་གྱི་ཁམས་འདས་ནས་ནུབ་ཕྱོགས་ཀྱི་ཆར
iiif viewer powered by OpenSeadragon
