| e-texts navigator |
| Wylie |
288a1 བུ་རྣམས་ཀྱིས་སངས་རྒྱས་ཞེས་བྱ་བ་ནི་གང་ཡིན་སྨྲོས་ཤིག་ཅེས་སྨྲས་སོ། །ཅི་ཁྱོད་ཀྱིས་མ་ཐོས་སམ་རྒྱལ་པོ་ཡབ་ཟས་གཙང་མའི་སྲས་སྐུ་མཛེས་ཤིང་བཟང་བ་འཁོར་ལོས་སྒྱུར་བའི་རྒྱལ་པོར་གྱུར་པ་ལས། རྒ་བ་དང་། ན་བ་དང་། འཆི་བ་མི
288a2 འདོད་དེ་རབ་ཏུ་བྱུང་ནས། ལམ་བསྒོམས་པས་སྨོན་ལམ་བཞིན་དུ་གྲུབ་སྟེ། བླ་ན་མེད་པའི་འབྲས་བུ་ཐོབ་ནས་སྐུ་ཁྲུ་བཅུ་དྲུག་པ་མཚན་དང་དཔེ་བྱད་ཀྱིས་ཡོངས་སུ་བརྒྱན་པ། རིག་པ་གསུམ་དང་མངོན་པར་ཤེས་པ་དྲུག་དང་ལྡན་པ། སྔ་མ་འདས་པ་ཤེས་པ་ཡང་མཐའ་མེད་ལ་ཕྱིས
288a3 འབྱུང་བ་ཤེས་པ་ཡང་མཐའ་མེད་དེ། དུས་གསུམ་ནི་ལག་མཐིལ་ན་འབྲས་བུ་བཞག་པ་དང་འདྲའོ་ཞེས་སྨྲས་ནས། བུ་རྣམས་ཀྱིས་ཐོས་པ་དང་། རབ་ཏུ་དགའ་སྟེ། སངས་རྒྱས་དེ་ད་ལྟར་འདི་ནས་ཉེ་རིང་ཅི་ཙམ་ན་བཞུགས། མཐོང་བར་རུང་ངམ་ཞེས་སྨྲས་པ་དང་། མས་སྨྲས་པ།
288a4 ད་ལྟར་མཉན་ཡོད་ན་བཞུགས་ཏེ་མཐོང་དུ་རུང་ངོ་། །བུ་རྣམས་ཀྱིས་སྨྲས་པ། འོ་ན་བདག་ཅག་སངས་རྒྱས་བལྟར་འགྲོའོ་ཞེས་གསོལ་པ་དང་། བུའི་མས་ཀྱང་གནང་ནས་བུ་རྣམས་ཅིག་ཅར་མཉན་ཡོད་དུ་དོང་ངོ་། །དེར་ཕྱིན་པ་དང་། མེས་པོ་མགོན་མེད་ཟས་སྦྱིན་གྱིས་མཐོང
288a5 ནས། རབ་ཏུ་དགའ་མགུ་རངས་ཏེ། ཚ་བོ་རྣམས་ཁྲིད་དེ་རྒྱལ་བུ་རྒྱལ་བྱེད་ཀྱི་ཚལ་དུ་དེ་བཞིན་གཤེགས་པ་བལྟར་དོང་ངོ་། །བྱིས་པ་དེ་དག་གིས་སངས་རྒྱས་ཀྱི་མཚན་སྔོན་ཐོས་པ་བས་སྟོང་འགྱུར་གྱིས་ལྷག་པར་བཟང་བ་མཐོང་ནས་ཤིན་ཏུ་དགའ་བར་གྱུར་ཏོ། །དེ་ནས་བཅོམ
288a6 ལྡན་འདས་ཀྱིས་ཅི་རིགས་པར་ཆོས་བསྟན་པས། ཁྱེའུ་བཅུ་ཆར་དུས་གཅིག་ཏུ་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ནས། སངས་རྒྱས་ལ་རབ་ཏུ་བྱུང་བར་གསོལ་པ་དང་། བཅོམ་ལྡན་འདས་ཀྱིས་བྱིས་པ་རྣམས་ཁྱོད་ཀྱི་ཕ་མས་གནང་ངམ་ཞེས་བཀའ་སྩལ་པ་ན།
288a7 བདག་ཅག་གིས་ད་དུང་མ་གསོལ་ལོ་ཞེས་གསོལ་པ་དང་། ཕ་མས་མ་གནང་གི་བར་དུ་རབ་ཏུ་ཕྱུང་དུ་མི་གནང་ངོ་ཞེས་བཀའ་སྩལ་ཏོ། །དེ་ནས་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ནི་འདི་དག་གི་མེས་པོ་ལགས་ཏེ། བདག་གི
iiif viewer powered by OpenSeadragon
