| e-texts navigator |
| Wylie |
29a1 སོ་གཞོན་ནུ་ཆེན་པོ་ཁྱོད། །འཁོར་འདི་ཀུན་གྱི་བཀྲ་ཤིས་ཡིན། །ཐབས་ལ་མཁས་པའི་སེམས་ཀྱིས་ནི། །བླ་མེད་སངས་རྒྱས་ལུང་བསྟན་ཐོབ། །དེ་བཞིན་གཤེགས་པ་གཟིགས་ཆེན་གྱིས། །འཇིག་རྟེན་དག་ནི་སྐྱོབ་མཛད་པས། །ཁྱོད་ཀྱིས་རྩེ་གཅིག་ཉོན་ཅིག
29a2 དང་། །དེང་བདག་རིམ་བཞིན་བཤད་པར་བྱ། །སངས་རྒྱས་སྤྱོད་ཡུལ་བསམ་དཀའ་བས། །འཇིག་རྟེན་དག་ན་མཚུངས་པ་མེད། །ཆོས་སྐུ་ངོ་བོ་རྟག་བཞུགས་པས། །རྣལ་འབྱོར་སྒོམ་ལ་ཁྱད་པར་མེད། །སངས་རྒྱས་སྐུ་ཀུན་མཚུངས་པས་ན། །ཆོས་གསུངས་པ
29a3 ཡང་དེ་བཞིན་ཏེ། །སངས་རྒྱས་རྣམས་ལ་མཛད་མི་མངའ། །གཟོད་མ་ཉིད་ནས་སྐྱེ་བ་མེད། །བཅོམ་ལྡན་རྡོ་རྗེའི་སྐུ་ཡིན་ཡང་། །ཐབས་ཀྱིས་སྤྲུལ་པའི་སྐུ་སྟོན་པས། །དེ་ཕྱིར་བཅོམ་ལྡན་རིང་བསྲེལ་ནི། །ཡུངས་འབྲུ་ཙམ་ཡང་ཡོད་པ་མིན། །བཅོམ་ལྡན་ཤ
29a4 ཁྲག་སྐུ་མིན་ན། །ཇི་ལྟར་རིང་བསྲེལ་ཡོད་པར་འགྱུར། །སེམས་ཅན་རྣམས་ལ་ཕན་གདགས་ཕྱིར། །ཐབས་ཀྱིས་སྐུ་གདུང་གཞག་པ་ཡིན། །ཆོས་སྐུ་ཡང་དག་སངས་རྒྱས་པས། །ཆོས་དབྱིངས་དེ་བཞིན་གཤེགས་པ་ཡིན། །ཡང
29a5 དག་སྐུ་ནི་འདི་ཡིན་པས། །དེ་འདྲའི་ཆོས་ནི་གསུངས་པར་མཛད། །དེ་ནས་འཁོར་འདུས་པ་དེ་ཉིད་དུ་ལྷའི་བུ་སུམ་ཁྲི་ཉིས་སྟོང་གིས་དེ་བཞིན་གཤེགས་པའི་སྐུ་ཚེའི་ཚད་ཤིན་ཏུ་རིང་བར་བསྟན་པ་ཐོས་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད
29a6 ནས་ངོ་མཚར་རྨད་དུ་བྱུང་བའི་དགའ་བ་དང་། མགུ་བ་དང་། རངས་པ་ཐོབ་པས་ཐམས་ཅད་མགྲིན་གཅིག་ཏུ་ཚིགས་སུ་བཅད་དེ་སྨྲས་པ། སངས་རྒྱས་མྱ་ངན་མི་འདའ་སྟེ། །ཡང་དག་ཆོས་ཀྱང་ནུབ་མི་འགྱུར། །སེམས་ཅན་རྣམས་ལ་ཕན་གདགས་ཕྱིར། །མྱ་ངན་འདའ་བར
29a7 བསྟན་པ་ཡིན། །བཅོམ་ལྡན་བསམ་གྱིས་མི་ཁྱབ་ཅིང་། །སྐུ་མཆོག་ཐ་དད་མཚན་མེད་ཀྱང་། །སེམས་ཅན་རྣམས་ལ་ཕན་གདགས་ཕྱིར། །བཀོད་པ་སྣ་ཚོགས་སྟོན་པར་མཛད། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་བཅོམ་ལྡན་འདས་ཀྱི་སྤྱན་སྔར་དེ་བཞིན
iiif viewer powered by OpenSeadragon
