| e-texts navigator |
| Wylie |
184b1 ཡིད་བདེ་བ་ཐམས་ཅད་ཀྱི་ནོར་བུའི་རིགས་ཀྱི་ཆོ་ག་རྒྱས་པའོ། ། །།དེ་ནས་བཅོམ་ལྡན་འདས་རིགས་ཐམས་ཅད་བསྡུས་པའི་རྡོ་རྗེ་བྱིན་གྱིས་བརླབས་པའི་ཡེ་ཤེས་ཐོབ་པས་སེམས་ཅན་ཐམས་ཅད་གཞུག་པའི་འཁོར་ལོ་རྡོ་རྗེའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར
184b2 ཞུགས་ཏེ། ཐོག་མ་ཐ་མ་མེད་པའི་བཅོམ་ལྡན་འདས་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་པ། །ཆགས་པ་ཆེན་པོ་རྣམ་དག་ཕྱིར། །བདེ་བ་ཆེན་པོའི་དོན་གྱི་ཕྱིར། །འགྲོ་རྣམས་ཅི་བདེ་གཞུག་ཏུ་གསོལ། །དེ་ནས་བཅོམ་ལྡན་འདས་ཐམས་ཅད་ལས
184b3 རྣམ་པར་རྒྱལ་བའི་འགྲོ་བ་ཀུན་འདུལ་བ། དམ་ཚིག་ཐམས་ཅད་དང་དངོས་གྲུབ་ཐམས་ཅད་སྩོལ་བ། རྡོ་རྗེ་འཆང་ཆེན་པོ་སྟོན་པ་པོ་སྒྲུབ་པ་པོ་སྟོབས་དང་ཕ་རོལ་གནོན་པ་ཐོགས་པ་མེད་པ། ཐམས་ཅད་ལ་རྗེས་སུ་སྟོན་པས་དོན་ཡོད་པར་གྲུབ་པ་དམ་ཚིག་རྡོ་རྗེ་འཛིན་པ་ཞེས་བྱ་བའི
184b4 རྣམ་པར་གནོན་པ་མཛད་ནས་བདེ་བ་ཆེན་པོ་དངོས་གྲུབ་ཐམས་ཅད་ཀྱི་དམ་ཚིག་ཅེས་བྱ་བའི་དོན་ཡོད་པ་མཚུངས་པ་མེད་པ་ཐམས་ཅད་ཀྱི་སྙིང་པོ་འདི་གསུངས་སོ། །ཧོཿཱཿཧཱུ~ཾ་ཧྲཱིཿཏྲཱ~ཾ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་འཇིག་རྟེན་པ
184b5 དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་དཀྱིལ་འཁོར་ཆེན་པོ་དེར་ཡང་དག་པར་གནས་ཏེ། དཀྱིལ་འཁོར་གཅིག་ཉིད་དུ་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོ་སེམས་ཅན་ཐམས་ཅད་རྗེས་སུ་གཞུག་བ་བདེ་བ་ཆེན་པོའི་རྡོ་རྗེ་དམ་ཚིག་གི
184b6 གསང་བ་གསུངས་པ། དཀྱིལ་འཁོར་ཆེན་པོའི་ཚུལ་གྱིས་ནི། །དཀྱིལ་འཁོར་ཐམས་ཅད་ཀུན་དུ་བྲི། །དཀྱིལ་འཁོར་ཆེན་པོ་དང་པོ་ནི། །དེ་ཡི་དབུས་སུ་བརྟག་པར་བྱ། །དེ་ཡི་ལོགས་སུ་རིགས་རྣམས་ཀྱི། །དཀྱིལ་འཁོར་བཞི་པོ་བྲི་བར་བྱ། །ཕྱི་ཡི་མཚམས་ཀྱི
184b7 མཐའ་རུ་ནི། །ཕྱི་རོལ་དཀྱིལ་འཁོར་ཚོགས་རྣམས་བྲི། །སྒོ་རྣམས་ཀུན་ཏུ་འཇུག་པར་ནི། །རང་གི་ཕྱག་རྒྱར་རབ་ཏུ་གནས། །དཀྱིལ་འཁོར་དམ་པ་ལྔ་སྡུད་ཅིང་། །རྡོ་རྗེ་ཤུགས་ཀྱིས་འཇུག་པར་བྱ། །ཆོ་ག་རྒྱས་པ་ཐམས་ཅད་དང་། དངོས་གྲུབ་ཐམས་ཅད་དང་།
iiif viewer powered by OpenSeadragon
