| e-texts navigator |
| Wylie |
236b1 ལུང་དུ་མི་སྟོན་པ་ཐམས་ཅད་ཀྱི་རྣམ་པ་ལ་ལེན་པ་མེད་པ་དང་། སེམས་ཀྱི་སྤྱོད་པ་མེད་པར་རབ་ཏུ་ཞི་བར་གནས་སོ། །གང་ཇི་སྙེད་བྱམས་པ་ཆེན་པོ་དང་། སྙིང་རྗེ་ཆེན་པོ་དང་། ཐབས་མཁས་པས་སེམས་ཅན་ཡོངས་སུ་སྨིན་པར་བྱེད་པ་ནས་བསྲུང་བར་བྱ་བ་མེད་པ་གསུམ་དང་། མི
236b2 འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བརྒྱད་ཀྱི་བར་དུ་ཆོས་ཐམས་ཅད་ཀྱི་རྣམ་པ་ལ་ལེན་པ་མེད་པ། སེམས་ཀྱི་སྤྱོད་པ་མེད་པར་རབ་ཏུ་ཞི་བར་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དག་འཁོར་ལོ་འདིའི་དབང་གིས་ཚོར་བ་རྣམ
236b3 གསུམ་གྱི་ཉེས་པ་ཡོངས་སུ་བསལ་བ་དང་། རྣམ་པར་རྟོག་པ་ཐམས་ཅད་ཡོངས་སུ་ཞི་བ་དང་། མཚན་མའི་ཆོས་ཐམས་ཅད་ཡོངས་སུ་སྤོང་བར་འགྱུར་རོ། །གཞན་ཡང་ཇི་སྙེད་ནམ་མཁའི་མིག་དང་། སྤྱི་བོའི་ཏིང་ངེ་འཛིན་རྣམས་དང་། གཟུངས་རྣམས་ལ་ཐབས་མཁས
236b4 པའི་གོ་ཆ་ཆེན་པོའི་འཁོར་ལོ་ཡང་འདྲེན་པར་འགྱུར་ཏེ། བྱང་ཆུབ་སེམས་དཔའི་འཁོར་ལོ་དེ་ལ་གནས་པས་གང་འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང་། གཞན་ཡང་སྲིད་པ་དང་། འགྲོ་བ་རྣམས་སུ་འཁོར
236b5 བའི་ལས་ཐམས་ཅད་ལྷག་མ་མ་ལུས་པར་ཡོངས་སུ་བསལ་ཏེ། རྣམ་པར་སྨིན་པའི་འབྲས་བུ་མི་མྱོང་བར་བྱེད་དོ། །གཞན་ཡང་རིགས་ཀྱི་བུ། འདི་ལྟ་སྟེ། མུན་པ་ནག་པོས་ནམ་མཁའ་ཐམས་ཅད་ཡོག་པ་ན་ཉི་མ་ཤར་བའི་ཚེ་མུན་པ་ཐམས་ཅད་སེལ་བར་འགྱུར
236b6 རོ། །དེ་བཞིན་དུ་བྱང་ཆུབ་སེམས་དཔའ་ཡང་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེན་པོ་དང་ལྡན་པས་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན
236b7 ཏུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་ཡང་གྲུབ་ཅིང་འདྲེན་པར་འགྱུར་རོ། །གཞན་ཡང་ནམ་མཁའི་མིག་དང་། སྤྱི་བོའི་ཏིང་ངེ་འཛིན་རྣམས་དང་། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ལ་གནས་པ་དཔག་ཏུ་མེད་པ་ནམ་མཁའ་ལྟ
iiif viewer powered by OpenSeadragon
