| e-texts navigator |
| Wylie |
282b1 ལུས་སྲུལ་གྲིབ་གནོན་སྐེམ་བྱེད་སོགས། །ནམ་མཁའ་ལྡིང་དང་དྲི་ཟ་དང་། །འབྱུང་པོ་མ་ལུས་འདུས་པ་ཀུན། །འདི་དག་སྒྲུབ་ལ་གྲོགས་བྱེད་ཅིང་། །མཐུ་སྟོབས་དཔུང་དང་ནུས་པ་ཡིས། །བསྲུང་ཞིང་བར་ཆད་ངེས་པར་སེལ། །སྒྲ་གཅན་འཛིན་པའི་རཱ་ཧུ་ལ། །འདི་ལ་སོགས་པ
282b2 ཐམས་ཅད་ལ། །ཚོགས་ཀྱི་གཏོར་མས་ཆེར་མཆོད་ན། །དཔལ་དང་རྫུ་འཕྲུལ་མྱུར་དུ་སྟེར། །འདི་དག་འཁོར་དང་བཅས་པ་ཡི། །ཉེ་དང་ཉེ་བའི་མཚན་མ་དང་། །རྟགས་དང་ཆོ་འཕྲུལ་དུ་མ་འབྱུང་། །སྐུ་གསུང་ཐུགས་ཀྱི་རྟགས་དང་ནི། །ཕྱི་ནང་གསང་བའི་རྟགས་གྱུར་པ། །
282b3 དངོས་དང་ཉམས་སྣང་རྨི་ལམ་དང་། །སྤྲུལ་པའི་ཕྲིན་ལས་ངེས་འབྱུང་བ། །གཙོ་བོ་ཉིད་དང་འཁོར་རྣམས་ཀྱི། །རིམ་པ་རྗེས་སུ་འབྲེལ་པར་འབྱུང་། །རྟགས་བྱུང་ནས་ནི་ལས་ལ་བསྐུལ། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་གཙོ་བོ་དང་འཁོར་དུ་བཅས་པ
282b4 མཆོད་པར་བསྟན་པའི་ལེའུ་སྟེ་བཅུ་དྲུག་པའོ། ། །།དེ་ནས་གཞན་ཡང་བཤད་བྱ་བ། །དཔལ་ལྡན་ནག་པོ་ཆེན་པོ་ཡི། །ཐར་བའི་གྲོང་ཁྱེར་ཉམས་དགའ་བར། །དབང་བསྐུར་ཆོ་ག་བཤད་པར་བྱ། །འདིས་ནི་བདུད་དང་བདུད་ཀྱི་ཕྱོགས། །དེ་ལས་རྒྱལ་བར་བྱེད་པ
282b5 ཡི། །ཆོ་ག་བཟང་པོ་བླ་ན་མེད། །དཀྱིལ་འཁོར་བཟང་པོ་བཞེང་བར་བྱ། །ཕུན་སུམ་ཚོགས་པའི་གནས་དག་ཏུ། །རྒྱུད་ཤེས་ཡང་དག་བླ་མ་ལ། །སྣོད་ལྡན་དག་པའི་སློབ་མ་ཡིས། །གསོལ་བ་ལན་གསུམ་གདབ་བྱས་ལ། །མཎྜལ་མེ་ཏོག་སྔོན་འགྲོ་ཡིན། །རྡོ་རྗེ་འཛིན་པ
282b6 མ་ལུས་དང་། །རྒྱལ་བ་མགོན་པོ་མ་ལུས་དང་། །དབང་ཕྱུག་དམ་པའི་དཀྱིལ་འཁོར་དང་། །དབང་བསྐུར་གནང་བར་མཛད་དུ་གསོལ། །ལན་གསུམ་བརྗོད་ནས་གནང་གྱུར་པས། །དང་པོ་བསྙེན་པ་བརྩམ་པར་བྱ། །མཚན་མ་ཉེ་བའམ་ཚུལ་ཤེས་ནས། །དེ་ནས་སྔོན་འགྲོ
282b7 བརྩམ་པར་བྱ། །དང་པོ་བགེགས་རྣམས་ཉེར་ཞི་ཡི། །ཕྲིན་ལས་མཆོད་པ་གཏོར་མ་ཡི། །ཡེ་ཤེས་ལྷ་རྣམས་མཆོད་པ་དང་། །ལུས་དང་ངག་དང་ཡིད་ཀྱིས་ནི། །སྡིག་པ་བྲལ་ཞིང་བགེགས་དབྱུང་བའི། །སྔགས་དང་བཅས་པའི་ཡུངས་ཀར་གྱིས། །མེ་སྦར་བསྲེག
iiif viewer powered by OpenSeadragon
