| e-texts navigator |
| Wylie |
168b1 གདུ་བུ་ལ་སོགས་པ། རྒྱན་རྣམ་པ་སྣ་ཚོགས་པ་ཡིད་བཞིན་དུ་བསྒྱུར་ཏེ། སྤྱད་ཀྱང་གསེར་གྱི་རང་བཞིན་ཉིད་ནི་མི་འགྱུར་རོ། །རིགས་ཀྱི་བུ་གཞན་ཡང་རིགས་ཀྱི་བུའམ། རིགས་ཀྱི་བུ་མོ་གང་འཇིག་རྟེན་གྱི་དགེ་བར་སྤྱོད་པར་མོས་པ་དེས། དེ་བཞིན
168b2 གཤེགས་པའམ། དེ་བཞིན་གཤེགས་པའི་འཁོར་དེ་དག་མཐོང་སྟེ། ཉེ་བར་བསྙེན་ནས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་བ་ནི་གང་། མི་དགེ་བ་ནི་གང་། ཡང་དག་པའི་བསྒྲུབ་པ་གང་བགྱིས་པས། རྣམ་པར་དག་པའི་སྤྱོད་པ་ཐོབ་པར་འགྱུར། སངས་རྒྱས་བཅོམ་ལྡན་འདས་རྣམས
168b3 དང་། དེའི་འཁོར་དག་གིས་དེ་སྐད་ཅེས་འདྲི་བ་ལ་འདི་སྙམ་དུ་དགོངས་ཏེ། རིགས་ཀྱི་བུ་དང་རིགས་ཀྱི་བུ་མོ་འདི་དག་ནི། དམ་པའི་ཆོས་ཉན་པར་མོས་པ་དང་། རྣམ་པར་བྱང་བར་འདོད་པ་སྟེ། འདི་དག་ལ་ཡང་དག་པའི་ཆོས་བསྟན་ཏོ་སྙམ་མོ། །དེ་ཐོས་ནས་ཀྱང་ཚུལ་བཞིན
168b4 དུ་ཡིད་ལ་བྱ་སྟེ། ནན་ཏན་གྱིས་བསམ་པ་སྐྱེས་ཤིང་། བརྩོན་པར་གྱུར་པའི་མཐུས། ལེ་ལོའི་སྒྲིབ་པ་དང་། སྡིག་པ་མི་དགེ་བའི་ཆོས་ཐམས་ཅད་བསལ་ཏེ། བསླབ་པའི་གནས་ཐམས་ཅད་ལ་རབ་ཏུ་གུས་པར་གནས་ཤིང་། སེམས་བྱིང་བ་དང་། རྒོད་པ་དག་བསལ་ཏེ་ས་དང
168b5 པོ་ལ་འཇུག་གོ། །ས་དང་པོའི་སེམས་ལ་བརྟེན་ནས། སེམས་ཅན་མང་པོའི་དོན་ལ་བརྩོན་པ་ལ་སྒྲིབ་པ་སྤངས་པས། ས་གཉིས་པ་ལ་འཇུག་གོ། །ས་དེ་ལས་ཉོན་མོངས་པའི་སྒྲིབ་པ་སྤངས་ནས། ས་གསུམ་པ་ལ་འཇུག་གོ། །ས་དེ་ལས་སེམས་རྣམ་པར་སྦྱོང་བ་ལ་སྒྲིབ་པ་སྤངས
168b6 ནས། ས་བཞི་པ་ལ་འཇུག་གོ། །ས་དེ་ལས་ཐབས་མཁས་པའི་སྒྲིབ་པ་སྤངས་ནས། ས་ལྔ་པ་ལ་འཇུག་གོ། །ས་དེ་ལས་དོན་དམ་པ་དང་ཀུན་རྫོབ་ཏུ་དམིགས་པའི་སྒྲིབ་པ་སྤངས་ནས། ས་དྲུག་པ་ལ་འཇུག་གོ། །ས་དེ་ལས་མཚན་མ་དང་སྤྱོད་པ་ལ་དམིགས་པའི་སྒྲིབ་པ་སྤངས་ནས། །
168b7 ས་བདུན་པ་ལ་འཇུག་གོ། །ས་དེ་ལས་མཚན་མ་འགོག་པར་ཡང་མི་དམིགས་པའི་སྒྲིབ་པ་སྤངས་ནས། ས་བརྒྱད་པ་ལ་འཇུག་གོ། །ས་དེ་ལས་མཚན་མ་སྐྱེ་བར་ཡང་མི་དམིགས་པའི་སྒྲིབ་པ་སྤངས་ནས། ས་དགུ་པ་ལ་འཇུག་གོ། །ས་དེ་ལས་དྲུག་པ་མངོན་པར་ཤེས་པའི་སྒྲིབ་པ
iiif viewer powered by OpenSeadragon
