| e-texts navigator |
| Wylie |
175a1 སྒོའི་ཐེམ་པ་ལ་འདུག་ནས་སྐད་ཆེན་པོ་ཕྱུང་སྟེ་སྨྲེ་སྔགས་འདོན་ཅིང་འདུག་གོ། །བདག་ཐོག་མ་སྐྱེས་ནས་ཉེས་པ་ཆེན་པོ་ནི་མ་བྱས་ན། ཅིའི་ཕྱིར་བདག་རབ་ཏུ་བྱུང་བར་མི་གནང་། ཨུ་པཱ་ལི་ལྟ་བུ་འབྲེག་མཁན་ལས་བྱུང་བ་ལྟ་བུ་ཕྱག་དར་བ་ངན་སྐྱུགས་འདོར་བ་དང་།
175a2 སོར་འཕྲེང་ཅན་ལྟ་བུ་མི་གྲངས་མེད་པར་བསད་པ་དང་། ཨ་སི་ཀ་ལྟ་བུ་མི་རྒོད་མ་རུངས་པ་དེ་དག་ལ་སོགས་པ་ཡང་རབ་ཏུ་བྱུང་ན། བདག་ལ་ཉེས་པ་ཅི་ཞིག་ཡོད་དེ་རབ་ཏུ་བྱུང་དུ་མ་གནང་ཞེས་སྨྲས་པ་དང་། བཅོམ་ལྡན་འདས་དེའི་དྲུང་དུ་གཤེགས་ཏེ། སྐུ་མངོན་པར་བསྟན་ན་འོད་ཟེར
175a3 གྱིས་ལྷང་ངེ་ལྷམ་མེར་གསལ་ཏེ། མཚན་དང་དཔེ་བྱད་ཀྱིས་བརྒྱན་ནས་བརྒྱ་བྱིན་ལྷའི་དབང་པོའི་རིན་པོ་ཆེ་སྣ་བདུན་གྱི་རྒྱལ་མཚན་ལྟར་མངོན་དུ་གཤེགས་ཏེ། ཁྱིམ་བདག་དཔལ་སྐྱེས་ལ་ཁྱོད་ཅིའི་ཕྱིར་ངུ་ཞེས་བཀའ་སྩལ་ཏོ། །དེའི་ཚེ་ན་ཁྱིམ་བདག་དེས་སངས་རྒྱས་ཀྱི་གསུང་ཚངས
175a4 པའི་དབྱངས་ལྟ་བུ་ཐོས་ནས། རབ་ཏུ་དགའ་མགུ་རངས་པ་ནི། བུས་མ་མཐོང་བ་ཙམ་དུ་དགའ་སྟེ། ལུས་སྨད་ལྔ་ས་ལ་གཏུགས་ནས། སངས་རྒྱས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །སེམས་ཅན་གྱི་ནང་ན་མི་གསོད་པ་དང་། མི་རྒོད་བགྱིད་པ་དང་། དུ་སྨྲ་བ་དང་།
175a5 སྐུར་ཀླང་འདེབས་པའི་མ་རབས་ཀྱང་རབ་ཏུ་བྱུང་ན། བདག་འབའ་ཞིག་དངོས་སྡིག་ཅི་མཆིས་ན། སངས་རྒྱས་ཀྱི་བསྟན་པ་ལ་རབ་ཏུ་བྱུང་བར་མ་གནང་། བདག་གི་ཁྱིམ་གང་གི་མི་ཡང་རྒས་འཁོགས་པས་སྐྱོ་བར་གྱུར་ཏེ་དགོས་པ་མེད་དོ་ཞེས་མཆི་བས་གལ་ཏེ། སངས་རྒྱས
175a6 ཀྱི་བསྟན་ལ་རབ་ཏུ་བྱུང་བ་མ་གནང་ན། སླར་ཁྱིམ་དུ་མཆིས་ཀྱང་གདོན་མི་འཚལ་བར་བདག་ཁྱིམ་དུ་འཇུག་ཏུ་མི་སྟེར་བས་གང་དུ་ཡང་མཆི་བའི་གནས་མ་མཆིས་ཏེ། དེང་འདི་ཉིད་དུ་ངེས་པར་སྲོག་དང་བྲལ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དཔལ་སྐྱེས་ལ
175a7 བཀའ་སྩལ་པ། ནམ་མཁའ་ལ་ལག་པ་བཏེག་པ་ལ་འདི་ནི་རབ་ཏུ་འབྱུང་ངོ་། །འདི་ནི་རབ་ཏུ་མི་འབྱུང་ངོ་ཞེས་ངེས་པར་སུ་ཞིག་སྨྲ། ཁྱིམ་བདག་གིས་གསོལ་པ། བཅོམ་ལྡན་འདས་ཆོས་ཀྱི་འཁོར་ལོས་སྒྱུར་བའི་རྒྱལ་པོའི་འཁོར་མཁས་པའི་མཆོག་།སངས་རྒྱས་ཀྱི་འོག་ཏུ
iiif viewer powered by OpenSeadragon
