| e-texts navigator |
| Wylie |
156a1 མངོན་པར་རྫོགས་པར་སངས་རྒྱས་ནས་ཀྱང་། སྔར་རྣམ་པར་གྲོལ་བ་ལ་བཀོད་དེ་རྒྱུ་དང་རྐྱེན་མེད་པ་མ་ཡིན་ནོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་གསོལ་པ། སྔོན་འདས་པའི་དུས་ན་ཅི་ལྟ་བུར་བཀྲེས་པ་དང་སྐོམ་པ་ལས་བདེ་བར་མཛད་པ་བསྟན་དུ
156a2 གསོལ། འཁོར་མང་པོ་འདི་དག་གིས་ཐོས་ནས་རྟོགས་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་ན་བསྐལ་པ་གྲངས་མེད་པའི་ཕ་རོལ་ན། འཛམ་བུའི་གླིང་འདིར་རྒྱལ་པོ་བྱམས་པའི་སྟོབས་ཞེས་བྱ་བ་འཛམ་བུའི་གླིང་གི་རྒྱལ་ཕྲན་བརྒྱད་ཁྲི་བཞི
156a3 སྟོང་སྙེད་ལ་དབང་བྱེད་པ་ཞིག་བྱུང་ངོ་། །རྒྱལ་པོ་དེ་ལ་བཙུན་མོ་སྟོང་ཕྲག་ཉི་ཤུ་ཡོད་དོ། །བློན་པོ་ནི་སྟོང་ཕྲག་བཅུ་ཡོད་དོ། །རྒྱལ་པོ་དེ་བྱམས་པ་དང་སྙིང་རྗེར་ལྡན་ཏེ། ཚད་མེད་པ་བཞི་སྤྱོད་ཅིང་འགྲོ་བ་ཐམས་ཅད་ལ་སྙིང་བརྩེ་བས། དགེ་བ་བཅུའི་སྲིད་འཛིན་ཏེ། ཐམས
156a4 ཅད་ཀྱིས་བཀུར་བ། ཡུལ་ན་དགྲ་མེད་ཅིང་ལོ་ལེགས་པར་འབྱོར་བ་བདེ་བ་སྐྱིད་པ་དང་ལྡན་པ་སྟེ། རིམས་གཏོང་བའི་དག་།མིའི་ཁྲག་དང་མདངས་འཕྲོག་ཅིང་ཟ་བ་ལས། དེའི་ཚེ་ན་ཡུལ་མི་ཐམས་ཅད་ལུས་དང་ངག་དང་ཡིད་བསྲུང་སྟེ། དགེ་བ་བཅུ་ལ་གནས་པས། ཡི
156a5 དགས་མ་རུངས་པ་དག་བཟའ་བ་མ་རྙེད་ནས། ཀུན་ལྟོགས་ཏེ་མཐུ་མེད་པར་གྱུར་ཏོ། །དེའི་ཚེ་ན་གནོད་སྦྱིན་ལྔ་ཞིག་རྒྱལ་པོའི་གན་དུ་འོང་ཞིང་འདི་སྐད་ཅེས་སྨྲས་སོ། །བདག་ཅག་གི་ཟས་ནི་མིའི་མདངས་དང་ཁྲག་ལ་ལྟོས་ཏེ། ལུས་དང་སྲོག་འཚོ་བ་ལས་རྒྱལ་པོས་བཀར་བཏགས
156a6 ཏེ། ཐམས་ཅད་དགེ་བ་བཅུ་ལ་གནས་པས། བདག་ཅག་ཟས་དང་སྐོམ་མ་རྙེད་དེ། ཉམ་ཐག་ནས་སྲོག་ལ་བབ་བོ། །རྒྱལ་པོ་བདག་ཅག་ལ་ཡང་ཐུགས་མི་བརྩེའམ་ཞེས་གསོལ་ནས། རྒྱལ་པོས་ཀྱང་དེ་དག་ལ་སྙིང་བརྩེ་བའི་ཕྱིར། ལུས་ཀྱི་ཡན་ལག་ལྔ་ལས་རྩ་ལྔ་བཅད་ནས།
156a7 གནོད་སྦྱིན་རྣམས་སོ་སོ་ནས་སྣོད་བཟེད་དེ་ཁྲག་ལས་ངོམས་པར་འཐུང་དུ་བཅུག་གོ་།དེ་དག་ཁྲག་གིས་ངོམས་ནས་ཤིན་ཏུ་དགའ་མགུ་རངས་པར་གྱུར་ཏོ། །དེ་དག་ཁྲག་གིས་ངོམས་ནས། དགེ་བ་བཅུ་ལ་ཅི་ནུས་སུ་སྤྱོད་ཅིག་ཅེས་བསྐུལ་ཏོ། །ད་ལྟར་ངའི་ལུས་ལས་ཁྲག་ཕྱུང་སྟེ། ཁྱོད
iiif viewer powered by OpenSeadragon
