| e-texts navigator |
| Wylie |
303b1 ཤིན་ཏུ་བསླབས་པའི་སྨན་པ་ནི་ནད་མེད་ཅིང་སེམས་ཅན་ནད་པ་རྣམས་ཀྱི་མདུན་དུ་སྨན་ཚ་བ་དེ་དག་བཞག་ནས། དེ་དག་ནད་ལས་ཡོངས་སུ་ཐར་བར་བྱེད་དོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་སྨན་པའི་རྒྱལ་པོ་སྟེ། ནད་ཐམས་ཅད་ཡོངས་སུ་ཐར་ཅིང་སྒྲིབ་པ་མེད
303b2 པ་ཐོབ་ནས་ལས་འདིའི་འབྲས་བུ་རྣམ་པར་སྨིན་པ་འདི་ཡིན་ནོ་ཞེས་ལས་སྟོན་ཅིང་ཇི་ལྟར་ན་སེམས་ཅན་ལས་ཀྱིས་འཇིགས་ཤིང་སྐྲག་པ་རྣམས་དང་། ལུས་དང་ངག་དང་ཡིད་ཡོངས་སུ་དག་པར་འགྱུར་ཞེས་ཆེད་དུ་ནད་སྟོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། ཚོང་དཔོན་གྱི་བུ་བྱུང
303b3 ནས་རིང་པོ་མ་ལོན་པ་དེ་ལ་ཕ་དང་མས་བྱིན་པའི་མ་མ་ཡོད་དེ། དེ་ནི་མ་མ་དེ་ཁྱེའུ་དེའི་འོ་མ་དག་པར་བྱ་བའི་ཕྱིར་ནད་མེད་བཞིན་དུ་ཚ་བ་དང་ཁ་བའི་སྨན་དེ་དག་ཆེད་དུ་འཐུང་ངོ་། །རིགས་ཀྱི་བུ་དེ་བཞིན་དུ་སེམས་ཅན་ཐམས་ཅད་ཀྱི་ཕ་དེ་བཞིན་གཤེགས་པ་ཡང་ལས་ཀྱི་བྱ་བ་རབ་ཏུ་སྟོན
303b4 པའི་སེམས་ཅན་རྣམས་གཟིགས་ནས་ནད་མེད་པར་གྱུར་བཞིན་དུ་ང་ལས་ཆེ་གེ་མོ་ཞིག་བྱས་པ་དེའི་ལས་ཀྱི་རྣམ་པར་སྨིན་པ་འདི་ཡིན་ནོ་ཞེས་ནད་སྟོན་ཅིང་དེ་དག་སེམས་ཅན་རྣམས་ཀྱིས་ཐོས་ནས་སྐྱོ་བ་ཐོབ་པར་འགྱུར་ཏེ། རིགས་ཀྱི་བུ་དེ་ཡང་ཐབས་མཁས་པར་ཤེས་པར་བྱའོ། །
303b5 རིགས་ཀྱི་བུ་སྔོན་འདས་པའི་དུས་ན་ཚོང་པ་ནོར་འདོད་པའི་ཕྱིར་རྒྱ་མཚོ་མཆིང་རྣམ་ཆེན་པོར་ཞུགས་པ་ལྔ་བརྒྱ་ཙམ་ཡོད་དེ། ཡང་དེའི་ཚེ་ན་ལམ་གྲོགས་དེ་དག་གི་ནང་ན་མི་ལས་ངན་པ་ཅན། སྡིག་པའི་ལས་ཅན། མདའ་དང་མཚོན་ལ་བསླབས་པ་རྐུ་བ་ཕ་རོལ་གྱི་ནོར་འཕྲོག་པ་ཚོང
303b6 པའི་ཚུལ་དུ་འདུག་པ་ཞིག་ཡོད་དེ། ཤིན་ཏུ་བརྟུལ་བའི་ཕྱིར་གྲུ་དེར་ཞུགས་པར་གྱུར་ཏོ། །དེ་ནས་མི་གཡོན་ཅན་དེ་ནི་བདག་གིས་ཚོང་པ་འདི་ཐམས་ཅད་སྲོག་དང་ཕྲལ་ལ་ནོར་ཐམས་ཅད་ཁྱེར་ཏེ། འཛམ་བུའི་གླིང་དུ་འགྲོའོ་སྙམ་དུ་སེམས་པར་གྱུར་ཏོ། །ཡང་དེའི་ཚེ་ན་ལམ་གྲོགས་ཀྱི
303b7 གྲུ་ན་འདུག་པ་དེ་དག་གི་ནང་ན་དེད་དཔོན་སྙིང་རྗེ་ཆེན་པོ་ཅན་ཞེས་བྱ་བ་ཞིག་ཡོད་དོ། །དེ་ནས་དེད་དཔོན་སྙིང་རྗེ་ཆེན་པོ་ཅན་དེ་གཉིད་ལོག་པའི་རྨི་ལམ་དུ་གང་རྒྱ་མཚོ་མཆིང་རྣམ་ཆེན་པོ་དེ་ན་ལྷ་འདུག་པ་དག་གིས་ལམ་གྲོགས་ཀྱི་གྲུ་འདི་ན་མི་མིང་འདི་ཞེས་བྱ་བ་འདི་ལྟ་བུ་སླུ་བར་བྱེད་པ་གཞན
iiif viewer powered by OpenSeadragon
