| e-texts navigator |
| Wylie |
168b1 སྤྲིངས་པ་ཙམ་གྱིས་ཕ་རོལ་པོའི་དམག་ཐམས་ཅད་སྐྲག་ནས་གཡུལ་འགུལ་ཡང་མ་ནུས་སོ། །དེ་ནས་དེ་དག་གི་དམག་གི་ནང་དུ་སོང་ནས་རྒྱལ་པོ་དྲུག་ཆར་གྱི་མགོ་བཅད་དེ་ཅོད་པན་བླངས་ནས་དམག་དེ་རྣམས་ཀྱང་འཁོར་དུ་བསྡུས་སོ། །རྒྱལ་པོ་ལི་ཤི་པ་ཙ་རབ་ཏུ་དགའ་སྟེ། བུ
168b2 མོ་ཡང་ཆུང་མར་བྱིན་ནས། རྒྱལ་པོ་ཆེན་པོར་བཅུག་སྟེ་རྒྱལ་པོ་དྲུག་གི་སྲིད་གཅིག་ཏུ་བསྡུས་ནས། དམག་གི་ཚོགས་དང་བཅས་ཏེ་ཆུང་མ་དང་འགྲོགས་ནས་ཕྱིར་བདག་གི་ཡུལ་དུ་འོངས་སོ། །རྒྱལ་པོས་ཀྱང་སྲས་ཕྱིར་འོངས་སོ་ཞེས་ཐོས་ནས་ཕྱི་རོལ་ཏུ་བསུས་ཏེ་རྒྱལ་སྲིད་ཀྱང་རྒྱལ་བུ་ལ་བྱིན་པ་ལས
168b3 བྱེད་དུ་མ་བཏུབ་ནས། ཕྱིར་ཡབ་ལ་གཏད་དེ་སྔོན་བཞིན་དུ་ཆུང་མ་དང་ལྷན་ཅིག་ཏུ་འདུག་ནས། ཆུང་མ་ལ་ཁྱོད་ཅིའི་ཕྱིར་མཚན་མོ་ཁོ་བོ་བོར་ཏེ་བྲོས་ཞེས་དྲིས་ན། ཁྱོད་ནི་མི་སྡུག་ཆེས་ནས་མི་མ་ཡིན་སྙམ་སྟེ་སྐྲག་ནས་བྲོས་སོ། །དེ་ནས་རྒྱལ་བུས་མེ་ལོང་བླངས་ཏེ་མེ་ལོང་གི་ནང་དུ་བལྟས་ན་བདག་གི
168b4 མདོག་ཤིན་ཏུ་མི་སྡུག་པ་མཐོང་ནས་ལུས་དེ་ལ་བལྟ་མི་འདོད་པ་ཙམ་དུ་སྐྱོ་ནས། ཚལ་ཞིག་གི་ནང་དུ་སོང་ནས་མཆི་མ་བྱས་པ་ལས་བརྒྱ་བྱིན་ལྷའི་དབང་པོས་རྒྱང་མ་ནས་མཐོང་སྟེ་དེའི་དྲུང་དུ་འོངས་ནས་ཅིའི་ཕྱིར་ཁྱོད་མཆི་མ་བྱེད་ཞེས་དྲིས་ནས། རྒྱལ་པོས་དེ་བཞིན་དུ་སྨྲས་པ་དང་བརྒྱ་བྱིན་གྱིས་སྤྲོ་བ
168b5 བསྐྱེད་དེ། རིན་པོ་ཆེའི་ནོར་བུ་ཅིག་ཀྱང་བྱིན་ནས་འདི་སྐད་ཅེས་སྨྲས་སོ། །ཁྱོད་རྟག་ཏུ་ནོར་བུ་འདི་སྤྱི་བོ་ལ་ཐོགས་ཤིག་དང་ང་དང་འདྲ་བར་བཟང་ཞིང་མཛེས་པར་འགྱུར་རོ་ཞེས་བསྒོ་ནས་རྒྱལ་བུས་ནོར་བུ་སྤྱི་བོ་ལ་ཐོགས་མ་ཐག་ཏུ་བདག་གི་ལུས་སྔོན་བས་ལྷག་པར་གྱུར་པ་ཚོར་ནས་ཕྱིར་ཕོ་བྲང་གི་ནང་དུ་འོངས
168b6 ནས་གཞུ་དང་དུང་བླངས་ཏེ་རྩེར་འགྲོ་བ་ལས་ཆུང་མས་ངོ་མ་ཤེས་ཏེ་འདི་སྐད་ཅེས་སྨྲས་སོ། །ཁྱོད་སུ་ཞིག་འདི་ལ་མ་རེག་ཤིག་ཁོ་མོའི་ཁྱོ་འོངས་ནས་གནོད་པར་གྱུར་ཏ་རེ་ཆུང་མ་ལ་སྨྲས་པ། ང་ཁྱོད་ཀྱི་ཁྱོ་ཡིན་ནོ་ཞེས་སྨྲས་ན་ཆུང་མ་ཡིད་མ་ཆེས་ཏེ། འདི་སྐད་ཅེས་སྨྲས་སོ། །ཁོ་མོའི་ཁྱོ་ནི་ཤིན་ཏུ་མི་སྡུག
168b7 སྟེ། ཁྱོད་ནི་ཤིན་ཏུ་ཡང་བཟང་བ་ཞིག་བྱུང་ན་ཅི་ལྟར་ཁོ་མོའི་ཁྱོ་ཡིན་ཞེས་སྨྲས་པ་དང་། རྒྱལ་བུས་སྤྱི་བོའི་ནོར་བུ་བཀྲོལ་མ་ཐག་ཏུ་ཕྱིར་མི་སྡུག་པར་མཐོང་ནས་རབ་ཏུ་དགའ་སྟེ། ཅིའི་ཕྱིར་འདི་ལྟར་གྱུར་ཅེས་དྲིས་ན་རྒྱལ་བུས་ཅིའི་ཕྱིར་དེ་ལྟར་གྱུར་པ་རྒྱས་པར་གཏམ་བྱས་ནས། དེ་ཕྱིན་ཅད་ཁྱོ་ཤུག་གཉིས
iiif viewer powered by OpenSeadragon
