| e-texts navigator |
| Wylie |
296a1 ཡང་བསྐོར་བར་འགྱུར་ན། གང་འཛམ་བུའི་གླིང་གི་མི་དེ་དག་ཆོས་ཉན་པའི་ཕྱིར་ལྷའི་ཁང་པར་འགྲོ་མི་ནུས་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། ལྷ་དག་ནི་ཆོས་ཉན་པའི་ཕྱིར་འཛམ་བུའི་གླིང་དུ་འབབ་ནུས་ཀྱི། འཛམ་བུའི་གླིང་གི་མི་རྣམས་ནི་ཆོས་ཉན
296a2 པའི་ཕྱིར་ལྷའི་ཁང་པར་འགྲོ་མི་ནུས་སོ་སྙམ་ནས་དེའི་ཕྱིར་བྱང་ཆུབ་སེམས་དཔའ་འཛམ་བུའི་གླིང་དུ་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ། དེ་ཡང་བྱང་ཆུབ་སེམས་དཔའི་ཐབས་མཁས་པར་བལྟའོ། །བྱང་ཆུབ་སེམས་དཔའ་ནི་འདོད་ན་དགའ་ལྡན་གྱི་གནས་ནས་ཤི་འཕོས
296a3 ཏེ། མའི་མངལ་གྱི་ཁྱིམ་དུ་མ་ཞུགས་པར་དེའི་མོད་ཉིད་ལ་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ན་དེ་ལ་སེམས་ཅན་ཁ་ཅིག་ཐེ་ཚོམ་སྐྱེ་བར་འགྱུར་ཏེ། འདི་ལྷའམ་དྲི་ཟའམ་སྤྲུལ་པ་ཞིག་གམ། འདི་ག་ལས་འོངས་པ་ཞིག་ཅེས་དེ་དག་ཐེ་ཚོམ་དུ་གྱུར་ནས་ཆོས་ཉན་པར
296a4 མི་འགྱུར་བས་རྒྱུ་དེ་དང་རྐྱེན་དེའི་ཕྱིར་བྱང་ཆུབ་སེམས་དཔའ་མངལ་དུ་གནས་པར་སྟོན་ཏེ། དེ་ཡང་བྱང་ཆུབ་སེམས་དཔའི་ཐབས་མཁས་པར་ཤེས་པར་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་ནི་མངལ་གྱི་མལ་དུ་ཞུགས་སོ་སྙམ་དུ་ཁྱོད་དེ་ལྟར་མ་ལྟ་ཞིག་།བྱང་ཆུབ་སེམས་དཔའ་ནི
296a5 མངལ་གྱི་མལ་དུ་ཞུགས་པ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ཏིང་ངེ་འཛིན་དྲི་མ་མེད་པ་ཞེས་བྱ་བ་དེ་ལ་སྙོམས་པར་ཞུགས་ནས་མ་སོང་བཞིན་དུ་བྱང་ཆུབ་ཀྱི་སྙིང་པོ་ལ་འདུག་སྟེ། དགའ་ལྡན་གནས་ཀྱི་ལྷ་རྣམས་ཀྱང་བྱང་ཆུབ་སེམས་དཔའ་ཤི
296a6 འཕོས་སོ་སྙམ་དུ་འཛིན་ཅིང་དེ་ན་དེ་མི་མཐོང་མོད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་ལྡན་གྱི་གནས་ནས་ཀྱང་མི་གཡོ་ལ་སྤྲུལ་པས་བྱ་བ་ཐམས་ཅད་དང་། མངལ་དུ་འཇུག་པ་དང་། སྐྱེ་བ་དང་། མངོན་པར་འབྱུང་བ་དང་། དཀའ་བར་སྤྱོད་པ་ཐམས་ཅད་སྟོན་ཏེ། དེ་ཐམས
296a7 ཅད་ནི་བྱང་ཆུབ་སེམས་དཔའི་སྤྲུལ་པ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་གཙང་མར་སྤྱོད་པས་སླར་ཡང་མངལ་གྱི་མལ་དུ་མི་འཇུག་སྟེ། དེ་ཡང་བྱང་ཆུབ་སེམས་དཔའི་ཐབས་མཁས་པར་ཤེས་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་བན་གླང་གི་བུ
iiif viewer powered by OpenSeadragon
