| e-texts navigator |
| Wylie |
132b1 འགྲམ་དུ་འམ། །ལམ་གྱི་བཞི་མདོར་རབ་བསྒྲུབ་ཅིང་། །མཆོག་རྣམས་ཐམས་ཅད་བསྒྲུབ་པར་བྱ། །རི་བོ་ཕུག་དང་ནགས་ཚལ་དང་། །དེ་བཞིན་ཤིང་གཅིག་ཏུ་བརྗོད་པར། །མཚན་མོ་འཇིགས་པའི་གཟུགས་ཀྱིས་རབ་བསྒྲུབས་ནས། །རྣལ་འབྱོར་བླ་ན་མེད་པ་སྐྱེ་བར་འགྱུར། །དེར་ནི་རྟག
132b2 ཏུ་མཁའ་འགྲོ་མ་རྣམས་དང་། །ལྷན་ཅིག་འདུག་པར་སྒྲུབ་པོ་ཐེ་ཚོམ་མེད། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་ལྔ་པའོ།། །།སྔར་སྤྱོད་ཆོ་གའི་རིམ་པ་རྣམས། །རབ་ཏུ་བཤད་ཀྱིས་ལྷ་མོ་ཉོན། །དཀའ་ཐུབ་རྣལ་འབྱོར་པས་མི་བྱ། །གཞན་པ་ཀུན་དང་གནས་མི་བྱ། །ལུས་ལ
132b3 མཆོག་ཏུའང་མཆོད་མི་བྱ། །བརྙས་པ་ཉིད་དུའང་མི་བྱ་སྟེ། །སྣ་ཚོགས་རང་བཞིན་མེད་མཉམ་ལྟ། །གསེག་མ་སོལ་བས་བསྒོས་བྱ་ཞིང་། །ཐལ་བས་འབད་དེ་བརྒྱན་པར་བྱ། །བཟའ་དང་བཟའ་མིན་ལ་སོགས་ལ། །སྔགས་པས་ཀུན་དུ་རྟོག་མི་བྱ། །མེ་ཏོག་རྙེད་རྙེད་ཐམས་ཅད་ཀྱིས། །རྟག
132b4 ཏུ་ཕྲེང་བ་ཉིད་དུ་བྱ། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་དྲུག་པའོ།། །།དེ་ནས་གོ་ཆ་རྣམས་ཀྱི་ནི། །ལས་ཀྱི་ཚོགས་རྣམས་བཤད་བྱ་བ། །འཇིག་རྟེན་གསུམ་ན་བཅུད་ཡོད་གང་། །སྨྱོ་བྱེད་འབྲས་སྐྱེས་ལ་བསྲེས་ན། །དེ་ལ་སྐད་ཅིག་གིས་ཀུན་གྲུབ། །གོ་ཆ་བཟླས་བཞིན་འགྲོ
132b5 བྱེད་ན། །ལྷ་རྣམས་ཀྱིས་ཀྱང་མི་མཐོང་ཞིང་། །ཆོམ་རྐུན་སྟག་སོགས་ཀྱིས་མི་འཇིགས། །གོ་ཆ་བཟློས་བཞིན་དུ་རྒྱལ་པོའི་གྲོང་དུ་བྱིན་གྱིས་བརླབས་ཏེ། ཞུགས་ན་མི་མཐོང་བར་ཡང་འདོད་པ་དེ་བླངས་ནས་སླར་ཡོད་པ་དང་། གོ་ཆ་བཟློས་བཞིན་བཟླས་པས་གང་ལ་རེག་ན་དེ་མདུད་བཞིན་དུ
132b6 རེངས་པར་འགྱུར་རོ། །སུམ་ཅུ་རྩ་གསུམ་པས་ཀྱང་མི་གཡོས་སོ། །སྔགས་བཟླས་པའི་རྐང་པས་བསྣུན་ན་ནི་སླར་གྲོལ་བར་འགྱུར་རོ། །དཔལ་རྡོ་རྗེ་མཁའ་འགྲོའི་རྒྱུད་ཆེན་པོ་ལས་ལེའུ་བདུན་པའོ།། །།དེ་ནས་རྩ་བའི་སྔགས་ཀྱི་ལས་བཤད་དེ། ཤ་ལྔ་ལས་གཟུགས་བརྙན་གྱི
132b7 རབ་ཏུ་སྦྱོར་བ་ལས་ལས་ཐམས་ཅད་བྱེད་པ་ཡིན་ཏེ། ལྷ་དང་ལྷ་མ་ཡིན་དང་། ཀླུ་དང་གནོད་སྦྱིན་ཐམས་ཅད་དང་། དྲི་ཟ་ཐམས་ཅད་དང་། ལྷའི་སྐྱེ་གནས་ཐམས་ཅད་དྲན་པ་ཉིད་ཀྱིས་མཆིའོ། །སྤྲིན་རྣམས་སྐྲག་པར་བྱེད་པ་དང་། ཆར་འབེབས་པར་བྱེད་པ་དང་། ཟློག་པར་བྱེད་པ་དང་། རྒྱ་མཚོ
iiif viewer powered by OpenSeadragon
