| e-texts navigator |
| Wylie |
281b1 ཉིན་དང་ཉིན་དུ་བྱ་བ་སྟེ། །རྟག་པར་རྒྱུན་དུ་ཟས་ཟོས་ན། །ཚེ་འདི་ཁོ་ནར་འགྲུབ་པར་འགྱུར། །རྒས་པ་མེད་ཅིང་ནད་ཀྱང་མེད། །འཆི་བ་མེད་ཅིང་འབྲས་རྣམས་མེད། །དེ་ནི་གློ་བུར་འཆི་བ་མེད། །འཚེ་བ་ཐམས་ཅད་ཟད་འགྱུར་ཞིང་། །རྨི་ལམ་ངན
281b2 ཡང་ཞི་བར་འགྱུར། །བཟང་པོ་བསྐལ་པར་གསོན་བ་སྟེ། །སེམས་ཅན་ཐམས་ཅད་དགའ་བར་སྨྲ། །མཐོང་བ་ཙམ་གྱིས་སྐུལ་བྱེད་དོ། །སྦྱིན་སྲེག་ལས་རྣམས་བཤད་བྱས་ནས། །ལྷ་མོ་མཆོད་པ་བསྟན་པར་བྱ། །དྲི་དང་ཕྲེང་སོགས་གོས་རྣམས་དང་། །
281b3 སྤོས་མེ་ཟས་དང་ལྷ་བཤོས་ཀྱིས། །དབང་པོ་གཉིས་ནི་རབ་འབྱོར་ནས། །བདག་ལ་མཆོད་པ་རྣམས་ནི་བྱ། །བདག་ནི་ཐམས་ཅད་སངས་རྒྱས་ཉིད། །སངས་རྒྱས་ཀུན་གྱི་གནས་ཡིན་ཏེ། །དེ་བས་ནན་ཏན་ཐམས་ཅད་ཀྱིས། །རྣལ་འབྱོར་པས་ནི
281b4 རྟག་ཏུ་མཆོད། །གང་ཞིག་འགའ་ཡང་བྱ་བའི་ལས། །རྣལ་འབྱོར་པ་ཡིས་མཆོད་པར་བསྒོམ། །ཟས་དང་བཏུང་བ་དེ་བཞིན་གོས། །དེ་བཞིན་དྲི་དང་ཕྲེང་ཁོ་ནས། །རིག་མ་བཞི་ཡིས་རྣམ་བརྒྱན་པའི། །བདག་ནི་ལྷ་ཉིད་བསམ་པར་བྱ། །དེ་ལྟར
281b5 བཤད་ནས་རྡོ་རྗེ་དེ། །ཅང་མི་གསུང་བར་དངོས་པོར་བཞུགས། །དེ་ནས་ལྷ་མོ་བཞི་རྣམས་ཀྱིས། །ཕྱག་གིས་ཐལ་མོ་སྦྱར་གྱུར་ཏེ། །རབ་ཏུ་ཞལ་ནི་རྣམ་བཞད་ནས། །རབ་ཏུ་དང་བའི་སེམས་ཀྱིས་ནི། །རྣམ་པར་མི་རྟོག་པ་ཐོབ་སྟེ། །ཅང་མི་གསུང
281b6 བར་བཞུགས་གྱུར་ཏོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་སྒྲོལ་མས་ཞུས་པའི་ལེའུ་སྟེ་བཞི་པའོ།། །།ཐམས་ཅད་ཀྱི་གསང་བའི་མཆོག་དམ་པ་གསང་ཆེན་ཞེས་བྱ་བའི་རྒྱུད། ལྷ་མོ་བཞིས་ཡོངས་སུ་ཞུས་པ་དཔལ་ཨོ་ཌྱན་གྱི་ཡུལ་ནས
281b7 བྱུང་བ་རྣལ་འབྱོར་མ་ཆེན་མོའི་དེ་ཁོ་ན་ཉིད་རྫོགས་། ། །།རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཀཱིརྟི་ཉིད་ཀྱིས་བསྒྱུར་ཅིང་ཞུས་ཏེ་བཤད་ནས་གཏན་ལ་ཕབ་པ།། །།
iiif viewer powered by OpenSeadragon
