| e-texts navigator |
| Wylie |
244b1 @##། །རྒྱ་གར་སྐད་དུ། ཤྲཱི་ཨགྣི་མཱ་ལ་ཏནྟྲ་རཱ་ཛ། བོད་སྐད་དུ། དཔལ་མེའི་ཕྲེང་བའི་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཧ་ཧ་ཧི་ཧི་ཧེ་ཧེ་ཀྱེ། །བདག་ལ་ཁྱེད་ལ་ཞུ་བ་མཆིས། །ཤྲཱི་ནི་གང་ལགས་ཧེ་གང་ལགས། །རུ་ནི་གང་ལགས་ཀ་གང
244b2 ལགས། །དབང་བཞི་ཧེ་རུ་ཀ་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་རྣམ་པར་སྤངས། །རུ་ནི་ཚོགས་དང་བྲལ་བ་ཉིད། །ཀ་ནི་གང་དུའང་མི་གནས་སོ། །དེ་ལྟའི་དཔལ་ལྡན་ཧེ་རུ་ཀ། །རྟག་ཏུ་ལུས་དང་སེམས་ལ
244b3 གནས། །དེ་ཉིད་ལ་ཡང་རྣམ་པ་བཞི། །དབང་བཞི་གྲངས་ཀྱིས་ངེས་པ་སྟེ། །དང་པོ་བུམ་དབང་ཧེ་རུ་ཀ། །སྐུ་དང་ཕྱག་མཚན་སྣང་བའི་ཚེ། །རང་སེམས་ལས་སུ་རུང་བ་སྟེ། །དེ་ཚེ་འཇིག་རྟེན་ཐ་མལ་པའི། །རྒྱུ་དྲུག་རྐྱེན་བཞི་འབྲས་བུ་བཞི། །སྤངས་པའི་ཕྱིར་ན་ཧེ་ཞེས་བརྗོད། །
244b4 ལས་དང་ཉོན་མོངས་ཚོགས་དང་བྲལ། །དེ་ཡི་ཕྱིར་ན་རུ་ཞེས་བརྗོད། །འཇིག་རྟེན་ཐ་མལ་རྣམ་རྟོག་གི། །གཟུང་འཛིན་གང་ཡང་མི་གནས་པའི། །ཕྱིར་ན་ཀ་ཞེས་གསུངས་པའོ། །ཐབས་དང་ཤེས་རབ་ཟུང་འཇུག་པས། །གཟུང་འཛིན་གཉིས་འགགས་གཉིས་སུ་མེད། །དེ་ཡི་ཕྱིར་ན
244b5 ཤྲཱི་རུ་བརྗོད། །བསྐྱེད་པའི་རིམ་པ་ཧེ་རུ་ཀ། །ཕག་མོ་ལ་གནས་ཚོགས་དང་ལྡན། །ཟག་མེད་རྒྱུ་རྐྱེན་ཀུན་དང་ལྡན། །ཐབས་དང་ཤེས་རབ་གཉིས་ཀྱི་ཚུལ། །དེ་ནས་གསང་དབང་ཧེ་རུ་ཀ། །ཉི་ཟླ་ཕྱག་མཚན་ཡིག་འབྲུའི་ཚོགས། །བསྐྱེད་རིམ་རྒྱུ་རྐྱེན་ཀུན་སྤངས་ཏེ། །རླུང་སོགས་ལས
244b6 སུ་རུང་བས་ན། །དེ་ཡི་ཕྱིར་ན་ཧེ་ཞེས་བརྗོད། །ཕྱི་ཡི་སྦྱིན་སྲེག་གཏོར་མ་དང་། །མཆོད་པ་དཀྱིལ་འཁོར་ལ་སོགས་པའི། །ཚོགས་དང་བྲལ་བའི་ཕྱིར་ན་རུ། །བསྐྱེད་པའི་རྡོ་རྗེ་ཕག་མོ་དང་། །དམིགས་དང་ལྟ་སྤྱོད་གང་ལ་ཡང་། །མི་གནས་ཕྱིར་ན་ཀ་ཞེས་བརྗོད། །བསྐྱེད་པའི་གཟུང
244b7 འཛིན་གཉིས་མེད་མའོ། །ཕྱིར་ན་ཤྲཱི་ཞེས་གསུངས་པ་སྟེ། །རྒྱུ་རྣམས་ལམ་ལ་སོགས་དང་ལྡན། །རླུང་སོགས་ཐབས་དང་ཤེས་རབ་ཚུལ། །རླུང་སོགས་སྒྱུ་མའི་ངོ་བོར་གནས། །རྩ་རླུང་རང་བཞིན་གནས་ལ་སོགས། །ནང་གི་རྒྱུ་དང་རྐྱེན་སོགས་ལྡན། །ནང་གི་དཔལ་ལྡན་ཧེ་རུ་ཀ། །
iiif viewer powered by OpenSeadragon
