| e-texts navigator |
| Wylie |
159b1 འགྲན་པར་གནང་ན། ད་སྟེ་ཞག་བདུན་ན་ཆོ་འཕྲུལ་འགྲན་པར་བགྱིའོ། །དེ་ནས་ལིཙྪ་བཱི་རྣམས་བཅོམ་ལྡན་འདས་གང་ན་བ་དེར་སོང་སྟེ་འདི་སྐད་ཅེས་གསོལ་ཏོ། །གླེན་པ་ཆེན་པོ་སྟོན་པ་དྲུག་ནི་ཡོན་ཏན་དང་ལྡན་སྙམ་སྟེ། དེ་བཞིན་གཤེགས་པ་དང་ཆོ་འཕྲུལ་འགྲན་ནོ་ཞེས་མཆིས
159b2 ན། བཅོམ་ལྡན་འདས་ཀྱིས་ཚར་བཅད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ང་ཉིད་དུས་མཁྱེན་ཏོ། །དེ་ནས་ལིཙྪ་བཱི་རྣམས་ཡུལ་མི་རྣམས་དང་། ཡོ་བྱད་རྒྱལ་པོ་གཟུགས་ཅན་སྙིང་པོ་བཞིན་དུ་སྦྱར་ཏེ། སང་ལྟ་བུར་འགྲན་པ་ལས། དེ་རིང་ལྟ་བུ་བཅོམ་ལྡན
159b3 འདས་དགེ་འདུན་དང་བཅས་པ་ཡུལ་ཀཽ་ཤཱཾ་བཱིར་གཤེགས་སོ། །ཀཽ་ཤཱཾ་བཱིའི་རྒྱལ་པོ་ཨུ་དྲ་ཡ་ན་ཞེས་བྱ་བས་ཀྱང་བློན་པོར་བཅས་ཏེ། དེ་བཞིན་གཤེགས་པ་བསུའོ། །ཡངས་པ་ཅན་གྱི་མི་རྣམས་སང་ལྟ་བུར་དེ་བཞིན་གཤེགས་པ་ལ་ཕྱག་འཚལ་དུ་འོངས་པ་ལས། ཀཽ་ཤཱཾ་བཱིར
159b4 གཤེགས་སོ་ཞེས་ཐོས་པ་དང་། སྟོན་པ་དྲུག་པོས་ཀྱང་བཅོམ་ལྡན་འདས་གཤེགས་སོ་ཞེས་ཐོས་ནས། སྔར་བས་ཀྱང་ལྷག་པར་ང་རྒྱལ་སྐྱེས་ཏེ། ཡང་བཅོམ་ལྡན་འདས་གང་ན་བ་དེར་དོང་ངོ་། །ཡང་དེའི་ཚེ་ལི་ཙྪ་བཱི་རྣམས་ཀྱང་ཐེག་པ་ལྔ་བརྒྱ་བཤམས་ནས། འཁོར་ཁྲི་ཕྲག
159b5 བདུན་དང་གཟུགས་ཅན་སྙིང་པོའི་འཁོར་དང་བཅས་ཏེ། ཀཽ་ཤཱཾ་བཱིར་སངས་རྒྱས་དང་སྟོན་པ་དྲུག་ཆོ་འཕྲུལ་འགྲན་པ་ལ་བལྟར་དོང་ངོ་། །སྟོན་པ་དྲུག་པོ་ཀཽ་ཤཱཾ་བཱིར་ཕྱིན་ནས། རྒྱལ་པོ་ཨུ་དྲ་ཡ་ན་ལ་གཏམ་སྔ་མ་བྱས་ཏེ། དགེ་སྦྱོང་གཽ་ཏ་མ་འདི་སྡོད་དུ་མ་བཏུབ་ནས་བདག་ཅག་ལ
159b6 བྱོལ་གྱིས། རྒྱལ་པོས་བདག་ཅག་དང་ཆོ་འཕྲུལ་འགྲན་པར་དུས་ཐོབ་ཅིག་ཅེས་གསོལ་པ་དང་། ཨུ་དྲ་ཡ་ནས་སངས་རྒྱས་ལ་འདི་སྐད་ཅེས་གསོལ་ཏོ། །སྟོན་པ་དྲུག་ནི་བཅོམ་ལྡན་འདས་དང་ཆོ་འཕྲུལ་འགྲན་ནོ་ཞེས་མཆིས་ན་མཁྱེན་ཏམ། བཅོམ་ལྡན་འདས་ཀྱིས་བཀའ
159b7 སྩལ་པ། ང་ཉིད་དུས་མཁྱེན་ཏོ། །དེ་ནས་ཨུ་དྲ་ཡ་ནས་རྒྱལ་པོ་གཟུགས་ཅན་སྙིང་པོ་བཞིན་དུ་སྦྱར་ཏེ། བཤམས་པ་དང་། བཅོམ་ལྡན་འདས་དགེ་སློང་གི་དགེ་འདུན་དང་བཅས་ཏེ། ཡུལ་ཝར་གྱིར་གཤེགས་སོ། །ཝར་གྱིའི་རྒྱལ་པོ་ཤུན་ཙིད་ལས་ཀྱང་མི་མང་པོ་དང་དེ
iiif viewer powered by OpenSeadragon
