| e-texts navigator |
| Wylie |
289a1 སྲིད་ཀྱི་བར་དུ་སེམས་ཅན་དམྱལ་བར་མི་ལྟུང་ངོ་། །ད་ང་དང་ཕྲད་ནས་རྡུལ་དང་དྲི་མ་ཀུན་དང་བྲལ་ནས་དགྲ་བཅོམ་པར་གྱུར་ཏོ། །དེའི་ཚེ་དེའི་དུས་ན་རྒན་མོ་དེ་ནི་བུ་མོ་སུ་མ་ན་ཡིན་ནོ། །མི་གཞོན་ནུ་བཅུ་ནི་དགྲ་བཅོམ་པ་འདི་བཅུ་ཡིན་ནོ། །བཅོམ་ལྡན་འདས
289a2 ཀྱིས་དེ་སྐད་ཅེས་གསུངས་ནས། འཁོར་མང་པོ་རྣམས་ལ་ལ་ནི་རྒྱུན་དུ་ཞུགས་པ་དང་། ལན་ཅིག་ཕྱིར་ལྡོག་པ་དང་། ཕྱིར་མི་ལྡོག་པ་དང་། དགྲ་བཅོམ་པ་ཐོབ་བོ། །ཁ་ཅིག་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་ཕྱིར་མི་ལྡོག་པའི་ས་ལ་གནས་པར་གྱུར་ཏེ།
289a3 སངས་རྒྱས་ཀྱིས་གསུངས་པ་ལ་རྗེས་སུ་ཡི་རངས་ནས་མངོན་པར་དགའོ། །བུ་མོ་སུ་མ་ནའི་བུ་བཅུའི་ལེའུ་སྟེ་བཞི་བཅུ་དྲུག་པའོ།། །།འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ
289a4 མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་དེ་ན་ཀུན་ཏུ་རྒྱུ་ཨུ་པ་གུབ་ཏེ་ཞེས་བྱ་བ་ཡིད་གཞུངས་ཤིང་སེམས་གསལ་བ་ནི་འདས་པ་དང་། མ་བྱོན་པ་དང་། ད་ལྟར་བྱུང་བ་ལ་མཁས་པ་ཞིག་སྟེ། བཅོམ་ལྡན་འདས་གང་ན་བ་དེར་སོང་ནས་རབ་ཏུ་འབྱུང
289a5 ངོ་ཞེས་བཅོམ་ལྡན་འདས་ལ་གསོལ་ཏོ། །གལ་ཏེ་བདག་རབ་ཏུ་བྱུང་ནས་ཤེས་རབ་དང་། སྤོབས་པ་ཤཱ་རིའི་བུ་དང་མཉམ་ན་རབ་ཏུ་བྱུང་གི་དེ་ཙམ་མི་ཕོད་ན་ཕྱིར་ཁྱིམ་དུ་མཆིའོ་ཞེས་གསོལ་པ་དང་། བཅོམ་ལྡན་འདས་ཀྱིས་དེ་ཙམ་མི་ཕོད་དོ་ཞེས་བཀའ་སྩལ་ནས། ཀུན་ཏུ་རྒྱུ
289a6 དེ་རབ་ཏུ་འབྱུང་དུ་མ་བཏུབ་ནས་ཕྱིར་ཁྱིམ་དུ་སོང་ངོ་། །བཅོམ་ལྡན་འདས་ཀྱིས་དུས་གཞན་ཞིག་ན་འཁོར་མང་པོ་ལ་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་ནས་ལོ་བརྒྱ་ཕྲག་ལོན་པ་དང་། བྲམ་ཟེ་འདི་རབ་ཏུ་བྱུང་ནས་མངོན་པར་ཤེས་པ་དྲུག་དང་ཤེས་རབ་ཏུ་ལྡན་ཏེ།
289a7 སེམས་ཅན་རྡུལ་སྙེད་ཅིག་གི་དོན་བྱེད་པར་འགྱུར་རོ། །བཅོམ་ལྡན་འདས་མྱ་ངན་ལས་འདས་ཀར་ཡང་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་ནས་མདོ་སྡེའི་སྡེ་སྣོད་ཐམས་ཅད་ཁྱོད་ལ་གཏད་ཀྱིས་གཟུངས་སུ་ཟུང་ལ་རྒྱས་པར་བྱོས་ཤིག་ཅེས་བཀའ་སྩལ་ནས།
iiif viewer powered by OpenSeadragon
