| e-texts navigator |
| Wylie |
145b1 དགྲ་བཅོམ་པར་གྱུར་ཏོ། །འཁོར་མང་པོ་དེ་དག་བཅོམ་ལྡན་འདས་ཀྱིས་གསུངས་པ་ལ་ཡི་རངས་ནས་མངོན་པར་དགའོ། །རྒྱ་མཚོའི་ལྷས་དྲིས་པའི་ལེའུ་སྟེ་ལྔ་པའོ།། །།བམ་པོ་གཉིས་པ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་བྱ
145b2 ཀ་ལན་ད་ཀ་གནས་པ་འོད་མའི་ཚལ་ན་བཞུགས་སོ། །དེའི་ཚེ་ན་ཡུལ་དེ་ན་བློན་པོ་ཆེན་པོ་ཤིན་ཏུ་ཕྱུག་པ་ཞིག་ལ་བུ་ཙ་མེད་དོ། །དེའི་ཚེ་ན་ཆུ་ཀླུང་གང་གཱའི་འགྲམ་ན། མ་ཎི་བྷ་དྲ་ཞེས་བྱ་བའི་ལྷ་རྟེན་ཞིག་ཡོད་དེ། ཐམས་ཅད་དེ་ལ་ཕྱག་འཚལ་ཞིང་མཆོད་པ་བྱེད་དེ། བློན་པོ
145b3 ཆེན་པོ་དེ་ཡང་ལྷ་རྟེན་དེའི་གན་དུ་སོང་ནས། འདི་སྐད་ཅེས་གསོལ་ཏོ། །བདག་ལ་བུ་ཙ་མེད་དེ། ལྷ་ཁྱོད་ཡོན་ཏན་ཚད་མེད་པ་དང་ལྡན་པ་ཞེས་ཐོས་ཀྱིས། འགྲོ་བ་ཀུན་ལ་སྐྱོབས་པ་ཁྱོད་གཞན་གྱི་སྨོན་ལམ་བསྐང་བར་ནུས་ན། བདག་ཀྱང་བསྐྱབ་ཏུ་གསོལ་ལོ། །གལ
145b4 ཏེ་བདག་ལ་ཁྱོད་ཀྱིས་བུ་ཅིག་སྩལ་ན། གསེར་དང་དངུལ་གྱིས་ལྷ་ཁྱོད་ཀྱི་སྐུ་ཡང་གཡོགས་ཤིང་། བཞུགས་པའི་རྟེན་ཡང་སྤོས་དང་བྱུག་པས་བྱུག་གོ། །ཅི་སྟེ་མངོན་པར་རྟགས་མེད་ན། ལྷ་ཁྱོད་ཀྱི་རྟེན་ཡང་བཤིག་ལ། ཁྱོད་ཀྱི་ལུས་ལ་མི་གཙང་བ་དང་བཤང་གཅིས་ཀྱང
145b5 བསྐུའོ་ཞེས་སྨྲས་པ་དང་། ལྷ་དེས་ཐོས་ནས་འདི་སྙམ་དུ་བསམས་སོ། །བློན་པོ་དེ་ནི་ཕྱུག་ཅིང་བཙན་ལ་མཐུ་ཆེ་བས། སྨད་རིགས་ཙམ་གྱིས་འདིའི་བུར་མི་འགྱུར་ཏེ། བདག་མཐུ་ཆུང་བས་འདིའི་སྨོན་ལམ་བསྐང་མི་ནུས་སོ། །གལ་ཏེ་སྨོན་པ་བཞིན་དུ་མ་བྱས་ན་གདོན་མི་ཟ
145b6 བར་མི་སྡུག་པར་ཐོ་འཚམས་སོ་བསམས་ནས། རྟེན་བསྲུང་བའི་ལྷ་དེས་མ་ཎི་བྷ་དྲ་ལ་གསོལ་པ་དང་། དེ་ཡང་དེ་ལྟ་བུའི་མཐུ་མེད་པས། རྣམ་ཐོས་ཀྱི་བུ་གང་ན་བ་དེར་སོང་ནས། རྣམ་ཐོས་ཀྱི་བུ་ལ་གསོལ་ཏོ། །རྣམ་ཐོས་ཀྱི་བུས་ཀྱང་བདག་གི་མཐུ་ཙམ་གྱིས་བུ་ཡོད་པར་མི
145b7 ནུས་སོ་སྙམ་བསམས་ནས། རྣམ་ཐོས་ཀྱི་བུ་དེ་བརྒྱ་བྱིན་གང་ན་བ་དེར་སོང་སྟེ་འདི་སྐད་ཅེས་གསོལ་ཏོ། །བདག་གི་བློན་པོ་མ་ཎི་བྷ་དྲ་ཞེས་བགྱི་བས་བདག་ལ་འདི་སྐད་ཅེས་མཆིའོ། །རྒྱལ་པོའི་ཁབ་ན་བློན་པོ་ཞིག་བདག་ལ་བུ་སློང་སྟེ། སྨོན་པ་བཞིན་དུ་བྱས་ན་ནི་མཆོད་པ་དང་རིམ་གྲོ
iiif viewer powered by OpenSeadragon
