| e-texts navigator |
| Wylie |
165a1 གྱུར་ཏེ། དེ་ཚུན་ཅད་བཙུན་མོ་ཡང་ཡིད་གཞུངས་ཤིང་མཁས་པ་དང་། མཉེན་ཞིང་དེས་པས་འགྲོ་བ་མང་པོ་ཡང་དགེ་བ་ལ་འགོད་པར་མོས་པ་དང་། ཕྱིས་ཟླ་བ་ཚང་བ་དང་། བུ་ཁྱེའུ་ཞིག་བཙས་ཏེ། བྱད་གཟུགས་ལེགས་པ་བལྟ་ན་སྡུག་པ། ཕལ་ལས་འཕགས
165a2 པར་བཟང་བ། བ་སྤུའི་བུ་ག་ཀུན་ནས་འོད་འབྱུང་བ་ཞིག་བཙས་ཏེ། རྒྱལ་པོ་ཡང་བུ་དེ་ལ་ཤིན་ཏུ་སྡུག་པར་སེམས་པས་སྐྱོ་མི་ཤེས་པ་ཙམ་དུ་རྟོག་སྟེ། མཚན་མཁན་ལ་བསྟན་ནས། མཚན་མཁན་གྱིས་ཀྱང་མཚན་བཟང་ངན་བརྟགས་ན། ཁྱེའུ་འདི་ནི་ཤིན་ཏུ་ངོ་མཚར་ཆེའོ། །
165a3 ཞེས་དགའ་བ་སྐྱེས་ནས་ཁྱེའུ་འདིའི་མཚན་དང་སྦྱར་ན་གླིང་བཞི་ལ་དབང་བར་འགྱུར་རོ། །ཞེས་རྒྱལ་པོ་ལ་སྨྲས་པ་དང་། རྒྱལ་པོ་ཡང་རབ་ཏུ་དགའ་ནས་མཚན་མཁན་ལ་ཁྱེའུའི་མིང་ཐོགས་ཤིག་ཅེས་སྨྲས་པ་དང་། མཚན་མཁན་གྱིས་རྒྱལ་པོ་ལ་ཁྱེའུ་འདི་མའི་རུམ་དུ་ཞུགས་ནས།
165a4 ངོ་མཚར་ཆེ་བའི་ལྟས་ཅི་བྱུང་ཞེས་དྲིས་པ་དང་། ཁྱེའུའི་མས་ལྷག་པར་ཡིད་གཞུངས་ཤིང་དེས་པ་དང་། དགེ་བར་འགོད་པ་ལ་དགའ་བར་གྱུར་ཏོ་ཞེས་སྨྲས་ནས། མཚན་མཁན་གྱིས་ཁྱེའུའི་མིང་ཤེས་རབ་འོད་ཅེས་བཏགས་ཏེ། རྒྱལ་ཚབ་དུ་དབང་བསྐུར་ནས་མཁས་པའི་བློ་དང་ལྡན་ཏེ་གཞན
165a5 པས་འཕགས་པར་གྱུར་ཏོ། །དེ་ནས་དུས་ཕྱིས་ཞིག་ན་རྒྱལ་པོ་ཆེན་པོ་ཚེ་འཕོས་ནས། བློན་པོ་རྣམས་ཀྱིས་རྒྱལ་བུ་དེ་རྒྱལ་པོར་དབང་བསྐུར་བར་གསོལ་པ་དང་། རྒྱལ་བུས་བློན་པོ་རྣམས་ལ་ངས་ནི་རྒྱལ་པོ་མི་ནུས་སོ་ཞེས་བསྒོའོ། །བློན་པོ་རྣམས་ཀྱིས་གསོལ་པ། ད་རྒྱལ་པོ
165a6 ཆེན་པོ་ནོངས་ཏེ་རྒྱལ་བུ་མ་ལགས་པ་རྒྱལ་པོ་གཞན་འགའ་ཡང་མེད་དོ། །ད་རྒྱལ་བུས་རྒྱལ་པོ་མི་མཛད་ན་སུ་ཞིག་རྒྱལ་པོར་གཞུག་ཅེས་གསོལ་པ་དང་། རྒྱལ་བུས་སྨྲས་པ། འཇིག་རྟེན་འདི་དག་ནི་མི་རིགས་པའི་སྡིག་པའི་ཆོས་བྱེད་དོ། །བསད་པ་དང་། ཆད་པས་བཅད་པའི
165a7 ལས་བྱས་ན། ཁོ་བོ་ལ་ཁ་ན་མ་ཐོ་བའི་ལས་མི་ཆུང་སྟེ། གལ་ཏེ་ཁྱེད་ཡུལ་མི་ཐམས་ཅད་ཀྱིས་དགེ་བ་བཅུའི་ལས་བྱེད་ནུས་ན། ཁོ་བོ་ཡང་རྒྱལ་པོ་བྱེད་ནུས་སོ་ཞེས་བསྒོའོ། །བློན་པོ་རྣམས་ཀྱིས་གསོལ་པ། འདི་ནི་ལེགས་ཏེ་རྒྱལ་སར་གཤེགས་ཏེ་དབང་མཛོད་ཅིག་དང་།
iiif viewer powered by OpenSeadragon
