| e-texts navigator |
| Wylie |
205b1 རྒྱ་གར་སྐད་དུ། ཨཱུརྡྷ་ཛ་ཊཱ་མ་ཧཱ་ཀ་ལཱ་མ་ཧཱ་བོ་དྷི་སཏྭ་བི་ཀུརྦྦ་ཎ་པ་ཊ་ལ་བི་ས་རཱ་ད་བྷ་ག་བ་ཏཱ་ཨཱ་རྱ་ཏཱ་རཱ་མཱུ་ལ་ཀལྤ་ནཱ་མ། བོད་སྐད་དུ། རལ་པ་གྱེན་བརྫེས་ཀྱི་རྟོག་པ་ཆེན་པོ། །བྱང་ཆུབ་སེམས་དཔའ་ཆེན་པོའི་རྣམ་པར་འཕྲུལ་པ་ལེའུ་རབ་འབྱམས་ལས
205b2 བཅོམ་ལྡན་འདས་མ་འཕགས་མ་སྒྲོལ་མའི་རྩ་བའི་རྟོག་པ་ཞེས་བྱ་བ། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ།། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་སྒྲོལ་མའི་གྲུའི་སྟེང་གི་ནམ་མཁའི་མཐིལ་ན་རབ་ཏུ་བཞུགས་ཏེ། ངོ
205b3 མཚར་རྨད་དུ་བྱུང་བ་བསམ་གྱིས་མི་ཁྱབ་པས་རབ་ཏུ་ཕྱེ་བའི་བྱང་ཆུབ་སེམས་དཔའ་འདུས་པའི་དཀྱིལ་འཁོར་དང་ལྡན་པར་བཞུགས་སོ། ། དེ་ནས་བཅོམ་ལྡན་འདས་ཀྱིས་གནས་གཙང་མའི་རིགས་ཀྱི་ལྷའི་བུ་རྣམས་ལ་བཀའ་སྩལ་པ། ལྷའི་བུ་ཁྱེད་རྣམས་ཉོན་ཅིག། བྱང
205b4 ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་རྨད་དུ་བྱུང་བ་བསམ་གྱིས་མི་ཁྱབ་པའི་ཅོ་འཕྲུལ་གྱི་སྤྱོད་པ་ཏིང་ངེ་འཛིན་དང། ཕྲུལ་གྱུ་ཁྱད་པར་རྣམ་པར་ཐར་པའི་དཀྱིལ་འཁོར་བྱང་ཆུབ་སེམས་དཔའི་རྣམ་པར་འཕྲུལ་པ་སེམས་ཅན་ཐམས་ཅད་ཉེ
205b5 བར་འཚོ་བར་བྱེད་པ་དང་། ཚེ་དང་། ནད་མེད་པ་དང་། དབང་ཕྱུག་དང་། ཡིད་ཀྱི་ཤིང་རྟ་ཡོངས་སུ་རྫོགས་པར་བྱེ་པའི་རིག་སྔགས་དང། གསང་སྔགས་ཀྱི་གཞི། སེེམས་ཅན་ཐམས་ཅད་ལ་ཕན་པའི་ཆེད་དུ་བཤད་ཀྱིས། དེ་ལེགས་པར་ཉོན་ལ
205b6 ལེགས་པར་ཡིད་ལ་གྱིས་ཤིག་། ངས་བཤད་དོ།། དེ་ནས་བཅོམ་ལྡན་འདས་ལ་ལེགས་སོ་ཞེས་སོ།། དེ་ནས་གཙང་མའི་རིས་ཀྱི་ལྷའི་བུ་དེ་རྣམས་ཐལ་མོ་སྦྱར་བ་བཏུད་ནས་འདིས་སྐད་ཅེས་གསོལ་ཏོ།། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ
205b7 ཆེན་པོ་རྣམས་ཀྱིས་སྤྱོད་པ་ཏིང་ངེ་འཛིན་གྱི་ཁྱད་པར་སོ་སོར་ཐོབ་པར་བྱེད་པ། རྡོ་རྗེའི་གདན་གནོན་པར་བྱེད་པ། བདུད་འདུལ་བར་བྱེད་པ། ཆོས་ཀྱི་འཁོར་ལོ་རབ་ཏུ་སྐོར་བར་བྱེད་པ། ཉན་ཚོ་དང་རང་སངས་རྒྱས་ཐམས་ཅད་ངེས་པར་འབྱུང་བར་བྱེད་པ། ལྷ
iiif viewer powered by OpenSeadragon
