| e-texts navigator |
| Wylie |
103b1 འཁོར་རྣམས་ཀུན་ལ་རྗེས་བརྩེ་བས། །རྡོ་རྗེ་གསང་བ་ཀུན་བདག་ཉིད། །རྡོ་རྗེའི་གསུང་གིས་བཀའ་སྩལ་པ། །ེ་མའོ་སངས་རྒྱས་ཐམས་ཅད་ཀྱི། །ཆོས་ཀྱི་དབྱིངས་ནི་སྣང་བ་ཆེ། །རང་བཞིན་འོད་གསལ་ཡོངས་སུ་དག་།ནམ་མཁའི་དབྱིངས་བཞིན་དྲི་མ་མེད། །
103b2 སྐུ་གསུང་ཐུགས་ཀྱི་རྡོ་རྗེ་ཡི། །རྒྱུ་དང་མི་རྒྱུའི་དངོས་བདག་ཉིད། །དཀྱིལ་འཁོར་བསྡུས་དང་སྤྲོས་པའི་ཚུལ། །བསྐྱེད་དང་གནས་དང་སྡུད་པར་མཛད། །ཉན་ཐོས་རང་རྒྱལ་ལ་སོགས་ལས། །གསང་བ་བྱ་བ་སྤྱོད་པ་སྟེ། །ཕ་རོལ་ཕྱིན་པའི་མདོ་སྡེ་ལས། །
103b3 གསང་བ་རྣལ་འབྱོར་རྒྱུད་དུ་གྲགས། །ཕྱི་ནང་གསང་བའི་རིམ་ཤེས་པས། །གསང་ཆེན་རྣལ་འབྱོར་བླ་མེད་རྒྱུད། །ཐབས་དང་ཤེས་རབ་གཉིས་མེད་པ། །སྟོང་པ་སྙིང་རྗེ་དབྱེར་མེད་ཕྱིར། །བདེ་ཆེན་བྱང་ཆུབ་སེམས་མཆོག་གསང་། །དེ་ཉིད་དཔལ
103b4 ལྡན་འདུས་པ་སྟེ། །ཟབ་དང་རྒྱ་ཆེའི་སྙིང་པོ་ཉིད། །སངས་རྒྱས་ཀུན་གྱི་སྐུ་གསུང་ཐུགས། །གཉིས་མེད་མཉམ་པ་རོ་གཅིག་པས། །ཕྱག་རྒྱ་ཆེན་པོའི་གནས་འདི་ནི། །ཐུན་མོང་མ་ཡིན་རྒྱལ་པོ་ཆེ། །དམ་ཚིག་སྤྱོད་པའི་གནས་འདི་ཡིན། །ལེགས
103b5 སོ་ལེགས་སོ་སེམས་དཔའ་ཆེ། །ཀུན་དུ་བཟང་པོ་ལེགས་པར་ཉོན། །རྒྱུད་རྣམས་ཀུན་དུ་མ་བཤད་ཅིང་། །ཁྱད་པར་དངོས་གྲུབ་འབྱུང་བའི་གནས། །རིམ་པ་བླ་ན་མེད་པའི་ཆོས། །སྙིང་པོ་ཁྱོད་ལ་བསྟན་པར་བྱ། །ེ་མའོ་སངས་རྒྱས་ཀུན་གྱི
103b6 གསང་། །དེ་བཞིན་གཤེགས་པ་ཐམས་ཅད་ཀྱི། །བྱང་ཆུབ་སེམས་མཆོག་བླ་ན་མེད། །རང་འབྱུང་ཡེ་ཤེས་བདེ་བའི་མཆོག་།འདོད་ཆགས་ཅན་གྱི་སྐྱེས་བུ་རྣམས། །རབ་ཏུ་གདུལ་བའི་དོན་ཆེད་དུ། །གསང་བའི་སྤྱོད་པ་མཆོག་གི་ཆོས། །གཞུང་ཉུང
103b7 རྟོགས་པར་སླ་བའི་དོན། །འདུས་པ་ཆེན་པོ་རྡོ་རྗེའི་ཚིག་།རྟོགས་དཀའ་སངས་རྒྱས་སྤྱོད་ཡུལ་པས། །སྡོམ་པ་གསང་བ་རྒྱས་གདབ་ཕྱིར། །དྲི་མེད་ཡེ་ཤེས་འབྱུང་གནས་གཏེར། །ལྷན་ཅིག་སྐྱེས་པའི་ངོ་བོ་ཉིད། །དཔལ་ལྡན་སངས་རྒྱས་ཀུན་གྱི་བདག་།
iiif viewer powered by OpenSeadragon
