| e-texts navigator |
| Wylie |
237b1 རྒྱལ་པོ་གང་། །བཅོམ་ལྡན་འདས་ཀྱིས་བཀའ་སྩལ་པ། །དོན་གྱི་རྡོ་རྗེ་རྣམ་པ་བཞི། །དབང་བཞིའི་གྲངས་སུ་ཤེས་པར་བྱ། །རྣམ་རྟོག་འཇོམས་ཕྱིར་རྡོ་རྗེ་སྟེ། །དེ་ལ་རྣམ་པ་བཞི་ཡིན་ཏེ། །ཕྱི་ནང་གསང་བ་རབ་གསང་གཉིས། །རྩེ་གསུམ་རྩེ་གཅིག་རྩེ་ལྔ་པ། །རྩེ་དགུ་པ་ནི་ཉིད་ཡིན
237b2 ནོ། །བཅུ་གཉིས་དེ་ཉིད་རྡོ་རྗེ་སྟེ། །རྟགས་ཀྱི་རྡོ་རྗེ་བཞི་ཡིན་ནོ། །གཉིས་སུ་མེད་པ་རྩེ་གཅིག་པས། །རྣམ་རྟོག་ཐམས་ཅད་སྤངས་པ་ཡིན། །རྩེ་གསུམ་སྐུ་གསུང་ཐུགས་ཡིན་ཏེ། །འདོད་ཆགས་ཞེ་སྡང་གཏི་མུག་གསུམ། །འཇོམས་པའི་ཕྱིར་ན་བཤད་པ་ཡིན། །རྩེ་ལྔ་ཡེ་ཤེས་ལྔ
237b3 ཡི་རྟགས། །མེ་ལོང་མཉམ་ཉིད་སོ་སོར་རྟོག་།བྱ་བ་ནན་ཏན་ཆོས་དབྱིངས་ཤེས། །ཉོན་མོངས་ལྔ་ནི་སྤངས་པ་སྟེ། །ཞེ་སྡང་ང་རྒྱལ་འདོད་ཆགས་དང་། །ཕྲག་དོག་གཏི་མུག་འཇོམས་པར་བྱེད། །རྡོ་རྗེ་རྩེ་དགུ་གང་ཡིན་པ། །ཡེ་ཤེས་རྩེ་དགུ་བཤད་པ་སྟེ། །ཁམས་གསུམ་ས
237b4 དགུ་འཇོམས་པར་བྱེད། །འདོད་ཁམས་གཟུགས་ཁམས་གཟུགས་མེད་ཁམས། །ཉན་ཐོས་རང་རྒྱལ་བྱང་ཆུབ་སེམས། །རིག་འཛིན་སངས་རྒྱས་ཡེ་ཤེས་ཆེ། །ས་དགུ་ལ་ནི་གང་སྒྲིབ་པའི། །སྒྲིབ་པ་སྦྱོང་བར་བྱེད་པ་ཡི། །རྡོ་རྗེ་རྩེ་དགུར་བསྟན་པ་ཡིན། །རྡོ་རྗེ་རྩེ་མོ་བཅུ་གཉིས
237b5 པ། །འཁོར་བའི་རྟེན་འབྲེལ་བཅུ་གཉིས་ཀྱི། །སྤོང་བའི་ཡེ་ཤེས་བཅུ་གཉིས་ཡིན། །མ་རིག་པ་ལས་འདུ་བྱེད་དེ། །འདུ་བྱེད་རྐྱེན་གྱིས་རྣམ་པར་ཤེས། །མིང་དང་གཟུགས་དང་སྐྱེ་མཆེད་དྲུག་།རེག་དང་ཚོར་དང་སྲེད་དང་ལེན། །སྲིད་པ་སྐྱེ་དང་རྒ་ཤི་སྟེ། །དེ་རྣམས་སྤོང་བའི་གཉེན
237b6 པོ་སྟེ། །ཆོས་ཀྱི་ཡེ་ཤེས་མངོན་དུ་བྱས། །དེ་ལས་ཡེ་ཤེས་དྲུག་རང་བཞིན། །དེ་ལས་སྐུ་གསུང་ཐུགས་ངོ་བོ། །དེ་ལས་སྐྱེ་མཆེད་དྲུག་སངས་རྒྱས། །དེ་ལས་གཉིས་མེད་རེག་པ་ནི། །དེ་ལས་ཉམས་མྱོང་བདེ་ཆེན་པོ། །རང་རིག་དེ་ཉིད་སྲེད་པ་སྟེ། །ཆོས་ཀུན་སྟོན་བྱེད་ལེན་པ་སྟེ། །
237b7 སྲིད་པ་ལོངས་སྤྱོད་རྫོགས་སྐུ་ཡིན། །སྐྱེ་བ་སྤྲུལ་པའི་སྐུ་རུ་བཤད། །རྒ་ཤི་རྒྱུན་དང་མྱ་ངན་འདས། །འོད་གསལ་སྟོང་ཆེན་ངང་དུ་ཐིམ། །དེ་ཕྱིར་རྡོ་རྗེ་བཅུ་གཉིས་པ། །རྫས་ཀྱི་རྡོ་རྗེ་བཞི་ཡིན་ཏེ། །འབིགས་ཤིང་རྣོ་བ་ཟུར་གསུམ་སྟེ། །གྲུ་བཞིས་རྫས་རྣམས་བརྡར་བྱས་པས། །འཇམ
iiif viewer powered by OpenSeadragon
