| e-texts navigator |
| Wylie |
39b1 ཤ་མིག་རྣམ་པར་དག་པ་ཡི། །ཀླུ་ཆེན་བརྒྱད་ཀྱིས་བལྟས་གྱུར་ཀྱང་། །མཐོང་བར་འགྱུར་བ་མ་ཡིན་ནོ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ལུས་རྣམ་པར་སྦ་བའི་ལེའུ་སྟེ་བདུན་པའོ།། །།དེ་ནས་ལྷ་ཡི་དབང་པོ་དང་།
39b2 གནོད་སྦྱིན་གྱི་སྡེ་དཔོན་ལག་ན་རྡོ་རྗེ་གཏུམ་པོ་དང་། གནོད་སྦྱིན་གྱི་སྡེ་དཔོན་ལག་ན་རྡོ་རྗེ་གོས་སྔོན་པོ་ཅན་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་སྟོབས་པོ་ཆེ་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གསང་བའི་བདག་པོ་དང་། དེ་དག་ལ་སོགས་པ
39b3 འདུས་པའི་ཚོགས་ཆེན་པོ་རྣམས་རབ་ཏུ་ཡི་རངས་ཏེ། ལན་བརྒྱ་སྟོང་དུ་མར་མཆོད་ཅིང་བསྐོར་ནས་མངོན་པར་བསྟོད་དོ། །དེ་ནས་ལག་ན་རྡོ་རྗེ་བཞི་ལ་བཀའ་སྩལ་པ། ལག་ན་རྡོ་རྗེ་བཞི་པོ་དང་། རྒྱུད་འདི་དག་གང་ན་གནས་པར་ཁྱེད་ཀྱང་རྗེས་སུ་འབྲངས་ལ་རྒྱུད་འདི་འཆད་པ
39b4 དུས་གསུམ་དུ་མཆོད་ཅིང་བཀུར་བར་གྱིས་ཤིག་། དེའི་དགོས་པ་གང་ཅིའང་རུང་པ་མ་ལུས་པར་སྒྲུབས་ཤིག་།ཕྱི་མའི་དུས་ན་ཨོ་ཏྲེ་ཡུལ་དུ་རྒྱས་པར་འགྱུར་གྱིས་དེར་སྲུང་བར་བྱོས་ཤིག་ཅེས་གསུངས་ནས་ཆོས་ཀྱི་དབྱིངས་རྣམ་པར་དག་པ་ལ་བཞུགས་སོ། །དཔལ་རྡོ་རྗེ་གཏུམ
39b5 པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ཡོངས་སུ་གཏད་པའི་ལེའུ་སྟེ་བརྒྱད་པའོ། ། །།དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་རྫོགས་སོ།། །།རྒྱ་གར་གྱི་སློབ་དཔོན་ཨ་པ་ཡུག་ཏི་ལ་དང་། བོད་ཀྱི་ལོ་ཙྪ་བ་བླ་བན་ཆོས་ཀྱི་བརྩོན་འགྲུས
39b6 ཀྱིས་ཞུས་ཏེ་བསྒྱུར་ཅིང་གཏན་ལ་ཕབ་པའོ། ། །།@#། །དཀོན་མཆོག་གསུམ་ལ་ཕྱག་འཚལ་ལོ། གནོད་སྦྱིན་གྱི་སྡེ་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། ཨོཾ་མུ་ཙི
39b7 ནི་སྭཱ་ཧཱ། མུ་ཁེ་སེ་སྭཱ་ཧཱ། མོ་ཧཱ་ནི་སྭཱ་ཧཱ། དན་ཏི་སྭཱ་ཧཱ། ཆོ་ག་འདི་ཆུ་ཁྱོར་བ་གང་བཟླས་པ་བྱས་ཏེ། འཐུངས་ནས་སེམས་བཞིན་དུ་ཉལ་ན་ལག་ན་རྡོ་རྗེས་རྨི་ལམ་སྟོན་པར་འགྱུར་རོ། །རྨི་ལམ་མཐོང་བ་ཞེས་བྱ་བའི་གཟུངས་རྫོགས་སོ།། །།
iiif viewer powered by OpenSeadragon
