| e-texts navigator |
| Wylie |
216b1 སོགས་པ་རི་ཆེན་པོ་དང་། རི་དང་། ནགས་ཚལ་དང་། སྨན་ལྗོངས། རི་སུལ། གྲག་གྲོག་ཀུན་ལ་ཡང་སྣང་བར་མཉམ་སྟེ། ལག་མཐིལ་དང་འདྲ་བར་གླིང་བཞི་ཅར་སྣང་བས་གསལ་བར་གྱུར། འོད་ཟེར་དེ་དག་ལས་སངས་རྒྱས་ཀྱི་སྐུ་གཟུགས་ཁ་དོག་དང་དབྱིབས་སྣ་ཚོགས
216b2 འོད་དང་བཅས་པ་ཕལ་པོ་ཆེ་བྱུང་བ། བྱང་ཆུབ་སེམས་དཔའ་དང་། ལྷ་དང་། ཀླུ་ལ་སོགས་པ་སེམས་ཅན་མང་པོ་ཀུན་གྱིས་མཐོང་སྟེ་ངོ་མཚར་དུ་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་ལ་བ་ཤྲ་ཝ་ན་ལ་སོགས་པ་རྒྱལ་པོ་ཆེན་པོ་བཞིས་གསོལ་པ། འོད་ཟེར་འདི་ལྟ་བུ་དེ་ཅིའི
216b3 དོན་དུ་མཛད་པ་ལགས་ཞེས་ཞུས་པ་ལས། བཅོམ་ལྡན་འདས་ཀྱིས་བཀའ་སྩལ་པ། ང་མྱ་ངན་ལས་འདས་པའི་འོག་ཏུ་གླིང་བཞིར་ངས་གསུངས་པའི་དམ་པའི་ཆོས་ཀྱི་གསུང་རབ་དང་། རིང་བསྲེལ་དང་། གཟུགས་བརྙན་འདི་ལྟ་བུ་དག་འབྱུང་སྟེ། འདི་ཁྱེད་ཀྱི་ལག་ཏུ་གཏད་ཀྱིས
216b4 སྲུངས་ཤིག་། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཟླ་བའི་སྙིང་པོས་གསོལ་པ། བཅོམ་ལྡན་འདས་འདི་ལྟ་བུའི་ཐུགས་རྗེ་ཆེན་པོས་བཅོམ་ལྡན་འདས་མྱ་ངན་ལས་འདས་པའི་འོག་ཏུ་དམ་པའི་ཆོས་རྒྱལ་པོ་ཆེན་པོ་དག་ལ་གཏད་པ་ཤིན་ཏུ་ངོ་མཚར་ཏོ། །སྔ་མ་འདས
216b5 པའི་སངས་རྒྱས་མྱ་ངན་ལས་འདས་ནས་དགུང་ལོ་དུ་ན་ལགས་ནས་དམ་པའི་ཆོས་ཀྱི་གཟུགས་བརྙན་ནུབ་ན། བཅོམ་ལྡན་འདས་ཤཱཀྱ་ཐུབ་པ་མྱ་ངན་ལས་འདས་པའི་འོག་ཏུ་དམ་པའི་ཆོས་ཇི་ཙམ་གྱི་བར་དུ་གནས་པར་འགྱུར། དེ་ནས་བཅོམ་ལྡན་འདས་ཀྱིས་བཀའ་སྩལ་པ། འདི
216b6 ལྟ་བུའི་ཐེ་ཚོམ་ཞུས་པ་ལེགས་སོ། །ལེགས་པར་ཉོན་ཅིག་དང་། ངས་བཤད་པར་བྱའོ། །ང་མྱ་ངན་ལས་འདས་ནས་དམ་པའི་ཆོས་ཀྱི་གཟུགས་བརྙན་ལོ་ཉིས་སྟོང་དུ་གནས་པར་འགྱུར་རོ། །བྱང་ཆུབ་སེམས་དཔའ་ཟླ་བའི་སྙིང་པོས་གསོལ་པ། བཅོམ་ལྡན་འདས་དམ་པའི་ཆོས
216b7 འདི་ཐ་མར་ཇི་ལྟར་ནུབ་པར་འགྱུར། རྒྱུ་ཅི་ལས་ཉམས། སུས་མ་མཆིས་པར་བགྱིད། བཀའ་སྩལ་པ། ང་མྱ་ངན་ལས་འདས་པའི་འོག་ཏུ་ལོ་ལྔ་བརྒྱའི་བར་དུ་ངའི་བསྟན་པ་ལ་སྤྱོད་པའི་སེམས་ཅན་རྣམ་པར་གྲོལ་བ་མང་དུ་འགྱུར་རོ། །དེ་ནས་ལོ་ལྔ་བརྒྱའི་བར་དུ་ཏིང་ངེ་འཛིན་ལ་སྤྱོད་པ
iiif viewer powered by OpenSeadragon
