| e-texts navigator |
| Wylie |
229a1 པ་ནི། །འབྲས་བུ་མེད་ཅིང་བརླག་པར་འགྱུར། །དེ་བས་འབད་དེ་ནན་ཏན་བྱ། །དཔལ་ཉི་མའི་འཁོར་ལོའི་རྒྱུད་ཀྱི་རྒྱལ་པོ་རྫོགས་སོ།། །།རྒྱ་གར་གྱི་མཁན་པོ་ག་ཡ་དྷ་ར་དང་། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང
229a2 ཞུས་ཏེ་གཏན་ལ་ཕབ་པ། ། @##། །རྒྱ་གར་སྐད་དུ། ཤྲཱི་ཛྙཱ་ན་རཱ་ཛ་ཏནྟྲ་རཱ་ཛ། བོད་སྐད་དུ། དཔལ་ཡེ་ཤེས་རྒྱལ་པོའི་རྒྱུད་ཀྱི་རྒྱལ་པོ། དཔལ་བདེ་བ་ཆེན་པོ་ལ་ཕྱག་འཚལ་ལོ། །ཀྱེ་མ་སངས་རྒྱས་ཀྱེ་སངས་རྒྱས། །
229a3 ཀྱེ་མ་སངས་རྒྱས་མཛད་པ་ལེགས། །གང་ཕྱིར་སེམས་ཅན་ཐམས་ཅད་ཀྱིས། །མྱ་ངན་འདས་པ་ཐོབ་བྱའི་ཕྱིར། །དད་དང་བརྩོན་འགྲུས་རྫོགས་བྱས་ཏེ། །བླ་མའི་རྗེས་སུ་འཇུག་པར་བྱ། །རང་རིག་གཉིས་སུ་མེད་པ་ལ། །གཞན་རིག་གཉིས་སུ་འཛིན་པས་འཁྲུལ། །གཟོད་ནས
229a4 མ་སྐྱེས་མ་གྲུབ་ལ། །སྐྱེ་དང་གྲུབ་པར་འཛིན་པས་འཁྲུལ། །དངོས་པོ་རོ་མཉམ་གྱུར་པ་ལ། །དམན་དང་གྱ་ནོམ་འཛིན་པས་འཁྲུལ། །འཁོར་བ་ཡོངས་སུ་ཤེས་པ་ཉིད། །མྱ་ངན་འདས་པར་བརྗོད་པ་ལ། །སངས་རྒྱས་སེམས་ཅན་རྟོག་པས་འཁྲུལ། །རང་བཞིན་ལྷུན་གྱིས་གྲུབ
229a5 པ་ལ། །རྒྱུ་དང་རྐྱེན་གྱིས་སྐྱེ་བས་འཁྲུལ། །བརྡ་དང་ཐ་སྙད་བྲལ་བ་ལ། །བློ་ཡི་སྤྱོད་ཡུལ་བྱེད་པས་འཁྲུལ། །མཐའ་བྲལ་དབུ་མར་གནས་པ་ལ། །རྟག་དང་ཆད་པར་འཛིན་པས་འཁྲུལ། །ཤེས་བརྗོད་ཡུལ་ལས་འདས་པ་ལ། །བདག་དང་བདག་གིར་འཛིན་པས་འཁྲུལ། །
229a6 དངོས་པོ་མཚན་མ་ལ་སོགས་པའི། །རྣམ་རྟོག་ཀུན་གྱིས་སྟོང་པ་ལ། །དངོས་པོར་རྗེས་སུ་འཛིན་པས་འཁྲུལ། །རང་ཉིད་གཉིས་སུ་མེད་པ་ལ། །བདེན་པ་གཉིས་སུ་འཛིན་པས་འཁྲུལ། །གདུལ་བྱ་སྣ་ཚོགས་འདུལ་བ་ཡི། །ཐེག་པ་དུ་མའི་གོང་འོག་ལ། །སྒྲོ་དང་སྐུར་པ་འདེབས་པས
229a7 འཁྲུལ། །སེམས་ཅན་འཁྲུལ་པ་སྣ་ཚོགས་ཀྱིས། །ལས་ཀྱི་རྣམ་སྨིན་ལ་སོགས་ལ། །ལྟ་བས་སྐུར་པ་འདེབས་པས་འཁྲུལ། །རང་རིག་གཟོད་ནས་འོད་གསལ་ལ། །སྐུ་མདོག་ཕྱག་མཚན་ལ་སོགས་པ། །རྡོ་རྗེ་འཛིན་པར་འདོད་པས་འཁྲུལ། །འཁྲུལ་བ་དང་ནི་འཁྲུལ
iiif viewer powered by OpenSeadragon
