| e-texts navigator |
| Wylie |
233b1 འཁོར་རོ། །གསང་བར་བྷ་གའི་དཀྱིལ་འཁོར་ཏེ། །བཞི་པ་རང་རིག་བྱང་ཆུབ་སེམས། །དེ་རྣམས་ལྷ་ཡི་མཚན་ཉིད་ཀྱང་། །སྐུ་མདོག་ཕྱག་མཚན་རགས་པའི་ལམ། །ཁྲོ་ཚུལ་དྲུག་ཅུ་རྩ་བཞི་དང་། །འབར་བའི་གར་དགུ་ཕྱག་རྒྱ་དྲུག་།མཚན་ཉིད་སྒྱུ་མ་ལྟ་བུ་ཡིས། །ཐ་མལ་པ་ཡི་རྣམ
233b2 རྟོག་སྤོང་། །ལུས་ཀྱི་དྲི་འཁྲུ་ཞེ་སྡང་དག་།ལོངས་སྤྱོད་རྫོགས་པའི་སྐུར་གྱུར་པའོ། །འདི་དག་ཕྱི་ཡི་དཀྱིལ་འཁོར་ཏེ། །དཀྱིལ་འཁོར་དབུས་སུ་གང་གྱུར་པ། །དེ་ཉིད་ཀྱི་ནི་དཀྱིལ་འཁོར་ཏེ། །རྡོ་རྗེ་ཅན་དང་ཕན་པ་དང་། །དེ་བཞིན་རྡོ་རྗེ་གཟི་བརྗིད་དང་། །པདྨ་གར་གྱི་དབང་ཕྱུག་དང་། །དེ
233b3 བཞིན་རྟ་བདུན་རྡོ་རྗེ་སེམས། །སྙིང་པོ་ཡོངས་གཟུང་དཀྱིལ་འཁོར་ཏེ། །དེ་དག་ཕྱི་ཡི་དཀྱིལ་འཁོར་ཡིན། །དེ་ནས་ནང་གི་དཀྱིལ་འཁོར་ཡང་། །རྣལ་གྲོལ་སྟེང་དུ་གདན་ཁྲི་རླུང་། །རང་རིག་བདག་པོའི་ལྷ་ཡིན་ནོ། །དང་པོར་དེ་ཉིད་ཤེས་བྱ་སྟེ། །རགས་པ་དང་ནི་ཕྲ་བ་དང་། །ཟུང་འཇུག་སྒོ
233b4 གསུམ་ཉི་ཁྲི་དང་། །ཆིག་སྟོང་དྲུག་བརྒྱ་རྒྱུ་བ་ཙམ། །ལས་ནི་རགས་པའི་ལམ་འཇོམས་ཤིང་། །ངག་གི་དྲི་འཁྲུ་གཏི་མུག་དག་།སྤྲུལ་པའི་སྐུ་ཡི་རྒྱུར་གྱུར་པ། །མཁའ་སྤྱོད་རླུང་དུ་ཤེས་པར་བྱ། །གང་ཞིག་སྣང་བ་བསྒོམ་པ་དང་། །དེ་བཞིན་མུན་པ་བསྒོམ་པ་དག་།ཉིན་དང་མཚན
233b5 མོར་རབ་ཏུ་གྲགས། །གནོད་མཛེས་ལྟ་སྟངས་དམན་པ་སྟེ། །ཚུལ་དེ་དེ་ལས་བཟློག་པའོ། །དང་པོར་ཡིད་བཅིང་སྣ་རྩེར་བྱ། །དེ་བཞིན་སེམས་བཅིང་རླུང་བཅིང་ཡང་། །ནམ་མཁའ་སོར་བཞི་དེ་ནས་སྟོང་། །དེ་ནས་བར་དུ་ཐིག་ལེ་ཡང་། །ཡན་ལག་དང་བཅས་ཡན་ལག་མེད། །ཤིན
233b6 ཏུ་ཡན་ལག་མེད་པ་སྟེ། །ཡན་ལག་བཅས་པ་བཅུ་གསུམ་སྟེ། །ཐབས་ལ་ཐབས་ཀྱི་སྦྱོར་བ་ནི། །བླ་མའི་ཞལ་ནས་ཤེས་པར་བྱ། །མ་ནིང་འདུས་པའི་སྒོ་རུ་གསུངས། །དེ་ནས་འོག་སྒོར་ཙཎྜཱ་ལཱི། །ཁ་སྦྱོར་དང་ནི་སྟུག་པོ་སོགས། །རྐྱེན་དང་བཅས་དང་རང་བཞིན་དང་། །བདག་སྦྱང་བ
233b7 དང་གཞན་སྦྱང་དང་། །གཏུམ་མོ་རང་བཞིན་སྦར་བ་དང་། །གཏུམ་མོ་གོ་བཟློག་སྦར་བ་དང་། །གཏུམ་མོ་རྐྱེན་གྱིས་སྤར་བ་དང་། །གཏུམ་མོ་ཞར་ལ་སྦར་བ་དང་། །གཏུམ་མོ་བྱེ་བྲག་སྦར་བ་དང་། །སྤྱི་ཡི་གཏུམ་མོ་སྦར་བ་དང་། །གྲོལ་བའི་རང་བཞིན་གཏུམ་མོ་དང་། །ཆགས
iiif viewer powered by OpenSeadragon
