| e-texts navigator |
| Wylie |
287b1 དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཀྱིས་ནི་གང་སྨད་པ། །འདོད་པ་སླན་ཆད་བདག་མི་འཚལ། །འདོད་པའི་སྲེད་པ་སྤངས་ན་ནི། །སངས་རྒྱས་མི་ཡི་མཆོག་ཏུ་འགྱུར། །བདག་གི་སེམས་ཀྱིས་གང་བསམས་པའི། །ནོངས་པ་དེ་ནི་ཁྱེད་ལ་བཤགས། །
287b2 སྲོག་ཆགས་ཀུན་ལ་བདེ་བའི་ཕྱིར། །བྱང་ཆུབ་ཏུ་ནི་མོས་བསྐྱེད་དོ། །དགའ་བོ་འདི་ལྟ་སྟེ། བྱང་ཆུབ་སེམས་དཔའ་འོད་མང་ལྡན་གྱི་རྒྱལ་པོ་ཐབས་མཁས་པ་དེས་སྲིང་མོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བསླབས་ནས་སྟན་ལས་ལངས་ཏེ་སོང་ངོ་། །དགའ
287b3 བོ་ལྷག་པའི་བསམ་པའི་ཁྱད་པར་ལ་ལྟོས། ངས་སྲིང་མོ་དེ་ལུང་བསྟན་ཏོ། །འདི་ནས་ཤི་འཕོས་ནས་བུད་མེད་ཀྱི་ལུས་བརྗེས་ཏེ། བསྐལ་པ་གྲངས་མེད་པ་བརྒྱ་སྟོང་ཕྲག་དགུ་བཅུ་རྩ་དགུ་ན་ཀུན་ནས་ལྡང་བ་དང་བྲལ་བ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག
287b4 པར་རྫོགས་པའི་སངས་རྒྱས་འཇིག་རྟེན་དུ་འབྱུང་བར་འགྱུར་ཏེ། དགའ་བོ་ཁྱོད་རྣམ་གྲངས་དེས་ཀྱང་བྱང་ཆུབ་སེམས་དཔའ་ནི་གང་ལྟུང་བའི་ཆོས་ཅན་དུ་འགྱུར་བའི་གཡོག་མི་འཆང་བར་རིག་པར་བྱའོ། །དེ་ནས་བྱང་ཆུབ་སེམས་དཔའ་འོད་མང་ལྡན་གྱི་རྒྱལ་པོ་བར་སྣང་དེ
287b5 ལས་བབས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཐབས་མཁས་པ་དང་། སྙིང་རྗེ་ཆེན་པོ་ལ་གནས་པར་བགྱིའོ། །བཅོམ་ལྡན་འདས་འདི་ལ་བདག་འདི་སྙམ
287b6 བགྱིད་དོ། །གལ་ཏེ་བྱང་ཆུབ་སེམས་དཔའ་སེམས་ཅན་གཅིག་གི་དགེ་བའི་རྩ་བ་སྐྱེ་བར་འགྱུར་ན། ལྟུང་བ་དེ་འདྲ་བ་འབྱུང་ཞིང་དེ་ལྟ་བུའི་ལྟུང་བ་བྱུང་བས་བསྐལ་པ་བརྒྱ་སྟོང་དུ་སེམས་ཅན་དམྱལ་བར་བཙོ་བར་གྱུར་ཀྱང་། བཅོམ་ལྡན་འདས་བྱང་ཆུབ་སེམས་དཔའ་ལྟུང་བ་འབྱུང
287b7 བ་དང་། སེམས་ཅན་དམྱལ་བའི་སྡུག་བསྔལ་དེ་ལ་སྤྲོ་བ་ཉིད་དུ་བགྱིའོ། །སེམས་ཅན་གཅིག་པོའི་དགེ་བའི་རྩ་བ་ཡོངས་སུ་གཏོང་བ་དང་། ཡོངས་སུ་འབྲི་བར་ནི་མི་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་མང་ལྡན་གྱི་རྒྱལ་པོ་ལ་ལེགས་སོ
iiif viewer powered by OpenSeadragon
