| e-texts navigator |
| Wylie |
196b1 རྒྱལ་པོས་དེ་གཉིས་ཀྱི་ཚུལ་དང་སྦྱར་ནས། ཁྱེའུ་འདི་གཉི་གས་ཐུན་མོང་དུ་གསོས་ལ། ཆེར་སྐྱེས་ནས་ཁྱོད་གཉིས་ཀྱི་བུའི་ཆུང་མ་རེ་རེ་ལོང་ཤིག་།ཆུང་མ་གཉིས་ལས་བུ་གང་ལས་བྱུང་བ་སོ་སོར་ཁྱེར་ཅིག་ཅེས་བཅད་དོ། །དེ་ནས་ཁྱིམ་བདག་གཉིས་ཀྱིས་ཀྱང
196b2 རྒྱལ་པོས་ཞལ་ཆེ་བར་བཅད་པ་བཞིན་དུ་ཁྱེའུ་ཐུན་མོང་དུ་གསོས་ནས་ཅིས་ཀྱང་མི་བྲེལ་བར་བྱས་སོ། །དེ་ནས་ཁྱེའུ་ཆེར་སྐྱེས་ནས་ཕ་མ་གཉིས་ལ་འདི་སྐད་ཅེས་གསོལ་ཏོ། །བདག་བཙས་མ་ཐག་ཏུ་ཆུར་ལྷུང་བ་དང་། ཉས་མིད་པ་ལ་སོགས་པ་སྡུག་བསྔལ་སྣ་ཚོགས་མྱོང
196b3 ཡང་། བདག་ཅག་མ་གུམ་པས་བདག་ནི་རབ་ཏུ་བྱུང་བར་དད་ཀྱི་གནོང་ཤིག་ཅེས་སྨྲས་སོ། །ཁྱེའུ་དེའི་ཕ་མ་གཉིས་ཀྱང་བུ་སྡུག་ཆེས་པས་ངོ་མ་ཆོད་ནས། རབ་ཏུ་བྱུང་བར་གནང་བ་དང་། ཁྱེའུ་དེས་སངས་རྒྱས་གང་ན་བ་དེར་སོང་ནས་དེར་ཕྱིན་པ་དང་། བཅོམ་ལྡན་འདས
196b4 ཀྱི་ཞབས་ལ་མགོ་བོས་ཕྱག་འཚལ་ཏེ། བདག་སངས་རྒྱས་ཀྱི་བསྟན་པ་ལ་རབ་ཏུ་བྱུང་ངོ་ཞེས་གསོལ་ཏེ། དེ་ལ་བཅོམ་ལྡན་འདས་ཀྱིས་ལེགས་པར་འོངས་སོ། །ཞེས་བཀའ་སྩལ་ནས་སྐྲ་དང་ཁ་སྤུ་རང་བྱི་སྟེ། དགེ་སློང་དུ་གྱུར་ཏོ། །མིང་ཡང་རིགས་གཉིས་པ་ཞེས
196b5 བྱ་བར་བཏགས་ཏེ། དགེ་སློང་རིགས་གཉིས་པ་ལ་བཅོམ་ལྡན་འདས་ཀྱིས་དམ་པའི་ཆོས་གསུངས་པས། སྡུག་བསྔལ་གྱི་མཐར་ཕྱིན་ཏེ། དེ་ཉིད་དུ་དགྲ་བཅོམ་པར་གྱུར་ཏོ། །དེ་ལ་དགེ་སློང་དག་ཐེ་ཙོམ་སྐྱེས་ཏེ་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས
196b6 གསོལ་ཏོ། །དགེ་སློང་རིགས་གཉིས་པ་འདི་སྔོན་དགེ་བའི་རྩ་བ་ཅི་བསགས་པ་ན་ཆུར་ལྷུང་སྟེ་ཉའི་ལྟོ་བར་མཆིས་ཀྱང་གུམ་པར་མ་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཁྱོད་རྟག་པར་ཉོན་ཅིག་།སྔོན་སངས་རྒྱས་རྣམ་པར་གཟིགས
196b7 ཞེས་བྱ་བ་འཇིག་རྟེན་དུ་གཤེགས་ཏེ། སྐྱེ་བོ་མང་པོ་ལ་ཆོས་སྟོན་ཏོ། །དེའི་ཚེ་ཁྱིམ་བདག་ཅིག་ཀྱང་འཁོར་དེར་འོངས་ཏེ། བཅོམ་ལྡན་འདས་ཀྱིས་སྦྱིན་པ་བྱིན་པའི་བསོད་ནམས་དང་། ཚུལ་ཁྲིམས་བསྲུངས་པའི་ཡོན་ཏན་ལ་སོགས་པ་རྒྱ་ཆེར་བསྟན་པ་ཐོས
iiif viewer powered by OpenSeadragon
