| e-texts navigator |
| Wylie |
166b1 ལ་གནས་པའི་ཡིད་སྦྱངས་པས་ལོངས་སྤྱོད་རྫོགས་པའི་སྐུ་སྟོན་ཏོ། །ཀུན་གཞིའི་རྣམ་པར་ཤེས་པ་སྦྱངས་པས་ནི། ཆོས་ཀྱི་སྐུ་འཐོབ་སྟེ། དེ་ལྟར་ན་དེ་བཞིན་གཤེགས་པ་ཐམས་ཅད་སྐུ་གསུམ་ལྷུན་གྱིས་གྲུབ་པ་ཞེས་བྱའོ། །རིགས་ཀྱི་བུ་སངས་རྒྱས་ཐམས་ཅད་ཀྱི་སྤྲུལ་པའི་སྐུ་ནི
166b2 སངས་རྒྱས་ཐམས་ཅད་དང་། སྤྱོད་པ་མཐུན་པའོ། །ལོངས་སྤྱོད་རྫོགས་པའི་སྐུ་ནི་སངས་རྒྱས་ཐམས་ཅད་དང་དགོངས་པ་མཐུན་པའོ། །ཆོས་ཀྱི་སྐུ་ནི་སངས་རྒྱས་ཐམས་ཅད་དང་སྐུ་མཐུན་པའོ། །རིགས་ཀྱི་བུ་སངས་རྒྱས་ཀྱི་སྤྲུལ་པའི་སྐུ་ནི་སྐྱེ་བོ་སོ་སོའི་ཡིད་དང་མཐུན་པར་རྣམ་པ་མང་པོས
166b3 མཚན་མ་སྣ་ཚོགས་སྟོན་པའི་ཕྱིར་མང་པོ་ཞེས་བྱའོ། །ལོངས་སྤྱོད་རྫོགས་པའི་སྐུ་ནི་འཁོར་རྣམས་ཀྱི་བསམ་པ་གཅིག་པས། མཚན་ཉིད་གཅིག་པའི་ཕྱིར་མཚན་ཉིད་གཅིག་ཅེས་བྱའོ། །ཆོས་ཀྱི་སྐུ་ནི་མཚན་མ་སྣ་ཚོགས་ལས་ཡང་དག་པར་འདས་པ། མཚན་མར་གཟུང་བའི་སྤྱོད
166b4 ཡུལ་མ་ཡིན་པ་སྟེ། དེ་བས་ན་གཅིག་པ་ཡང་མ་ཡིན། ཐ་དད་པ་ཡང་མ་ཡིན་པ་ཞེས་བྱའོ། །རིགས་ཀྱི་བུ། སྤྲུལ་པའི་སྐུ་ནི་ལོངས་སྤྱོད་རྫོགས་པའི་སྐུ་ལ་བརྟེན་ཏེ་མངོན་པར་སྣང་ངོ་། །ལོངས་སྤྱོད་རྫོགས་པའི་སྐུ་ནི་ཆོས་ཀྱི་སྐུ་ལ་བརྟེན་ཏེ་མངོན་པར་སྣང་ངོ་། །ཆོས་ཀྱི་སྐུ་ནི
166b5 ཡང་དག་པ་སྟེ། ཅི་ལ་ཡང་མི་གནས་པའོ། །རིགས་ཀྱི་བུ་སྐུ་དེ་གསུམ་ནི་རྟག་པར་བཤད་པའི་རྣམ་གྲངས་ཀྱང་ཡོད། མི་རྟག་པར་བཤད་པའི་རྣམ་གྲངས་ཀྱང་ཡོད་དོ། །སྤྲུལ་པའི་སྐུ་ནི་ཐབས་མཁས་པས་རྣམ་པ་ཐམས་ཅད་དུ་དམིགས་པ་ཇི་ལྟ་བ་བཞིན་དུ་རྒྱུན་མི་འཆད་པར་ཆོས་ཀྱི
166b6 འཁོར་ལོ་བསྐོར་བའི་ཕྱིར་རྟག་པ་ཞེས་བྱའོ། །དེ་གཞིར་མ་གྱུར་པས་མཛད་པ་ཆེན་པོ་ཕུན་སུམ་ཚོགས་པ་མངོན་དུ་མི་སྟོན་པའི་ཕྱིར་མི་རྟག་པ་ཞེས་བྱའོ། །ལོངས་སྤྱོད་རྫོགས་པའི་སྐུ་ནི་ཐོག་མ་མེད་པའི་དུས་ནས་རྒྱུན་མི་འཆད་ཅིང་སངས་རྒྱས་ཐམས་ཅད་ཀྱི་ཆོས་མ་འདྲེས་པས་ཡོངས་སུ་འཛིན་ཅིང་སྡུད
166b7 པའི་ཕྱིར། སེམས་ཅན་ཟད་པ་མེད་པས། སྤྱོད་པ་ཡང་མི་ཟད་དེ། དེའི་ཕྱིར་རྟག་པ་ཞེས་བྱའོ། །དེ་ཡང་གཞིར་མ་གྱུར་པའི་ཕྱིར་མཛད་པ་ཆེན་པོ་ཕུན་སུམ་ཚོགས་པ་མངོན་དུ་མི་སྟོན་པས་མི་རྟག་པ་ཞེས་བྱའོ། །ཆོས་ཀྱི་སྐུ་ནི་འདུ་བྱེད་ཀྱི་ཆོས་མ་ཡིན་པ་མཚན་མ་ཐ་དད་པ་མེད་པ་རྩ་བ་དང
iiif viewer powered by OpenSeadragon
