| e-texts navigator |
| Wylie |
39b1 བསྙེལ་བ་མི་མངའ་བའི་ཆོས་ཉིད་ཀྱི་ཕྱིར་རོ། །ཤིན་ཏུ་འདུས་འདི་ལྟ་སྟེ་དཔེར་ན། མེ་ལོང་གི་དཀྱིལ་འཁོར་ངོས་ཐམས་ཅད་ནས་ལེགས་པར་ཕྱིས་པ་ནི་མདུན་དང་། ཟུར་དང་། རྒྱབ་དང་། ཀུན་ནས་ཀྱང་གཟུགས་བརྙན་འབྱུང་བའི་རྒྱུར་འགྱུར་རོ། །དེ་བཞིན་དུ་དེ་བཞིན་གཤེགས
39b2 པ་རྣམས་ཀྱི་མེ་ལོང་ལྟ་བུའི་ཡེ་ཤེས་ཀྱི་དཀྱིལ་འཁོར་ཡོངས་སུ་མ་ཆད་པ་དང་ཚད་མེད་པའི་རྣམ་པ་ཤིན་ཏུ་སྦྱངས་པ་ཡང་ཀུན་ནས་ཤེས་པའི་གཟུགས་བརྙན་རྣམས་འབྱུང་བའི་རྒྱུར་འགྱུར་ཏེ། འདི་ལྟ་སྟེ། ཉན་ཐོས་ཀྱི་ཐེག་པ་པ་རྣམས་ཉན་ཐོས་ཀྱི་ཐེག་པས་ངེས་པར་འབྱུང་བར་བྱ
39b3 བ་དང་། རང་སངས་རྒྱས་ཀྱི་ཐེག་པ་པ་རྣམས་རང་སངས་རྒྱས་ཀྱི་ཐེག་པས་ངེས་པར་འབྱུང་བར་བྱ་བ་དང་། ཐེག་པ་ཆེན་པོ་པ་རྣམས་ཐེག་པ་ཆེན་པོས་ངེས་པར་འབྱུང་བར་བྱ་བའི་ཕྱིར་ཉན་ཐོས་ཀྱི་ཐེག་པ་ཤེས་པའི་གཟུགས་བརྙན་རྣམས་དང་། རང་སངས་རྒྱས་ཀྱི་ཐེག་པ་ཤེས
39b4 པའི་གཟུགས་བརྙན་རྣམས་དང་། ཐེག་པ་ཆེན་པོ་ཤེས་པའི་གཟུགས་བརྙན་རྣམས་ཀྱི་རྒྱུར་འགྱུར་རོ། །ཤིན་ཏུ་འདུས་འདི་ལྟ་སྟེ་དཔེར་ན། མེ་ལོང་གི་དཀྱིལ་འཁོར་ལ་འདི་ལྟ་སྟེ། ས་དང་། རི་དང་། ཤིང་དང་། ཁྱིམ་དང་། གཞལ་མེད་ཁང་ཆེན་པོའི་གཟུགས
39b5 བརྙན་སྣང་སྟེ། གཟུགས་བརྙན་ཆེན་པོ་དག་སྣང་ཡང་མེ་ལོང་གི་དཀྱིལ་འཁོར་ནི་དེའི་ཚད་དུ་མ་ཡིན་ནོ། །དེ་བཞིན་དུ་དེ་བཞིན་གཤེགས་པ་རྣམས་ཀྱི་མེ་ལོང་ལྟ་བུའི་ཡེ་ཤེས་ཀྱི་དཀྱིལ་འཁོར་ལ་ཡང་བྱང་ཆུབ་སེམས་དཔའི་ས་དང་པོ་ནས་བཟུང་སྟེ། སངས་རྒྱས་ཀྱི་སའི་བར
39b6 དག་གི་ཡེ་ཤེས་ཀྱི་གཟུགས་བརྙན་དག་ཀྱང་སྣང་། འཇིག་རྟེན་པ་དང་འཇིག་རྟེན་ལས་འདས་པའི་ཆོས་ཐམས་ཅད་ཤེས་པའི་གཟུགས་བརྙན་དག་ཀྱང་སྣང་སྟེ། མེ་ལོང་ལྟ་བུའི་ཡེ་ཤེས་ལ་ནི་ཚད་ཡོངས་སུ་ཆད་པ་གང་ཡང་མེད་དོ། །ཤིན་ཏུ་འདུས་འདི་ལྟ་སྟེ་དཔེར་ན། མེ
39b7 ལོང་གི་དཀྱིལ་འཁོར་ནི་གཟུགས་གཞན་གྱིས་བསྒྲིབས་པའི་གཟུགས་རྣམས་ལ་གཟུགས་བརྙན་འབྱུང་བའི་རྒྱུར་མི་འགྱུར་རོ། །དེ་བཞིན་དུ་དེ་བཞིན་གཤེགས་པ་རྣམས་ཀྱི་མེ་ལོང་ལྟ་བུའི་ཡེ་ཤེས་ཀྱི་དཀྱིལ་འཁོར་ཡང་སེམས་ཅན་མི་དགེ་བའི་གྲོགས་པོས་ཟིན་པ་དམ་པའི་ཆོས་མ་ཡིན་པ
iiif viewer powered by OpenSeadragon
