| e-texts navigator |
| Wylie |
153a1 སློང་ལྷའི་མེ་ཏོག་འདི་ཡིན་ནོ། །དེ་ལྟར་སྔོན་འདས་པའི་དུས་ན་བསམ་པ་དག་པའི་དད་པས་མེ་ཏོག་བསྡུས་ཏེ། དགེ་འདུན་ལ་གཏོར་ནས་སྨོན་ལམ་བཏབ་པས། བསྐལ་པ་དགུ་བཅུ་རྩ་གཅིག་གི་བར་དུ་གང་དང་གང་དུ་སྐྱེས་ཀྱང་བྱད་གཟུགས་ལེགས་ཤིང་བཟང་བ་དང་།
153a2 བལྟ་ན་སྡུག་པ་དང་། ཅི་ལྟར་བསམ་པ་བཞིན་དུ་བཟའ་བ་དང་། བཏུང་བ་དང་། ཁྲི་སྟན་ལ་སོགས་པ་ཡིད་བཞིན་དུ་འབྱོར་ཅིང་ལྡན་ཏེ། བསོད་ནམས་དེས་འབྲས་བུའི་བར་དུ་ཐོབ་པར་གྱུར་ཏོ། །དེ་བས་ན་ཀུན་དགའ་བོ་སེམས་ཅན་ཐམས་ཅད་ཀྱིས་ཀྱང་སྦྱིན་པ་ཆུང་ངུ་ལ་བསོད
153a3 ནམས་མེད་སྙམ་ནས་མ་བརྙས་ཤིག་། ལྷའི་མེ་ཏོག་ལྟར་ཅི་ཡང་འབྱོར་ཅིང་འགྲུབ་པར་འགྱུར་རོ། །དེ་ནས་ཀུན་དགའ་བོ་དང་འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་ཡི་རངས་ནས་མངོན་པར་དགའོ། །ལྷའི་མེ་ཏོག་གི་ལེའུ་སྟེ་དགུ་པའོ།། །།
153a4 འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་དུས་ན་ཁྱིམ་བདག་ཅིག་གི་ཆུང་མ་ཞིག་ལ་བུ་བཙས་ནས། ཁྱེའུ་དེ་བཙས་པའི་ཚེ་ནམ་མཁའ་ལས་རིན
153a5 པོ་ཆེ་སྣ་བདུན་ཆར་བཞིན་དུ་བབ་སྟེ། དེའི་ཁྱིམ་ཡོངས་སུ་གང་ངོ་། །དེ་ནས་མཚན་མཁན་བོས་ཏེ། བུའི་མཚན་བལྟས་ན། བུའི་མཚན་རབ་ཏུ་བཟང་ངོ་ཞེས་ཁྱིམ་བདག་ལ་སྨྲས་ནས། ཁྱིམ་བདག་དེ་རབ་ཏུ་དགའ་སྟེ། མཚན་མཁན་དེ་ལ་བུའི་མིང་བཏགས་པར་གསོལ་བ་དང
153a6 ཁྱེའུ་འདི་བཙས་པའི་ཚེ་ལྟས་ཇི་ལྟ་བུ་བྱུང་ཞེས་དྲིས་པ་དང་། ཁྱིམ་བདག་གིས་ཀྱང་ཁྱེའུ་འདི་བཙས་པའི་ཚེ་ན་ནམ་མཁའ་ལས་རིན་པོ་ཆེ་སྣ་བདུན་ཆར་བཞིན་དུ་བབ་ནས། ཁྱིམ་ཡོངས་སུ་གང་བར་བྱས་སོ་ཞེས་སྨྲས་པ་དང་། མཚན་མཁན་གྱིས་བསོད་ནམས་ལས་མིང
153a7 བཏགས་ཏེ། ཁྱེའུ་དེའི་མིང་ལྷའི་རིན་ཆེན་ཞེས་བྱ་བར་གདགས་སོ། །ཕྱིས་ཆེན་པོར་སྐྱེས་ནས་མང་དུ་ཐོས་ཤིང་ཤེས་པ་མང་བ་དང་། སྒྱུ་རྩལ་ཡང་ཟླ་མེད་པར་གྱུར་ཏེ་རབ་ཏུ་འབྱུང་བར་དད་པས་ཕ་མ་ལ་ཕྱི་ཕྱག་འཚལ་ནས། སངས་རྒྱས་གང་ན་བ་དེར་སོང་སྟེ། ཕྱིན་པ་དང
iiif viewer powered by OpenSeadragon
