| e-texts navigator |
| Wylie |
144a1 ཆེ་ལེན་དུ་འགྲོ་བ་དེ་དག་གིས་འདི་ལྟར་བགྲོས་སོ། །བདག་ཅག་གིས་མིའི་ནང་ན་མཁས་ཤིང་ཤེས་པ་ཞིག་དེད་དཔོན་དུ་བཀྲིའོ་ཞེས་བགྲོས་ནས། དགེ་བསྙེན་ཁྲིམས་ལྔ་པ་ཞིག་ཁྲིད་དེ། རྒྱ་མཚོར་ཞུགས་སོ། །རྒྱ་མཚོའི་དབུས་སུ་ཕྱིན་པ་དང་། རྒྱ་མཚོའི་ལྷ་དེ
144a2 སྲིན་པོ་ཞིག་ཏུ་སྤྲུལ་ནས། ལུས་གཟུགས་ཤིན་ཏུ་མི་སྡུག་ཅིང་། སྔོ་ལ་གནག་པ། མཆེ་བ་གྱེན་དུ་བྱུང་བ། མགོ་ལ་མེ་འབར་བ་ཞིག་དྲུང་དུ་འོངས་ནས་གྲུ་འདི་ང་ལ་བྱིན་ཅིག་ཅེས་སྨྲས་ཏེ། ཚོང་པ་ལ་འདི་སྐད་ཅེས་དྲིའོ། །འཇིག་རྟེན་ན་གང་དག་འཇིགས་སུ་རུང་བ་ང་ལས
144a3 འདའ་བ་ཡོད་དམ་ཞེས་དྲིས་པ་དང་། དགེ་བསྙེན་གྱིས་སྨྲས་པ། ཁྱོད་བས་ཤིན་ཏུ་ལྷག་པར་འཇིགས་པ་ཡོད་དོ། །རྒྱ་མཚོའི་ལྷས་སྨྲས་པ། དེ་ལྟ་བུ་སུ་ཞིག་།དགེ་བསྙེན་གྱིས་སྨྲས་པ། འཇིག་རྟེན་ན་གླེན་པ་གཏི་མུག་ཅན། མི་དགེ་བའི་ལས་རྣམས་བག་མེད་པར་བྱེད་པ
144a4 སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། དུ་སྨྲ་བ་དང་། ཚིག་འཁྱལ་པ་སྨྲ་བ་དང་། ཕྲ་མ་དང་། ཞེ་གཅོད་པའི་ཚིག་སྨྲ་བ་དང་། འདོད་ཆགས་དང་། ཞེ་སྡང་ཆེ་བ་དང་། ངན་པར་ལྟ་བ་དག་ཚེ་འཕོས་ནས་སེམས་ཅན་དམྱལ
144a5 བར་སྐྱེ་སྟེ། སྡུག་བསྔལ་རྣམ་པ་སྣ་ཚོགས་མྱོང་བ་རྣམས་སེམས་ཅན་དམྱལ་བའི་སྲུང་མས་ཁྲིད་དེ། ལ་ལ་ནི་མཚོན་གྱིས་དམྱལ་ཞིང་གཏུབས། ལ་ལ་ནི་ཤིང་རྟས་ཕན་ཚུན་དུ་དྲངས་ནས་ཁམས་ཚད་དུ་བཅད། ལ་ལ་ནི་གཏུན་གྱིས་བརྡུངས། ལ་ལ་ནི་རང་ཐག་གིས་བཏགས། ལ་ལ་ནི
144a6 རལ་གྲིའི་རི་ལ་འཛེགས། ལ་ལ་ནི་མིའི་ཤིང་རྟ་དང་ཟངས་ཁོལ་བ་དང་ཆབ་རོམ་དང་ངན་སྐྱུགས་ཀྱི་ནང་དུ་བསྐོལ་བ་ལ་སོགས་པ། སྡུག་བསྔལ་ཤིན་ཏུ་མི་བཟད་པ་རྣམ་པ་སྣ་ཚོགས་དེ་ལྟ་བུ་དག་ལོ་བརྒྱ་སྟོང་གི་བར་དུ་མྱོང་བ་དེ་ནི། ཁྱོད་བས་ཤིན་ཏུ་ཡང་ལྷག་པར་འཇིགས་སུ་རུང་ངོ
144a7 ཞེས་སྨྲས་པ་དང་། རྒྱ་མཚོའི་ལྷས་ཐོས་ནས་དེ་མ་ཐག་ཏུ་མི་སྣང་བར་གྱུར་ཏོ། །ཡང་རྒྱ་མཚོའི་ནང་དུ་སོང་བ་ལས། རྒྱ་མཚོའི་ལྷ་དེ་མིའི་ནང་ནས་ཤིན་ཏུ་རིད་ཅིང་ཉམ་ཐག་པ་རྩ་དང་རུས་པ་ཙམ་འབྲེལ་པ་ཞིག་ཏུ་སྤྲུལ་ནས་གྲུ་འདི་ང་ལ་བྱིན་ཅིག་ཅེས་སྨྲ་ཞིང་དེ་ལ་འདི་སྐད་ཅེས་དྲིའོ། །
iiif viewer powered by OpenSeadragon
