| e-texts navigator |
| Wylie |
169a1 མཛའ་སྟེ། རྒྱལ་བུའི་མིང་སྡོང་དུམ་ཞེས་བྱ་བ་ཡང་མིང་རྗེས་ནས་རྒྱལ་བུ་སུ་ལན་ཤན་ཞེས་མིང་བཏགས་སོ། །དེ་ནས་དུས་གཞན་ཞིག་ན་རྒྱལ་བུ་དེས་འདི་སྙམ་དུ་བསམས་སོ། །ད་ནི་དམག་དང་ཆས་ཏེ་ཕོ་བྲང་ཞིག་བྱའོ་སྙམ་དུ་བསམས་ནས། གང་ནས་གཞི་ཡངས་ཤིང
169a2 མཉམ་པ་ཞིག་ཏུ་སོང་སྟེ། འདིར་ཕོ་བྲང་གྱིས་ཅེས་བསྒོ་བ་དང་། ཀླུའི་རྒྱལ་པོ་བཞི་ཞིག་མིར་སྤྲུལ་ནས་འདིར་ཕོ་བྲང་མཛད་ན་ཅི་ལས་མཛད་ཅེས་དྲིས་ན། རྒྱལ་བུ་སུ་ལན་ཤན་གྱིས་སྨྲས་པ། ས་ལས་བྱའོ་ཞེས་བསྒོ་བ་དང་། ཀླུའི་རྒྱལ་པོ་བཞིས་ཅིའི་ཕྱིར་རིན་པོ་ཆེ་ལས་མི་མཛད་ཅེས་སྨྲས་སོ། །
169a3 རྒྱལ་པོས་སྨྲས་པ། ཕོ་བྲང་ཆེན་པོ་ཞིག་བྱ་དགོས་ན་རིན་པོ་ཆེ་དེ་སྙེད་ཅིག་ག་ལས་རྙེད་ཅེས་སྨྲས་པ་དང་། ཀླུའི་རྒྱལ་པོས་བདག་ཅག་གིས་འབུལ་ལོ་ཞེས་སྨྲས་ནས་དེའི་ངོས་བཞིར་ཆུ་མིག་རེ་རེ་སྤྲུལ་ཏེ་འདི་སྐད་ཅེས་སྨྲས་སོ། །ཤར་ཕྱོགས་ལོགས་ཀྱི་ཆུ་མིག་ལས་བཅུས་ཏེ་བྱས་ན་ཐམས་ཅད
169a4 བཻ་དཱུརྱར་འགྱུར་རོ། །ལྷོ་ཕྱོགས་ལོགས་ཀྱི་ཆུ་མིག་ལས་བཅུས་ཏེ་བྱས་ན་ཐམས་ཅད་གསེར་དུ་འགྱུར་རོ། །ནུབ་ཕྱོགས་ལོགས་ཀྱི་ཆུ་མིག་ལས་བཅུས་ཏེ་བྱས་ན། ཐམས་ཅད་དངུལ་དུ་འགྱུར་རོ། །བྱང་ཕྱོགས་ངོས་ཀྱི་ཆུ་མིག་ལས་བཅུས་ཏེ་བྱས་ན་ཐམས་ཅད་ཤེལ་དུ་འགྱུར་རོ། །
169a5 ཞེས་སྨྲས་སོ། །རྒྱལ་བུས་ཀྱང་དེ་དག་གིས་སྨྲས་པ་བཞིན་དུ་ཆུ་མིག་ལས་བཅུས་ནས་དེ་བཞིན་དུ་གྱུར་ཏོ། །དེ་ནས་ཕོ་བྲང་གི་ར་བ་ཁོ་ར་ཁོར་ཡུག་དཔག་ཚད་བཞི་བརྒྱ་པ་ཅིག་བྱས་ནས་དེའི་ནང་དུ་ཕོ་བྲང་དཔག་ཚད་བཞི་བཅུ་པ་ཞིག་བྱས་ཏེ། ལམ་གྱི་སྲང་ན་ཁང་བུ་བརྩེགས་པ་དང
169a6 སྐྱེད་ཤིང་དང་ཁྲུས་ཀྱི་རྫིང་བུ་ཡང་རིན་པོ་ཆེ་སྣ་བཞི་ལས་བྱས་སོ། །བཟང་ཁྱད་ལྷའི་ཕོ་བྲང་དང་འདྲ་བར་བྱས་སོ། །ཟིན་མ་ཐག་ཏུ་རིན་པོ་ཆེ་སྣ་བདུན་ཡང་ཡོད་པར་གྱུར་ཏེ། གླིང་བཞི་ལ་དབང་བྱེད་ཅིང་དགེ་བ་རྒྱས་པར་བྱས་སོ། །རྒྱལ་པོ་ཆེན་པོ་དེའི་ཚེ་དེའི་དུས་ན། རྒྱལ་པོ
169a7 མ་ཧ་ཤ་ཀུ་ལ་ནི་ད་ལྟར་ངའི་ཡབ་རྒྱལ་པོ་ཟས་གཙང་མ་ཡིན་ནོ། །དེའི་ཚེ་དེའི་དུས་ན་བཙུན་མོ་དེ་ནི་ད་ལྟར་ངའི་ཡུམ་ལྷ་མཛེས་མ་ཡིན་ནོ། །རྒྱལ་བུ་མི་སྡུག་པ་སྡོང་དུམ་ནི་ད་ལྟར་ང་ཡིན་ནོ། །དེའི་ཆུང་མ་དེ་ནི་སྐྱེ་དགུའི་བདག་མོ་ཡིན་ནོ། །དེའི་ཆུང་མ་དེའི་ཕ་དེ་ནི་འོད་སྲུང་ཡིན་ནོ། །
iiif viewer powered by OpenSeadragon
