| e-texts navigator |
| Wylie |
285b1 བར་དྲུག་དང་ལྡན། །མི་མགོ་ཕྲེང་བ་རྣམས། །སེ་རལ་ཁ་ཡི་ཐབས་སུ་ཐོགས། །གཡོན་བརྐྱང་བ་ཡི་ཚུལ་དུ་བཞུགས། །ན་བཟར་སྟག་ལྤགས་གསོལ་བར་དགྱེས། །དེ་ལྟ་བུ་ཡི་སྐུ་གཟུགས་དག་།སྔ་མའི་ཚུལ་དུ་ཡོངས་རྫོགས་པར། །ཅི་སྐད
285b2 གསུངས་པའི་ཁྲོ་བོ་འདི། །སྔགས་པས་བཟོ་བོ་བྱེད་དུ་གཞུག་།ཡང་ན་ཤིང་གི་སྙིང་པོ་ལས། །ཁྲོ་བོ་གཙོ་བོའི་སྐུ་གཟུགས་དག་།ཅི་སྐད་གསུངས་པའི་མཚན་ཉིད་བཞིན། །བྱས་ནས་རྟག་ཏུ་མཆོད་པར་བྱ། །དེ་ནས་ཤིང་ལས་བྱས་པ་ཡི། །སྐུ་གཟུགས་ཚུལ
285b3 བཞིན་བཤད་པར་བྱ། །གཙང་མ་འདོད་པ་ཀུན་སྟེར་བ། །དེ་ཡང་དེ་བཞིན་སྦྱར་བར་བྱ། །རིག་འཛིན་ཀུན་གྱི་མཆོག་འདོད་ན། །ཙནྡན་ཤིང་ལས་བྱས་པ་ཡི། །སྐུ་གཟུགས་སོར་གྲངས་ཉི་ཤུའི་ཚད། །སྔགས་པ་དག་གིས་བྱེད་དུ་གཞུག་།ཙནྡན་དམར་པོའི
285b4 ཤིང་དག་ལས། །སོར་ནི་བཅུ་དྲུག་ཚད་དག་ཏུ། །འདོད་པ་ཐམས་ཅད་ཀུན་སྟེར་བའི། །སྐུ་གཟུགས་ལེགས་པར་བྱེད་དུ་གཞུག་།ར་ཛ་ཨརྒའི་རྩ་བ་ལས། །བྱས་པ་འདོད་པའི་དོན་རྣམས་སྟེར། །སོར་གྲངས་བཅུ་བཞིའི་ཚད་དུ་ཤིས། །བདེ་དང་ཕུན་སུམ་ཚོགས
285b5 ཀུན་འབྱུང་། ། ཤོ་ཀ་ཡི་སྙིང་པོ་ལས། །བཟོ་བོ་མཁས་པས་ལེགས་པར་བྱས། །སར་པ་སོར་ལྔའི་ཚད་དུ་གསུངས། །འདི་ནི་དབང་དུ་བྱེད་པར་བཤད། །དེ་བཞིན་ཏ་ལའི་ཤིང་དག་ལས། །སོར་དྲུག་པར་ནི་བྱས་ན་ཡང་། །ལྷ་དང་ལྷ་མིན་བདག་པོ་དང་། །དེ་བཞིན
285b6 ཀླུ་རྣམས་འགུགས་པར་བྱེད། །ནཱ་ག་གེ་སར་ཤིང་དག་ལས། །དེ་བཞིན་སོར་བདུན་ཚད་དུ་བྱ། །ནད་རྣམས་འཇིག་པར་བྱ་བ་དང་། །དགྲ་རྣམས་རྨོངས་པའི་ཕྱིར་བཤད་པའོ། །མི་ཐོད་དག་ལས་བྱས་པ་ནི། །རྟག་ཏུ་སོར་གྲངས་བཅུ་གཉིས་ཤིས། །རིང་པོར་མི་ཐོགས
285b7 མཆོག་སྟེར་ཅིང་། །འདོད་པའི་དངོས་གྲུབ་རབ་ཏུ་སྟེར། །མི་ཐོད་ལས་ནི་བྱས་པ་དག་།སྔར་བསྙེན་ལ་སོགས་མ་བྱས་པར། །མཆོད་པ་འབའ་ཞིག་བྱས་པས་ཀྱང་། །དགོས་པའི་དོན་རྣམས་སྒྲུབ་པར་བྱེད། །སྐུ་གཟུགས་བཟང་པོའི་མཚན་ཉིད་དག་།རྒྱས་པར་བཤད་པ་འདི
iiif viewer powered by OpenSeadragon
