| e-texts navigator |
| Wylie |
184a1 སྐྱེ་བར་འགྱུར་ཏེ། དཔེར་ན་རླུང་གི་རང་བཞིན་ནི་མི་ལྡོག་མོད་ཀྱི། ཙན་དན་གྱི་ཚལ་ལམ། ཙམ་པ་ཀའི་ཚལ་ནས་འོངས་ན། རླུང་དེ་ལས་དྲི་བསུང་ཞིམ་པ་བྲོའོ། །གལ་ཏེ་མནམ་ཞིང་བཙོག་པའི་རླུང་རོ་སུམ་པའི་ཕྱོགས་ནས་འོངས་ན། རླུང་དེ་ཡང
184a2 མནམ་མོ། །དཔེར་ན་གོས་གསར་པ་ཡང་། སྤོས་ཀྱི་སྣོད་དུ་བཅུག་ན་གོས་དེ་ལ་ཡང་སྤོས་བྲོའོ། །གལ་ཏེ་མནམ་པ་སུམ་པའི་ནང་དུ་བཅུག་ན་གོས་དེ་ཡང་མནམ་མོ། །དགེ་བའི་བཤེས་གཉེན་ལ་བསྟེན་ན། དགེ་བ་ཡང་ཕྱིར་ཞིང་འཕེལ་གྱིས། སྡིག་པའི་གྲོགས
184a3 པོ་ལ་བསྟེན་ན། སྡིག་པ་སྐྱེ་ཞིང་འཕེལ་བར་འགྱུར་གྱིས། དེ་བས་ན་བདག་གི་བུ་འདི་ཡང་། དགེ་སློང་བཙུན་པ་འདི་ལ་འབུལ་ཏེ། རབ་ཏུ་བྱུང་ངོ་སྙམ་བསམས་ནས། དགེ་སློང་དེ་གང་ན་བ་དེར་སོང་སྟེ་འདི་སྐད་ཅེས་སྨྲས་སོ། །བདག་གི་བུ་འདི་རབ་ཏུ་བྱུང་བ
184a4 དད་ཀྱིས། བཙུན་པས་ཐུགས་བརྩེ་བར་དགོངས་ཏེ་རབ་ཏུ་བྱུང་བར་གསོལ། གལ་ཏེ་མི་གནང་ན་སླར་ཡང་ཁྱིམ་དུ་ཁྲིད་དེ་མཆིའོ། །དེ་ནས་དགེ་སློང་གིས་རྫུ་འཕྲུལ་གྱི་སྤྱན་གྱིས་བརྟགས་ན། ཁྱེའུ་འདི་རབ་ཏུ་བྱུང་ན་ཚུལ་ཁྲིམས་དག་པར་སྲུང་ཞིང་།
184a5 སངས་རྒྱས་ཀྱི་ཆོས་འཕེལ་བར་རྟོགས་ནས་རབ་ཏུ་བྱུང་སྟེ། དགེ་ཚུལ་དུ་བྱས་སོ། །དེའི་ཚེ་ན་འཚོ་བ་སྦྱོར་བའི་དགེ་བསྙེན་དེ་ལ་ཁྱིམ་བདག་མཛའ་བོ་ཞིག་ཡོད་དེ། ཁྱིམ་བདག་དེས་དུས་ཀྱི་སྟོན་མོ་ཞིག་སྦྱར་ནས། དགེ་བསྙེན་དང་། དེའི་ཆུང་མ་དང་། བུ
184a6 དང་། བུ་མོ་དང་། བྲན་ཕོ་དང་། བྲན་མོ་དང་། ཁྱིམ་གང་གི་མི་ཀུན་བོས་སོ། །ཕྱི་ཉིན་མགྲོན་དུ་འགྲོ་བ་ལས། དགེ་བསྙེན་དེ་འདི་སྙམ་དུ་བསམས་སོ། །བདག་ཅག་ཀུན་མགྲོན་དུ་འགྲོ་ན་ཁྱིམ་འདི་སུས་བསྲུང་། གལ་ཏེ་ནན་གྱིས་འགའ་ཞིག
184a7 བཞག་ན། དེའི་སྒོར་ཕབ་སྟེ་སྐལ་བ་ཆད་པར་འགྱུར་གྱིས། དེ་ལ་སུ་ཞིག་འདུག་པར་དགའ་ན། མགྲོན་ལས་སླར་ལོག་མ་ཐག་ཏུ་དྲིན་གཟོ་ཞིང་ལན་བྱའོ་ཞེས་སྨྲས་པ་དང་། དགེ་བསྙེན་དེའི་བུ་མོ་ཞིག་ཡོད་པ་དེས། ཕ་མ་ལ་འདི་སྐད་ཅེས་སྨྲས་སོ། །ཁྱིམ
iiif viewer powered by OpenSeadragon
