| e-texts navigator |
| Wylie |
14b1 བྱེད་པ་ནི་རྒྱུད་ལས་གྲུབ་པའི་བསམ་གཏན་ཏེ། འདི་གོམས་པས་གང་དང་གང་འདོད་པ་ཐམས་ཅད་འགྲུབ་ཅིང་ཁམས་གསུམ་གྱི་དབང་ཕྱུག་ཏུ་འགྱུར་རོ། །གསང་བའི་བདག་པོ་ང་ལས་ཉོན། །འཇིག་རྟེན་ཀུན་ལས་རྣམ་རྒྱལ་བའི། །སྐུ་ནི་སངས་རྒྱས་ཀུན་བདག
14b2 ཉིད། །གང་གིས་བགོས་པར་གྱུར་པ་ལས། །ཅི་འདོད་རྙེད་པར་བྱེད་པ་མཆོག་།གལ་ཏེ་རྟོག་མེད་དེ་བྲལ་ན། །ཡེ་ཤེས་ཉིད་ནི་བླ་ན་མེད། །རྒྱལ་བའི་སྟོབས་ཀྱིས་རྟོགས་པར་བྱེད། །ཉོན་མོངས་ཀུན་ལས་རྒྱལ་བྱེད་ཅིང་། །ནད་རྣམས་ཐམས་ཅད་ཟད་བྱེད
14b3 ཅིང་། །གལ་ཏེ་ནད་མེད་ནད་བཅས་བྱེད། །དབང་དང་རེངས་དང་དགུག་པ་དང་། །བརྒྱལ་དང་གསད་དང་དབང་ཕྱུག་དང་། །ཞི་དང་སྲུང་དང་དཔལ་བྱེད་དང་། །ཕྱིར་རྒོལ་བ་རྣམས་བརླག་པ་ཡི། །ཕྲ་མོ་འགྲུབ་པ་སྨོས་ཅི་དགོས། །འཇིག་རྟེན་ལས་གྲོལ་བདེ་བའི
14b4 ལུས། །རྒྱལ་བའི་གསུང་གིས་ལེགས་འཐོབ་བོ། །སྐུ་ནི་འདིར་བརྗོད་མེད་པས་ཏེ། །སྤྱོད་ཚུལ་རྣམས་ལས་འདས་པའོ། །མིང་དང་ཚོགས་ལས་རྣམ་འདས་ན། །ཉེར་ཞི་སྤྲོས་ལས་ཤིན་ཏུ་འདས། །ཚིག་གི་ཡུལ་ནི་རྣམ་པར་བྲལ། །རྡོ་རྗེ་སྒོ་ལ་དེ་དག་ནི། །
14b5 ཅི་བཞིན་དོན་ནི་ཤེས་འགྱུར་གྱི། །གཞན་དུ་བསྐལ་པ་སྟོང་དུ་ཡང་། །ཅིས་ཀྱང་ཤེས་པར་ག་ལ་ནུས། །གལ་ཏེ་དམིགས་པ་ཟད་འདོད་པས། །མི་དམིགས་སྤྲོས་མེད་གང་ཞིག་ལ། །རང་གི་སེམས་ཉིད་གཞག་པར་བྱ། །དེ་ལ་ཐར་པས་གྲོལ་བའོ། །གལ
14b6 ཏེ་དགའ་འགྱུར་ཡིད་ཡོད་ན། །དངོས་འདི་ཤེས་པས་ཅི་སྟེ་སྟོང་། །དེ་སྟོང་སྤྲོས་དང་བྲལ་བ་ལ། །ཤེས་པ་ཉིད་ནི་ཅི་ལ་བརྟེན། །གསང་སྔགས་དྲག་པོའི་སྦྱོར་བ་འདི། །དབང་བསྐུར་གནང་བ་མེད་པ་དང་། །ཚུལ་ངན་ལང་ཚོ་ཕྲ་བ་དང་། །ང་རྒྱལ་དྲེགས་ཤིང
14b7 ཁེངས་པ་དང་། །ཐེག་པ་ཆེ་ལ་མ་མོས་ལ། །ཡི་གེ་ཙམ་ཡང་བསྟན་པ་མིན། །གལ་ཏེ་བརྒྱ་ལམ་རྨོངས་པ་འགས། །བསྟན་ན་རང་ཉིད་ཕུང་བར་བྱེད། །དེ་སྐད་དུ་ཁམས་གསུམ་ལས་རྣམ་པར་རྒྱལ་བ་ཞེས་བྱ་བའི་འོད་ཟེར་དེ་སླར་རང་གི་ཐུགས་ཀར་བསྡུས་ནས
iiif viewer powered by OpenSeadragon
