| e-texts navigator |
| Wylie |
97b1 ལྷ་མོ་བཞི། །དངོས་གྲུབ་སྦྱིན་པར་མཛད་པར་བྲི། །དབང་བདག་གི་ཕྱོགས་སུ་ནི་སྤྱན་ནོ། །མེའི་ཕྱོགས་སུ་ནི་མཱ་མ་ཀཱིའོ། །བདེན་བྲལ་ཕྱོགས་སུ་ནི་གོས་དཀར་ཅན་ནོ། །རླུང་གི་ཕྱོགས་སུ་ནི་ལྷ་མོ་སྒྲོལ་མའོ། །རྡོ་རྗེ་ཤུགས་ཀྱིས་ཕྱིར་ཕྱུང་ནས་རིམ་པ་གཉིས་པ་ལ
97b2 ཤར་ཕྱོགས་སུ་ནི་རྡོ་རྗེ་སེམས་མ། ལྷོར་རྡོ་རྗེ་རིན་ཆེན་མ། ནུབ་ཏུ་རྡོ་རྗེ་ཆོས་མ། བྱང་དུ་རྡོ་རྗེ་ལས་མ་རྣམས་བྲིའོ། །གྲཝ་རྣམས་སུ་སྐུལ་བྱེད་མ་དང་། རིན་ཆེན་སྒྲོལ་མ་དང་། ཁྲོ་གཉེར་ཅན་དང་། རྡོ་རྗེ་ལུ་གུ་རྒྱུད་རྣམས་སོ། །དེ་ནས་ཡང་འགྱིང་བག་ཏུ་ལངས་ཏེ། རྡོ་རྗེ
97b3 ཤུགས་ཀྱིས་ཕྱིར་ཕྱུང་ནས་རིམ་པ་གསུམ་པ་ལ། ཤར་ཕྱོགས་སུ་བྱང་ཆུབ་སེམས་དཔའ་བྱམས་པ་དང་། འཇམ་དཔལ་དང་། སྤོས་ཀྱི་གླང་པོ་དང་། ཡེ་ཤེས་ཏོག་རྣམས་བྲིའོ། །ལྷོ་ཕྱོགས་སུ་བཟང་སྐྱོང་དང་། བློ་གྲོས་རྒྱ་མཚོ་དང་། བློ་གྲོས་མི་ཟད་པ་དང་། སྤོབས་པ
97b4 བརྩེགས་པ་རྣམས་བྲིའོ། །ནུབ་ཕྱོགས་སུ་ནི་མཐུ་ཆེན་ཐོབ་དང་། ངན་སོང་ཐམས་ཅད་སྤོང་བ་དང་། མྱ་ངན་གྱི་མུན་པ་ཐམས་ཅད་ངེས་པར་འཇོམས་པའི་བློ་གྲོས་དང་། དྲ་བ་ཅན་གྱི་འོད་རྣམས་བྲིའོ། །བྱང་ཕྱོགས་སུ་ཟླ་འོད་དང་། འོད་དཔག་མེད་དང་། ནམ་མཁའ་མཛོད་དང་།
97b5 སྒྲིབ་པ་ཐམས་ཅད་རྣམ་པར་སེལ་བ་རྣམས་བྲིའོ། །ཤར་སྒོར་ནི་གཤིན་རྗེ་མཐར་བྱེད་དོ། །ལྷོ་སྒོར་ནི་ཤེས་རབ་མཐར་བྱེད་དོ། །ནུབ་སྒོར་ནི་པདྨ་མཐར་བྱེད་དོ། །བྱང་སྒོར་ནི་བགེགས་མཐར་བྱེད་དོ། །གྲཝ་རྣམས་སུ་ནི་མི་གཡོ་བ་དང་། འདོད་པའི་རྒྱལ་པོ་དང་། བེ་ཅོན་སྔོན་པོ
97b6 དང་། སྟོབས་པོ་ཆེའོ། །ཟུར་རྣམས་སུ་ནི་རྡོ་རྗེ་བྲིའོ། །སྒོའི་ནང་ལོགས་སུ་ཡང་རྡོ་རྗེ་བྲིའོ། །འཁོར་ལོ་ནི་ཚོན་རྩི་དཀར་པོས་བྲིའོ། །གཉིས་པ་ནི་ཚོན་རྩི་དཀར་པོ་དང་། སེར་པོ་དང་། སྔོན་པོ་གསུམ་གྱིས་བྲིའོ། །གསུམ་པ་ནི་སྣ་ལྔས་བྲི་བར་བྱ་སྟེ། དེ་ལྟ་བུ་ནི་དཀྱིལ་འཁོར་ཆེན་པོ་ཡིན་ནོ། །དེ་ནས་དབང་བསྐུར
97b7 བའི་དོན་དུ་དཀྱིལ་འཁོར་གྲུ་བཞི་པ་སྒོ་བཞི་དང་ལྡན་པ་རིམ་པ་གཉིས་པར་བྱའོ། །དབུས་སུ་ནི་པདྨ་འདབ་མ་བརྒྱད་པ་སྙིང་པོ་དང་བཅས་པ་བྲིའོ། །སྣམ་བུ་གཉིས་པ་ལ་ཤར་ཕྱོགས་སུ་ནི་རྡོ་རྗེའོ། །ལྷོ་ཕྱོགས་སུ་ནི་རིན་པོ་ཆེ། ནུབ་ཕྱོགས་སུ་ནི་པདྨ། བྱང་ཕྱོགས་སུ་ནི
iiif viewer powered by OpenSeadragon
