| e-texts navigator |
| Wylie |
231b1 ཟླ་བ་བདུན་དང་གསུམ་དག་ནི། །འབྲིང་དུ་གསུངས་ཏེ་ཞག་བདུན་སོགས། །རྒྱུན་གཞག་མེ་ནི་ཆུང་ངུར་གསུངས། །རྒྱས་པ་ལ་སོགས་དེ་བཞིན་ཏེ། །རང་བཞིན་གདོད་ནས་གནས་པ་ཡི། །གཏུམ་མོ་ཡེ་ཤེས་མེ་རང་བཞིན། །འདི་ནི་རྒྱུན་གཞག་ཆེན་པོའི་མེ། །ཐོག་མཐའ་མེད་པར
231b2 གནས་པའི་ཕྱིར། །དམ་ཚིག་ཉམས་པའི་བུད་ཤིང་སོགས། །ཡེ་ཤེས་མེ་ཡི་བུད་ཤིང་ཡིན། །མན་ངག་ཅན་གྱིས་བསྲེགས་བྱས་ན། །ཉམས་པའི་ཤིང་སོགས་འཚིག་པར་ངེས། །དགང་གཟར་ལ་སོགས་དེ་བཞིན་ཏེ། །རྒྱས་པ་ལ་སོགས་དེ་དང་འདྲ། །རྒྱུད་འདི་གཏད་ཀྱིས་ལེགས
231b3 པར་ཟུང་། །ཐམས་ཅད་དགའ་ཞིང་མགུ་བར་གྱུར། །དཔལ་རྡོ་རྗེ་མཁའ་འགྲོ་གསང་བའི་རྒྱུད་ཀྱི་རྒྱལ་པོ་རྫོགས་སོ།། །།རྒྱ་གར་གྱི་མཁན་པོ་ག་ཡ་དྷ་ར་དང་། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། །།
231b4 @##། །རྒྱ་གར་སྐད་དུ། ཤྲཱི་ཛྭ་ལ་ཨགྣི་གུ་ཧྱ་ཏནྟྲ་རཱ་ཛ། བོད་སྐད་དུ། དཔལ་གསང་བ་མེ་འབར་བའི་རྒྱུད་ཀྱི་རྒྱལ་པོ། བཅོམ་ལྡན་འདས་བདེ་བ་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ
231b5 ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་སྙོམས་པར་བཞུགས་སོ། །དེའི་ཚེ་འཁོར་འདུས་པའི་ནང་ན་རྡོ་རྗེ་ཕག་མོས་གསོལ་པ། རྣལ་འབྱོར་གང་ལགས་འཕོ་བ་གང་། །འཆི་བ་གང་ལགས་ཤི་བ་གང་། །རོ་ནི་གང་ལགས་རོ་ཆེན་གང་། །དེ་བཞིན་ཤི་བ་ཆེན
231b6 པོ་གང་། །ཐལ་བ་གང་ལགས་ཐལ་ཆེན་གང་། །ཚ་ཚ་གང་ལགས་ཚ་ཚ་ཡི། །ཆེན་པོ་གང་ལགས་གནས་ནི་གང་། །བཅོམ་ལྡན་འདས་ཀྱིས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཐབས་དང་ཤེས་རབ་སྙོམས་འཇུག་ལ། །རྣལ་འབྱོར་ཞེས་ནི་གསུངས་པ
231b7 ཡིན། །དུས་མིན་ལྷ་ནི་གསོད་པ་སྟེ། །དང་པོར་འཕོ་བའི་རྟགས་དང་ཡང་། །དུས་ཚོད་ངེས་པར་ཤེས་བྱ་སྟེ། །བར་ཆད་མེད་པའི་ཏིང་འཛིན་གྱིས། །འཁྲུལ་འཁོར་བཅས་ཏེ་ཁྱད་པར་གྱིས། །འབྲས་བུ་འབྱུང་བར་འཕོ་བར་ངེས། །ཁམས་དང་འབྱུང་བ་སོ་སོར་ཐིམ། །སྲོག་གི
iiif viewer powered by OpenSeadragon
