| e-texts navigator |
| Wylie |
280b1 སྤྱོད་པ་ལ་འདུ་འཛི་མང་བར་གྱུར་ཏོ། །དགེ་སློང་དེ་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དེའི་ཕྱིར་དགེ་སློང་གླང་པོ་སྐྱོང་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱི་གླང་པོ་ཆེ་ལ་བལྟ་བས་མང་པོ་མི་དབེན་པར་གྱུར་གྱིས། མྱུར
280b2 དུ་སྤོང་ཤིག་ཅེས་བཀའ་སྩལ་པ་དང་། གླང་པོ་སྐྱོང་གིས་གསོལ་པ། བདག་གིས་ཀྱང་ཐོག་མ་ནས་སྤངས་པར་བསམས་ན། འགྲོར་མ་བཏུབ་བོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་གླང་པོ་ཆེ་ལ་ལན་གསུམ་གྱི་བར་དུ་འདི་སྐད་ཅེས་སྨྲོས
280b3 ཤིག་། ང་ནི་སྐྱེ་བའི་ཕྱོགས་ཟད་དེ་ད་ཕྱིན་ཅད་མི་དགོས་ཀྱི་སྨྲོས་ཤིག་དང་མེད་པར་འགྱུར་རོ། །གླང་པོ་སྐྱོང་གིས་ཀྱང་བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་གླང་པོ་ཆེ་ལ་མི་དགོས་ཞེས་ལན་གསུམ་གྱི་བར་དུ་སྨྲས་པས་གསེར་གྱི་གླང་པོ་ཆེ་ཡང་སའི་ནང་དུ་ནུབ་བོ། །
280b4 དགེ་སློང་དག་ངོ་མཚར་དུ་གྱུར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་གླང་པོ་སྐྱོང་འདིས་སྔོན་བསོད་ནམས་ཀྱི་ཞིང་ཅི་ལྟ་བུ་ལ་དགེ་བའི་རྩ་བ་ཅི་ལྟ་བུ་ཞིག་བསྐྱེད་ན་འདི་ལྟ་བུའི་འབྲས་བུ་རྣམ་པར་སྨིན་པར་གྱུར། བཅོམ་ལྡན་འདས་ཀྱིས
280b5 ཀུན་དགའ་བོ་དང་དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །སོ་སོའི་སྐྱེ་བོ་གང་ཡང་རུང་བ་དཀོན་མཆོག་གསུམ་གྱི་བསོད་ནམས་ཀྱི་ཞིང་ལ། དགེ་བའི་ས་བོན་ཅུང་ཟད་ཅིག་བཏབ་ན་འབྲས་བུ་ཚད་མེད་པ་ཐོབ་པར་འགྱུར་རོ། །སྔོན་འདས་པའི་དུས
280b6 ན་སངས་རྒྱས་འོད་སྲུང་འཇིག་རྟེན་དུ་གཤེགས་པའི་ཚེ་མི་ཚེ་ནི་ལོ་སྟོང་ཕྲག་ཉི་ཤུའི་བར་དུ་གནས་སོ། །སངས་རྒྱས་དེ་སེམས་ཅན་གྱི་དོན་བྱས་ནས། མྱ་ངན་ལས་འདས་པའི་འོག་ཏུ་རིང་བསྲེལ་ལ་མཆོད་རྟེན་མང་དུ་བྱས་སོ། །དེའི་ཚེ་མཆོད་རྟེན་གཅིག་གི
280b7 ནང་ན་བྱང་ཆུབ་སེམས་དཔའ་ཐོག་མ་དགའ་ལྡན་གྱི་གནས་ནས་བབས་ཏེ། ཡུམ་གྱི་ལྷུམས་སུ་གཤེགས་པའི་ཚེ། བཅིབས་པ་གླང་པོ་ཆེ་དེའི་མཆོད་རྟེན་ཞིག་ཀྱང་ཡོད་དེ། དེའི་ཚེ་གླང་པོ་ཆེའི་གཟུགས་ཅུང་ཟད་ཅིག་ཞིག་ནས། དེ་ལ་མི་ཞིག་ཕྱག
iiif viewer powered by OpenSeadragon
