| e-texts navigator |
| Wylie |
289b1 དཔའ་ཡང་འདོད་པའི་དགའ་བ་དང་། རྩེ་བ་ཐམས་ཅད་ཀྱང་སྤྱོད་ཀྱང་གང་དུ་ཡང་རྟག་པར་སྲེད་པ་མི་སྐྱེད། བདག་དང་གཞན་ཉམས་པར་ཡང་མི་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། ས་བོན་ཡོངས་སུ་གདུངས་པ་ནི་ཁ་དོག་ཉམས་པ་མེད་ཀྱང་ལྗང་བུ་འབྱུང
289b2 བར་མི་ནུས་སོ། །རིགས་ཀྱི་བུ་དེ་བཞིན་དུ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཤེས་རབ་ཡོངས་སུ་བསྒོམས་པས་ཉོན་མོངས་པ་ནི་དགའ་བ་དང་། རྩེ་བ་ཐམས་ཅད་ལ་སྤྱོད་ཀྱང་དེ་ལྟུང་བར་འགྲོ་བ་ཡོངས་སུ་མི་ལེན། སངས་རྒྱས
289b3 ཀྱི་ཡོན་ཏན་ལས་ཀྱང་ཡོངས་སུ་མི་ཉམས་སོ། །རིགས་ཀྱི་བུ་འདི་ལྟ་སྟེ་དཔེར་ན་ཉ་པ་ཤིན་ཏུ་བསླབས་པ་ནི་སྐུད་པ་གཅིག་ལ་གཟན་མ་བཏགས་པའི་མཆིལ་པ་སྦྱར་ནས་མཚོ་ཆེན་པོར་བཅུག་སྟེ། དེ་གང་དང་གང་གི་ཚེ་ན་འདོད་པ་དེ་དང་དེའི་ཚེ་སྐུད་པ་དེ་མཚོ་ཆེན་པོ་ནས་འདྲེན
289b4 ཏོ། །རིགས་ཀྱི་བུ་དེ་བཞིན་དུ་ཐབས་མཁས་པའི་བྱང་ཆུབ་སེམས་དཔའ་ཡང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཡོངས་སུ་བསྒོམས་པའི་སེམས། ཐམས་ཅད་མཁྱེན་པ་ཉིད་ལ་བརྟན་པོར་སྦྲེལ་ནས་འདམ་རྫབ་ཆེན་པོར་ལྟུང་ཞིང་དེ་ཐམས
289b5 ཅད་མཁྱེན་པ་ཉིད་ཀྱི་སེམས་དེ་བསྲུངས་པས་གང་དང་གང་གི་ཚེ་འདོད་པ་དེ་དང་དེའི་ཚེ་ཤི་འཕོས་ནས་ཚངས་པའི་འཇིག་རྟེན་དུ་སྐྱེའོ། །རིགས་ཀྱི་བུ་འདི་ལྟ་སྟེ་དཔེར་ན་སྔགས་ཀྱི་རིག་འཛིན་གྱི་སྐྱེས་བུ་རྒྱལ་པོས་བཟུང་སྟེ། ཞགས་པ་ལྔའི་བཅིང་བས་བཅིངས་སུ་ཟིན
289b6 ཀྱང་དེ་གང་གི་ཚེ་འགྲོ་བར་འདོད་པ་དེའི་ཚེ་དེ་སྔགས་ཀྱི་རིག་པའི་སྟོབས་བསྐྱེད་པ་གཅིག་གིས་བཅིངས་པ་ཐམས་ཅད་གཏུབས་ཏེ་འགྲོའོ། །དེ་བཞིན་དུ་བྱང་ཆུབ་སེམས་དཔའ་ཐབས་མཁས་པ་ཡང་གང་གི་ཚེ་འདོད་པའི་ཡོན་ཏན་ལྔས་དགའ་བ་མྱོང་ཞིང་དེ་དག་གིས
289b7 རྒྱས་པར་གྱུར་ཀྱང་། གང་གི་ཚེ་འདོད་པར་གྱུར་པ་དེའི་ཚེ་ཤེས་རབ་ཀྱི་རིག་པའི་སྟོབས་བསྐྱེད་པའི་ཐམས་ཅད་མཁྱེན་པ་ཉིད་ཀྱི་སེམས་གཅིག་གིས་འདོད་པའི་ཡོན་ཏན་ཐམས་ཅད་རབ་ཏུ་བཅོམ་སྟེ། ཤི་འཕོས་ནས་ཚངས་པའི་འཇིག་རྟེན་དུ་སྐྱེའོ། །རིགས
iiif viewer powered by OpenSeadragon
