| e-texts navigator |
| Wylie |
254b1 གཡས་པ་དང་། གཡོན་པ་དག་གི་རྡོ་རྗེ་ཆེན་པོའི་སྦྱོར་བས་ལས་ཐམས་ཅད་ཀྱི་དངོས་གྲུབ་སྒྲུབ་པར་བྱེད་པའི་སྟོང་ཉིད་དུ་འགྱུར་ཏེ་རྡོ་རྗེ་བསྡམས་པ་ནང་དུ་བཅིངས་པས་སོ། །དེ་ལྟར་རང་གི་ཕྱག་མཚན་གྱི་ཁུ་ཚུར་རྡོ་རྗེ་གར་ལས་བྱུང་བའི་ཕྱག་རྒྱ་སྟོང་དང་པོའི་ལས་ཀྱི་ཚོགས་བརྒྱ་སྒྲུབ་པར་བྱེད
254b2 པའི་རྡོ་རྗེ་ལས་བྱེད་པ་གསུམ་མོ། །དེ་ལྟར་ལག་པ་གཡས་པ་དང་། གཡོན་པའི་ཅིག་ཤོས་ཀྱིས་ལས་ཐམས་ཅད་རབ་ཏུ་སྒྲུབ་པར་བྱེད་པའི་ལས་ཀྱི་ཕྱག་རྒྱ་སྟོང་བཞི་པའོ། །དེ་ལྟར་མ་ལུས་པའི་ཕྱག་རྒྱ་བཅིང་བ་ནི་ལག་པ་གཅིག་གིས་ཕྱག་རྒྱ་ཐམས་ཅད་བཅིང་བ་རབ་ཏུ་སྒྲུབ་པའོ། །དེ
254b3 ལྟར་འགྲོ་བ་ཀུན་དོན་དུ། །འཁོར་དང་དམ་ཚིག་ལས་དང་བཅས། །ཀུན་མཆོག་དབང་ཕྱུག་དམ་པ་ནི། །རྡོ་རྗེ་སེམས་དཔས་སྒྲུབ་པར་མཛད། །དེ་ལྟར་གསང་བ་རྒྱ་ཆེན་རྨད་དུ་བྱུང་། །མཆོག་ཏུ་འགྲོ་བ་ཐམས་ཅད་སྦྱོར་བྱེད་པ། །མཆོག་དང་པོ་ཡི་བླ་མ་བླ་ན་མེད། །གསལ་བའི
254b4 རྒྱུད་ནི་ང་ཡིས་ཡང་དག་བཤད། །དཔལ་མཆོག་དང་པོ་རྟོག་པའི་རྒྱལ་པོ་ལས་རིགས་ཐམས་ཅད་ཀྱི་ཕྱག་རྒྱའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །གསང་བ་ཀུན་གྱི་བདག་བརྟན་པས། །དེ་ཉིད་ཕྱག་རྒྱའི་རྒྱུད་ཆེན་པོའི། །མཚོན་ཆ་དམ་པ་འདི་གསུངས་སོ། །དེ་ནས
254b5 བཅོམ་ལྡན་འདས་རྡོ་རྗེ་སེམས་དཔའི་རྟོག་པ་ཐམས་ཅད་ཀྱི་གསང་བའི་དཀྱིལ་འཁོར་གྱི་རྟོག་པའི་ཚོགས་མཆོག་ཏུ་མཁས་ཤིང་ཕྲ་བ། རྒྱ་ཆེ་ལ་ཟབ་པ། བསམ་གྱིས་མི་ཁྱབ་པ་ཚད་མེད་པ། གསལ་ཞིང་མཉམ་པ་མེད་པ། བླ་ན་མེད་པའི་བླ་མ་མཐར་ཐུག་པ་མེད་པའི་དངོས་གྲུབ་ཀྱི
254b6 གསང་བ་བསྒྲུབ་པ་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་རྣམས་སྒྲུབ་པ་པོ་དོན་ཡོད་ཅིང་ཐོགས་པ་མེད་པ་བཤད་པར་བྱའོ་ཞེས་བྱ་བ་བཅོམ་ལྡན་འདས་མཆོག་ཏུ་གསང་བས་གསུངས་སོ། །མ་མཆུ་སོ་རྣམས་ཀྱིས་བཟུང་ལ་དགའ་བ་ཆེན་པོས་དང་པོའི་རྡོ་རྗེའི་ལྟ
254b7 བས་བལྟ་ཞིང་བྱེད་པ་དག་གིས་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་རྣམས་སྒྲུབ་པར་བྱེད་པའོ། །བདེ་བ་ཆེན་པོའི་གསང་བ་ཆེན་པོའི་རྡོ་རྗེ་རྡོ་རྗེ་སྤྱན་ཞེས་བྱ་བའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་ཀྱི་བཞད་པ་ཆེན་པོས་དགོད་ཅིང་བརྟན་པའི་རྡོ་རྗེ
iiif viewer powered by OpenSeadragon
