| e-texts navigator |
| Wylie |
308b1 ལྷགས་པར་གྱུར་ལ། དེ་དག་ཀྱང་སྔོན་འོད་སྲུང་གིས་སངས་རྒྱས་དང་། ཆོས་དང་། དགེ་འདུན་དང་། བག་བྱེད་པ་ལ་བཀོད་པར་གྱུར་ཅིང་ལྷའི་བུ་དེ་དག་གིས་བྱང་ཆུབ་ཀྱི་ཡན་ལག་གི་གཏམ་ཕྱི་ཕྱིར་ཞིང་ཐོས་པས་གལ་ཏེ་འོད་སྲུང་མ་གཏོགས་པར་ལྷའི་བུ་དེ་དག་ལ་སངས་རྒྱས་སྟོང་གི་ཆོས
308b2 བཤད་ཀྱང་ཤེས་པར་འགྱུར་བའམ། ཤེས་པ་འཛིན་པ་མེད་ནས་འོད་སྲུང་གིས་བྱང་ཆུབ་ཀྱི་ཡན་ལག་རབ་ཏུ་དབྱེ་བ་རྒྱས་པར་བཤད་པ་དང་། ལྷའི་བུ་བརྒྱ་སྟོང་པོ་དེ་དག་གིས་ཀྱང་ཡེ་ཤེས་རྟོག་པར་གྱུར། སེམས་ཅན་གང་ན་སྟེ་ཆོས་མི་ཉན་ཅིང་ཆོས་ཉན་པར་མི་འགྲོ་བའི་སེམས་ཅན་དེ་དག
308b3 ཀྱང་དེ་བཞིན་གཤེགས་པ་ཆོས་ཀྱི་རྗེ་ཡང་བྱང་ཆུབ་ཀྱི་ཡན་ལག་བརྗོད་པ་གསན་ནས་ནད་ལས་ཡོངས་སུ་ཐར་ན་བདག་ཅག་གིས་ལྟ་ཅིའི་ཕྱིར་ཆོས་མཉན་པར་མི་བྱ་སྙམ་དུ་སེམས་པར་གྱུར་ཏེ། རིགས་ཀྱི་བུ་དེ་ལྟ་བས་ན་ལྷའི་བུ་དེ་དག་གདུལ་བའི་དོན་དུ་བྱ་བ་དང་། སེམས་ཅན་ནད་པ་དག་ལ་ཆོས
308b4 ཉིད་བསྟན་པའི་ཕྱིར་དེ་བཞིན་གཤེགས་པས་ང་རོ་རྒྱབ་ན་བས་འོད་སྲུང་བྱང་ཆུབ་ཀྱི་ཡན་ལག་ཤོད་ཅིག་ཅེས་དེ་སྐད་ཀྱི་ཚིག་གསུངས་ཏེ། དེ་ཡང་དེ་བཞིན་གཤེགས་པའི་ཐབས་མཁས་པ་ཡིན་གྱི། ལས་ཀྱི་སྒྲིབ་པ་ནི་མ་ཡིན་ནོ། །ཅིའི་ཕྱིར་ན་ཤཱཀྱ་རྣམས་བརླག་པ་ན་དེ་བཞིན་གཤེགས
308b5 པ་ང་ཀླད་པ་ན་སྟེ་མི་བཟོད་དོ་ཞེས་གསུང་ཞེ་ན། རིགས་ཀྱི་བུ་འདི་ལ་སེམས་ཅན་ཁ་ཅིག་དེ་བཞིན་གཤེགས་པ་ནི་གཉེན་རྣམས་ཀྱི་དོན་མི་བཞེད། ཕན་པར་མི་བཞེད། བདེ་བར་མི་བཞེད། ཕན་པ་དང་བདེ་བར་མི་བཞེད་པས་དེའི་ཕྱིར་རྒྱལ་པོའི་རིགས་ཐམས་ཅད་ཁ་བཏག་གོ་སྙམ་དུ་སེམས
308b6 ཀྱི། དེ་བཞིན་གཤེགས་པས་གཉེན་རྣམས་ཀྱི་ཐོག་མ་མེད་པའི་སྡུག་བསྔལ་གྱི་ཕུང་པོ་མཐར་ཕྱུང་བར་ནི་མི་ཤེས་པའི་སེམས་ཅན་དེ་དག་གི་སེམས་བསྲུང་བའི་ཕྱིར་གནས་བརྟན་དགའ་བོ་ལ་ང་ནི་ཀླད་པ་ན་སྟེ་མི་བཟོད་དོ་ཞེས་དེ་སྐད་ཀྱི་ཚིག་གསུང་སྟེ། རིགས་ཀྱི་བུ་གང་གི་ཚེ་ན་དེ་བཞིན
308b7 གཤེགས་པས་གནས་བརྟན་དགའ་བོ་ལ་ང་ནི་ཀླད་པ་ན་སྟེ་མི་བཟོད་དོ་ཞེས་དེ་སྐད་ཀྱི་ཚིག་གསུངས་པ་དེའི་ཚེ་ལྷའི་བུ་ཆད་པར་སྨྲ་བ་སུམ་སྟོང་དང་། སེམས་ཅན་སྲོག་གཅོད་པར་བྱེད་པ་མང་པོ་ལྷགས་ནས་ལྷའི་བུ་དེ་དག་དང་། སེམས་ཅན་དེ་དག་ལས་ཀྱི་ལམ་ལ་གཞུག་པའི་ཕྱིར་དེ་བཞིན
iiif viewer powered by OpenSeadragon
