| e-texts navigator |
| Wylie |
24a1 གཞོན་ནུ་མ་རྒྱན་ཐམས་ཅད་ཀྱིས་བརྒྱན་པར་བྱས་པ་རྣམས་ཀྱང་སྦྱིན་པ་ནི་གཏོང་། བསོད་ནམས་ནི་བྱེད་དོ། །གོས་ཁ་དོག་སྣ་ཚོགས་པ་ཡུལ་སྣ་ཚོགས་པ་ལས་བྱུང་བ་རྣམ་པ་སྣ་ཚོགས་པ་ལ་འདི་ལྟ་སྟེ། དར་ལ་དང་། རྒྱའི་དར་དང་། རིན་ཆེ་བའི
24a2 གོས་དང་། དུ་གུ་ལ་དང་། མྲི་གཱ་པཱ་ན་དང་། བག་ལེ་པ་དང་། ལ་བ་དང་། རིན་པོ་ཆེ་དང་། གསེར་དང་། གོས་གསེར་གྱི་རྒྱན་ཅན་དང་། ཀ་ཤི་ཀའི་དར་དང་། གོས་དར་ལ་སོགས་པ་རྣམས་ཀྱང་སྦྱིན་པ་ནི་གཏོང་། བསོད་ནམས་ནི་བྱེད་དོ། །དགེ་སློང་དག་རྒྱལ
24a3 པོ་ཟླ་འོད་ཀྱིས་སྦྱིན་པ་ཇི་སྙེད་ཀྱིས་འཛམ་བུའི་གླིང་པའི་མི་ཐམས་ཅད་ཕྱུག་པ་དང་། ནོར་ཆེ་བ་དང་། ལོངས་སྤྱོད་ཆེ་བར་གྱུར་པ་དེ་སྙེད་རབ་ཏུ་གཏོང་ངོ་། །དགེ་སློང་དག་རྒྱལ་པོ་ཟླ་འོད་ཀྱིས་གང་གླང་པོ་དང་། རྟ་དང་། ཤིང་རྟ་དང་། གདུགས་ལ་སོགས་པའི་སྦྱིན་པ་ཇི
24a4 སྙེད་ཀྱིས་འཛམ་བུའི་གླིང་འདི་ན་མི་གཅིག་ཀྱང་རྐང་གིས་འགྲོ་བ་མེད་པ་དེ་སྙེད་རབ་ཏུ་གཏོང་སྟེ། འཛམ་བུའི་གླིང་པའི་མི་ཐམས་ཅད་ཀྱང་གླང་པོའི་རྒྱབ་དང་། རྟ་བཞི་དང་ལྡན་པའི་ཤིང་རྟ་སྟེང་ནས་གསེར་དང་དངུལ་གྱི་གདུགས་འཛིན་པ་དང་ལྡན་པ་དང་། སྐྱེད་མོས
24a5 ཚལ་ནས་སྐྱེད་མོས་ཚལ་དང་། ཡུལ་འཁོར་ནས་ཡུལ་འཁོར་དང་། གྲོང་ཁྱེར་ནས་གྲོང་ཁྱེར་དུ་རྗེས་སུ་འགྲོ་བར་གྱུར་ཏོ། །དགེ་སློང་དག་དེ་ནས་ཡང་རྒྱལ་པོ་ཟླ་འོད་འདི་ལྟར་སེམས་པར་གྱུར་ཏེ། ངས་སྦྱིན་པ་འདི་ཙམ་ཞིག་བྱིན་པ་ཙམ་གྱིས་ཅི་ཞིག་བྱ་སྟེ། གོས་དང
24a6 རྒྱན་དང་། ཆ་བཞག་རྣམས་ང་ཉིད་ཅི་འདྲ་བ་འཛམ་བུའི་གླིང་པའི་མི་རྣམས་ཀྱང་དེ་དང་འདྲ་བར་རབ་ཏུ་བྱིན་ནི་འཛམ་བུའི་གླིང་པའི་མི་ཐམས་ཅད་རྒྱལ་པོའི་རྩེ་འཇོས་རྩེ་ཞིང་རོལ་པར་འགྱུར་རོ། །དེ་ནས་རྒྱལ་པོ་ཟླ་འོད་ཀྱིས་འཛམ་བུའི་གླིང་པའི་མི་ཐམས་ཅད་ལ་ཅོད་པན
24a7 དང་། དར་དང་། གོས་དང་། རྒྱན་དང་། ཆ་བཞག་རྣམས་བྱིན་པ་ནི་འདི་ལྟ་སྟེ། མགུལ་གདུབ་དང་། གདུ་བུ་དང་། དཔུང་རྒྱན་དང་། དོ་ཤལ་དང་། སེ་མོ་དོ་དང་། མུ་ཏིག་གི་ཆུན་འཕྱང་དང་། རྒྱལ་པོ་ལ་འོས་པ་རྣམས་སྦྱིན་པ་རབ་ཏུ་བྱིན་ནོ། །དགེ་སློང་དག་རྒྱལ་པོ་ཟླ
iiif viewer powered by OpenSeadragon
