| e-texts navigator |
| Wylie |
137b1 སྲང་གི་གཞིའི་ནང་དུ་ཕྱིན་པ་དང་། ད་ནི་ལེགས་སོ་ཞེས་རབ་ཏུ་དགའ་བའི་སེམས་སྐྱེས་སོ། །དེའི་ཚེ་གནམ་ས་རྣམ་པ་དྲུག་ཏུ་གཡོས་ནས། ལྷ་རྣམས་ཀྱི་ཕོ་བྲང་ཡང་འགུལ་ཞིང་ལྡེག་པར་གྱུར་ཏེ། གཟུགས་ཀྱི་ཁམས་ཀྱི་ལྷ་མན་ཅད་ལྷགས་ནས་སྟེང་གི་བར་སྣང་ལ་འཁོད
137b2 དོ། །བྱང་ཆུབ་སེམས་དཔས་ཤིན་ཏུ་དཀའ་བ་སྤྱད་ཅིང་ལུས་དང་གཏན་མ་རུང་བར་བྱས་ཏེ། ཆོས་ཀྱི་ཕྱིར་ལུས་དང་སྲོག་ལ་མི་ལྟ་བར་གྱུར་པའི་དངོས་པོ་དེ་དག་མཐོང་ནས། མཆི་མ་ཆར་བཞིན་དུ་ཟག་ཅིང་ངུས་ཏེ། ལྷ་རྫས་ཀྱི་མེ་ཏོག་ཆར་བཞིན་དུ་བབ་ནས་མཆོད་པ་བྱས་སོ། །
137b3 དེའི་ཚེ་བརྒྱ་བྱིན་གྱིས་སྔོན་གྱི་ལུས་སུ་བསྒྱུར་ཏེ། རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོས་འདི་ལྟ་བུའི་ཤིན་ཏུ་དཀའ་བ་མཛད་པ་འདིས་ཅི་ཞིག་བཞེད། འཁོར་ལོས་སྒྱུར་བའི་རྒྱལ་པོ་བཞེད་དམ། བརྒྱ་བྱིན་ནམ། བདུད་ཀྱི་རྒྱལ་པོའམ། ཁམས་གསུམ་གྱི་དབང་པོ་བཞེད
137b4 དམ། ཅི་ཞིག་བཞེད་ཅེས་སྨྲས་པ་དང་། བྱང་ཆུབ་སེམས་དཔས་སྨྲས་པ། བདག་འདོད་པ་ནི་ཁམས་གསུམ་གྱི་ཆེ་བ་ཅན་གྱི་ལོངས་སྤྱོད་འདོད་པ་མ་ཡིན་ཏེ། བསོད་ནམས་ཅི་བྱེད་ཀྱང་བླ་ན་མེད་པའི་བྱང་ཆུབ་འདོད་དོ་ཞེས་སྨྲས་པ་དང་། བརྒྱ་བྱིན་གྱིས་སྨྲས་པ། འདི་ལྟར་ལུས
137b5 ཞིག་ཅིང་མ་རུང་བར་བྱས་ཏེ། རུས་པ་ལ་ཐུག་པའི་སྡུག་བསྔལ་མྱོང་བར་གྱུར་པ་འདི་ལ་མི་འགྱོད་དམ་ཞེས་སྨྲས་པ་དང་། རྒྱལ་པོས་འགྱོད་པ་མེད་དོ་ཞེས་སྨྲས་སོ། །བརྒྱ་བྱིན་གྱིས་སྨྲས་པ། འགྱོད་པ་མེད་ཅེས་སྨྲས་མོད་ཀྱིས། དེ་ལྟར་ལུས་འདར་ཞིང་རྡག་ལ་དབུགས་ཆད་པ་ཙམ་དུ
137b6 སྨྲ་ཡང་མི་ནུས་པ་ལ་བལྟས་ན། འགྱོད་པ་མེད་པར་ཅིས་ཡིད་ཆེས་པར་འགྱུར། རྒྱལ་པོས་སྨྲས་པ། བདག་ཐོག་མ་ནས་ཐ་མའི་བར་དུ་བ་སྤུའི་ཉག་མ་ཙམ་གྱི་འགྱོད་པའི་སེམས་མེད་ན། བདག་ཅི་དང་ཅི་འདོད་པ་གདོན་མི་ཟ་བར་འགྱུར་ཏེ། སྨྲས་པའི་ཚིག་འདི་བདེན་ན་བདེན་པའི
137b7 ཚིག་སྨྲས་པས། བདག་གི་ལུས་འདི་སྔ་མཁོ་བཞིན་དུ་རྨ་མེད་པར་གྱུར་ཅིག་ཅེས་སྨྲས་མ་ཐག་ཏུ་རྒྱལ་པོའི་ལུས་སྔོན་བས་ཀྱང་ལྷག་པར་བཟང་པོར་གྱུར་ཏེ། ལྷ་དང་མིའི་འཇིག་རྟེན་དུ་བཅས་པ་ཐམས་ཅད་དགའ་མགུ་རངས་ནས། ངོ་མཚར་རྨད་དུ་གྱུར་ཏོ། །དེའི་ཚེ་དེའི་དུས་ན། རྒྱལ
iiif viewer powered by OpenSeadragon
