| e-texts navigator |
| Wylie |
146a1 འོད་ཟེར་ཕྱོགས་བཅུའི་འཇིག་རྟེན་བཀང་། །རྐྱེན་ནི་ཇི་བཞིན་སེམས་ཅན་སྒྲོལ་བར་མཛད། །ཉོན་མོངས་སྲེད་པའི་བག་ཆགས་ཀུན་བསལ་བས། །ཆོས་ཀྱི་སྒྲོན་མ་རྟག་པར་རྒྱུན་མི་འཆད། །ཐུགས་བརྩེས་སེམས་ཅན་དག་ལ་ཕན་འདོགས་པས། །ད་ལྟར་སླད
146a2 མའི་དུས་ཚེ་བདེ་བ་སྩོལ། །རྟག་པར་དོན་མཆོག་དམ་པ་རབ་བཤད་ནས། །ཡང་དག་རབ་དབེན་མྱ་ངན་འདས་ལ་འགོད། །བཅོམ་ལྡན་བདུད་རྩིའི་ཆོས་མཆོག་རབ་བསྟན་ནས། །བདུད་རྩིའི་གྱ་ནོམ་དོན་ནི་སྩོལ་མཛད་པས། །བདུད་རྩིའི་གྲོང་ཁྱེར་དག་ཏུ་རབ་དྲངས་ནས། །བདུད་རྩི་འདུས
146a3 མ་བགྱིས་ཀྱི་བདེ་ལ་འགོད། །རྟག་པར་འཁོར་བའི་རྒྱ་མཚོ་ཆེན་པོ་ནས། །སྡུག་བསྔལ་སེམས་ཅན་ཐམས་ཅད་ཐར་བར་མཛད། །དེ་དག་བདེ་བའི་ཤུལ་དུ་རབ་བཙུད་དེ། །ཡིད་བཞིན་བདེ་བ་བསམ་མི་ཁྱབ་པ་སྩོལ། །བཅོམ་ལྡན་ཡོན་ཏན་རྒྱ་མཚོ་ཟབ་ལ་ཡངས། །དཔེ་ནི་མང་པོ་དག
146a4 གིས་རིག་མི་འགྱུར། །རྟག་པར་ཀུན་ལ་ཐུགས་རྗེ་ཆེར་གཟིགས་པས། །ཐབས་མཁྱེན་བརྩོན་འགྲུས་དག་ནི་རྒྱུན་མི་འཆད། །བཅོམ་ལྡན་ཡོན་ཏན་རྒྱ་མཚོ་མཐའ་མ་མཆིས། །བསྐལ་པ་བྱེ་བ་བརྒྱ་སྟོང་བར་དུ་ནི། །ལྷ་མི་ཐམས་ཅད་ལྷན་ཅིག་དཔག་བསམས་ཀྱང་། །ཆ་ཤས་ཙམ་ཡང་རིག
146a5 པར་ཡོང་མི་འགྱུར། །བདག་ཅག་སངས་རྒྱས་ཡོན་ཏན་རྒྱ་མཚོ་ལས། །ཐིགས་པ་འགའ་ཞིག་བསྔགས་པ་བརྗོད་པ་ཡི། །བསོད་ནམས་དེ་དག་སྐྱེ་དགུ་ཡོངས་བསྔོས་ནས། །ཐམས་ཅད་བྱང་ཆུབ་འབྲས་བུ་མྱུར་ཐོབ་སྨོན། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས
146a6 དཔའ་མང་པོ་དེ་དག་ལ་བཀའ་སྩལ་པ། ལེགས་སོ་ལེགས་སོ། །ཁྱེད་ཀྱིས་འདི་ལྟར་དེ་བཞིན་གཤེགས་པའི་ཡོན་ཏན་གྱི་བསྔགས་པ་བརྗོད་པ་ཉིད་ཀྱིས་སེམས་ཅན་ལ་ཕན་འདོགས་ཤིང་སངས་རྒྱས་ཀྱི་མཛད་པ་རྒྱ་ཆེར་བྱེད་པར་འགྱུར་བས་སྡིག་པ་རྣམས་ཡོངས་སུ་བྱང་ནས
146a7 བསོད་ནམས་ཚད་མེད་པ་སྙེད་སྐྱེ་བར་འགྱུར་རོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ཕྱོགས་བཅུའི་བྱང་ཆུབ་སེམས་དཔའ་རྣམས་ཀྱིས་བསྔགས་པ་བརྗོད་པའི་ལེའུ་སྟེ་ཉི་ཤུ་བདུན་པའོ།། །།དེ་ནས་བྱང་ཆུབ་སེམས་དཔའ་མཛེས
iiif viewer powered by OpenSeadragon
