| e-texts navigator |
| Wylie |
160b1 དགོས། །དེ་ཕྱིར་སངས་རྒྱས་ཐོད་པ་ཡི། །རྣལ་འབྱོར་ང་རྒྱལ་དང་བྲལ་བས། །ཤིན་ཏུ་མཉམ་པར་གཞག་པའི་སེམས། །ལྷ་རྣམས་ཀྱིས་ཀྱང་རྙེད་པར་དཀའ། །ལྗང་ཁུའི་ཆུ་ཡིས་མེ་ཞི་བྱ། །གང་གིས་བསྲེགས་ཤིང་གང་ཞིག་བསྲེགས། །གང་གི་ཞི་བ་གང་ཞི་བ། །གང་གིས
160b2 རྣམ་རྟོག་ཀུན་བཅོམ་པ། །དེ་ཡིས་སེམས་ནི་མགུ་བར་བྱེད། །སངས་རྒྱས་ཐོད་པ་ཞེས་བྱ་བའི་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་སྦྱིན་སྲེག་གི་ཆོ་གའི་ལེའུ་སྟེ་བརྒྱད་པའོ།། །།དེ་ནས་ཡང་དག་རབ་བཤད་པ། །སྤྱོད་པའི་ལེའུ་ཤིན་ཏུ་རྙེད་དཀའ་བ། །
160b3 བུད་མེད་ཤིན་ཏུ་མཆོག་གྱུར་དང་། །རྣལ་འབྱོར་གང་གིས་སྤྱོད་ཀུན་བྱེད། །དངོས་གྲུབ་བརྒྱད་དང་ཡང་དག་ལྡན། །དེ་ནས་སྤྱོད་པ་ཡང་དག་བརྩམ། །སེམས་ཅན་དངོས་གྲུབ་གང་གང་འདོད། །དེ་དེའི་དངོས་གྲུབ་རྟག་ཏུ་སྟེར། །ལག་པས་ཐོད་པ་གཟུང་བྱས་ཏེ། །གཅེར་བུ་སྐྲ
160b4 གྲོལ་གྱུར་པ་ཡི། །བརྟུལ་ཞུགས་ཅན་གྱིས་སྤྱོད་པས་འཁྱམ། །གང་དང་གང་ཚེ་དེ་ཚེ་དེར། །རྟག་ཏུ་སྤྱོད་པ་ཐམས་ཅད་བྱ། །རྒྱན་རྣམས་ཀུན་ལས་རྣམ་གྲོལ་ཞིང་། །ནམ་མཁའ་དང་མཚུངས་གྱུར་པ་ཡི། །ཤེས་རབ་ཅན་གྱིས་ཁྱིམ་ཁྱིམ་དུ། །སློང་མོ་བྱ་བར་ཐེ་ཚོམ
160b5 མེད། །ཡིད་དང་མཐུན་པ་ཀུན་བླངས་ན། །བསམ་གཏན་གནས་སུ་ཐེ་ཚོམ་མེད། །དགའ་བའི་སེམས་ཀྱིས་བསམས་ནས་ནི། །རྣལ་འབྱོར་པ་ཡི་སློང་མོ་བླང་། །ཆོས་ལ་གཞོལ་པའི་རྣལ་འབྱོར་པས། །ཐོད་པའི་སྟེང་དུ་གཞག་པ་ཡི། །རྫས་ནི་དེ་ནས་བཟའ་བར་བྱ། །རྫས
160b6 ནི་ཟོས་མ་ཐག་ཏུ་ཡང་། །ཁྱིམ་ཁྱིམ་ཐལ་ཕུང་ཤིང་དྲུང་དང་། །གང་དུ་གང་ཚེ་དེར་དེའི་ཚེ། །གང་གིས་དགའ་བའི་སེམས་དེ་ཡིས། །བློ་གྲོས་ཆེན་པོ་གཉིད་ལོག་ཕྲེང་། །འདི་ལྟའི་སྤྱོད་པའི་སྦྱོར་བ་ཡིས། །ཕྱག་རྒྱ་ཆེན་པོ་ངེས་པར་ཐོབ། །དེ་ལྟར་ཡང་རྒྱུད་ལས་གསུངས་པ། །གང
160b7 དུ་ཇི་ལྟར་དེར་དེ་ལྟར། །གང་གིས་དེ་ཡིས་སངས་རྒྱས་ཏེ། །རང་གི་རྣམ་རྟོག་དག་གིས་ཉམས། །མཐའ་དག་རང་བཞིན་རྣམ་པར་དག་།སངས་རྒྱས་ཐོད་པ་ཞེས་བྱ་བ་རྣལ་འབྱོར་མའི་རྒྱུད་བླ་ན་མེད་པ་གསང་བའི་ཡང་ཤིན་ཏུ་གསང་བ་ལས་སྤྱོད་པའི་ལེའུ་སྟེ་དགུ་པའོ།། །།དེ་ནས
iiif viewer powered by OpenSeadragon
