| e-texts navigator |
| Wylie |
146a1 རྣམ་སྦྱོང་བ། །ཞི་ཞིང་དུལ་ལ་དག་པ་ཆེ། །སངས་རྒྱས་སངས་རྒྱས་རབ་རྟོགས་མཛད། །སངས་རྒྱས་བདག་ཉིད་སངས་རྒྱས་སྐུ། །རྡོ་རྗེ་ལེགས་སྐྱེས་རྡོ་རྗེ་སེམས། །ཀུན་དུ་བཟང་པོ་ཆེར་བཟང་བ། །མཚན་རྣམས་ཀུན་གྱིས་མཚན་པ་པོ། །ཁམས་ཀུན་བདག་ཉིད་ཁྱབ་པ་པོ། །ཐམས་ཅད་རྡོ་རྗེའི་བདག་ཉིད་གཙང་། །
146a2 གང་གིས་འདི་བྲིས་ཀློག་པ་དང་། །རྟག་ཏུ་དོན་ནི་འཆང་བྱེད་དམ། །དྲན་ནམ་ཉན་པར་བྱེད་ཀྱང་རུང་། །ཕྱག་ན་རྡོ་རྗེ་མཉམ་པར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བརྒྱ་བྱིན་དང་ཚངས་པ་ལ་སོགས་པ་ལྷའི་འཁོར་དང་བཅས་པའི་ལྷ་དང་མི་དང་། ལྷ་མ་ཡིན་དང་། དྲི་ཟ་དང་། གནོད་སྦྱིན་དང་། སྲིན་པོ་ལ་སོགས་པ
146a3 ཕན་པ་དང་བདེ་བ་ཐོབ་པའི་ཕྱིར་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་རྫོགས་སོ།། །།རྒྱ་གར་གྱི་མཁན་པོ
146a4 བླ་མ་རྗེ་བཙུན་ཆེན་པོ་དེ་བེནྡྲ་དེ་བའི་ཞབས་དང་། བླ་མ་པཎ་ཆེན་སྐྱེས་བུ་ཆེན་པོ་མཱ་ཎི་ཀ་ཤྲཱི་ཛྙཱ་ནའི་ཞལ་སྔ་ནས་གུས་པར་མཉན་ཏེ་ཆག་ལོ་ཙཱ་བ་ཤཱཀྱའི་དགེ་སློང་ཆོས་རྗེ་དཔལ་གྱིས་བསྒྱུར་ཞིང་ཞུས་ཏེ་གཏན་ལ་ཕབ་པ།། །།སྤྲེའུ་ལོ་དབྱུག་གུ་ཟླ་བའི་མར་ངོའི་ཚེས
146a5 བཅུ་གསུམ་ལ། གཙུག་ལག་ཁང་ཆེན་པོ་དཔལ་ཐང་པོ་ཆེར་དབུ་བཙུགས་ནས། སྨིན་དྲུག་ཟླ་བའི་ཡར་ངོའི་ཚེས་བཅུ་གཉིས་ཀྱི་སྔ་དྲོའི་བར་ཞག་བཅོ་ལྔར་འགྲོ་བའི་ཚེ་དཔལ་འདྲེན་གྱི་ལྷའི་གདིངས་སུ་ཚར་བར་བགྱིས་སོ། །དཔལ་ལྡན་རྒྱུད་རྒྱལ་ངན་སོང་སྦྱོང་བ་ཡི། །བརྟག་པ་ཕྱོགས
146a6 གཅིག་སྔར་གྲགས་ཁ་ཆེ་ནས། །ཆོས་རྒྱལ་སྐུ་དྲིན་པཎ་ཆེན་སྒྲ་བསྒྱུར་མཆོག་།སྐྱེས་ཆེན་རྣམས་ཀྱིས་ལེགས་པར་དར་བར་མཛད། །འདི་ནི་དཔལ་ལྡན་ཀུན་དགའ་སྙིང་པོ་དང་། རྗེ་བཙུན་འཇིགས་མེད་འབྱུང་གནས་སྦས་པ་ཡི། །མན་ངག་ལ་བརྟེན་རྒྱ་གར་བལ་པོ་ན། །ཡོངས་གྲགས་བླ
146a7 མའི་དྲིན་ལས་ཁོ་བོས་བསྒྱུར། །སྒྲ་གཞུང་བླ་མའི་གསུང་བཞིན་དུ། །གུས་བསྒྱུར་ནོངས་པ་མཁས་ཆེན་རྣམས། །བཟོད་མཛད་དེ་དགེས་འགྲོ་བ་ཀུན། །འགྲོ་མགོན་ཐུབ་ཆེན་ཉིད་གྱུར་ཅིག། །།
iiif viewer powered by OpenSeadragon
