| e-texts navigator |
| Wylie |
239b1 པར་སངས་རྒྱས་ནས་སངས་རྒྱས་ཀྱི་ཞིང་དེ་ན་སེམས་ཅན་ཐམས་ཅད་ཀྱང་རྫུས་ཏེ་སྐྱེ་བ་དང་། མཚན་དང་གཟུགས་སངས་རྒྱས་བཅོམ་ལྡན་འདས་དང་འདྲ་བ། ཉོན་མོངས་པ་སྲབ་ཅིང་ཆུང་བ། ཐེག་པ་ཆེན་པོ་ལ་བདེ་བར་གནས་པ་ཤ་སྟག་གོ། །དེ་ནས་བཅོམ་ལྡན་འདས་ཀྱིས་དོན་དེ་དག
239b2 གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཆོས་ཀྱི་སྣོད་དུ་འགྱུར་བར་འདོད་པ་དག་།ཉོན་མོངས་ཐམས་ཅད་ཡོངས་སུ་གཅད་པར་བྱ། །ཡང་དག་སྟོང་པ་ཉིད་ལ་སྙོམས་ཞུགས་ན། །དངོས་པོ་གང་ཡང་བྱ་བར་དཀའ་བ་མིན། །སྲིད་པའི་བཅིངས་པ་ཐམས
239b3 ཅད་གཅད་པའི་ཕྱིར། །སྙོམས་པར་འཇུག་ལ་ནན་ཏན་བརྩོན་པར་བྱ། །ཏིང་འཛིན་ཡོན་ཏན་དག་དང་ལྡན་པས་ན། །གདོན་མི་ཟ་བར་དཔག་དཀའི་ཤེས་རབ་ཐོབ། །གཟུགས་མེད་པ་ཡི་བསམ་གཏན་རབ་བསྒོམ་ཞིང་། །འགོག་པའི་ཏིང་འཛིན་སྟོང་པ་ཉིད་བརྟགས་ན། །སངས་རྒྱས
239b4 དྲན་པའི་བློ་མཆོག་རབ་སྐྱེས་ཏེ། །སྡིག་པ་ཐམས་ཅད་ཡོངས་སུ་ཟད་འགྱུར་རོ། །ཡོད་དང་མེད་པའི་ཆོས་རྣམས་ཐམས་ཅད་ནི། །ཡང་དག་སྟོང་པ་ཉིད་དུ་བརྟགས་པས་བཅོམ། །ངན་པར་འགྲོ་བའི་རྒྱུད་རྣམས་ཡོངས་བསལ་ནས། །རྟག་ཏུ་སངས་རྒྱས་མང་པོ་མཐོང་བར་འགྱུར། །ཡང
239b5 དག་སྟོང་པ་ཉིད་ལ་རབ་བསྒོམས་པས། །དགེ་བའི་ཆོས་གཞན་ཀུན་ལ་བརྩོན་བྱ་སྟེ། །སངས་རྒྱས་ཐམས་ཅད་ཀུན་ལ་རབ་མཆོད་ན། །མྱུར་དུ་སངས་རྒྱས་འབྲས་བུ་ཐོབ་པར་འགྱུར། །སེམས་ཅན་ཀུན་གྱི་དགེ་བའི་གྲོགས་བྱས་ཏེ། །ཀུན་ནས་ཉོན་མོངས་པ་ཡི་ནད་བསལ་ན། །རྣམ་དག་སངས
239b6 རྒྱས་ཞིང་དུ་མྱུར་དུ་སྐྱེ། །མངོན་པར་འཚང་རྒྱ་བྱང་ཆུབ་ཆེན་པོ་འཐོབ། །སངས་རྒྱས་མཚན་དང་ལྡན་པའི་སེམས་ཅན་དག་།སངས་རྒྱས་ཞིང་དེར་ཡོངས་སུ་གང་བར་འགྱུར། །ཐམས་ཅད་སངས་རྒྱས་ཐེག་ལ་འདུན་པ་སྟེ། །ཉན་ཐོས་རང་རྒྱལ་ཐེག་པ་ཡོངས་སུ་སྤོང་། །འཕགས་པ་ཤིན་ཏུ་རྒྱས་པ་ཆེན་པོ
239b7 སའི་སྙིང་པོའི་འཁོར་ལོ་བཅུ་པ་བྱ་བ་ལས་བསོད་ནམས་ཀྱི་ཞིང་གི་མཚན་ཉིད་ཀྱི་ལེའུ་ཞེས་བྱ་སྟེ་བདུན་པའོ། ། །།བཅོམ་ལྡན་འདས་ཀྱིས་ཐེག་པ་ཆེན་པོའི་རྣམ་གྲངས་འདི་བཤད་པའི་ཚེ་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་དང
iiif viewer powered by OpenSeadragon
