| e-texts navigator |
| Wylie |
235a1 གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་། ཉན་ཐོས་དང་། རང་སངས་རྒྱས
235a2 ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས
235a3 སུ་བཅད་དེ་བཀའ་སྩལ་པ། ཤིན་ཏུ་ཟབ་མོ་དམ་པའི་ཆོས་དག་།སྙིང་རྗེ་ཆེན་པོའི་གཞི་རུ་དེ་འགྱུར། །ཤིན་ཏུ་དཔག་དཀའ་ནམ་མཁའ་འདྲ་སྟེ། །གནས་པ་མེད་དེ་གཟུགས་ཀྱང་མེད་དོ། །བྱང་ཆུབ་སེམས་དཔའི་བརྩོན་འགྲུས་ཆེན་པོ། །ཡོན་ཏན་ཆེན་པོ་དང་ནི
235a4 ལྡན་ཏེ། །རྒྱལ་བའི་ཡེ་ཤེས་སྙིང་རྗེ་ཆེན་པོས། །དཔའ་བོ་འཇིག་རྟེན་འདའ་བར་དེས་འགྱུར། །མགོན་དང་སྐྱབས་མེད་སེམས་ཅན་དག་ནི། །འཁོར་བའི་སྡུག་བསྔལ་རྙོག་པས་བཅིངས་པ། །སྙིང་རྗེ་ཆེན་པོའི་ཆུ་ཡིས་བཀྲུས་ཏེ། །སེམས་ཅན་རྣམ་པར་གྲོལ་བར་བྱེད་དོ། །བྱང
235a5 ཆུབ་སེམས་དཔའི་སྙིང་རྗེ་བསྐྱེད་པས། །འཁོར་བའི་རྒྱ་མཚོ་སྐེམས་པར་བྱེད་དེ། །ཉན་ཐོས་ཐེག་པའི་འཁོར་རྣམས་དང་ནི། །རང་རྒྱལ་ཐེག་པ་སྤྱོད་པས་མ་ཡིན། །འདོད་ཆགས་ཞེ་སྡང་གཏི་མུག་སེམས་ཅན། །ངན་སོང་དག་ཏུ་ལྟུང་བར་འགྱུར་བ། །སྙིང་རྗེ་ཆེན་པོའི་ཆུ་ཡིས
235a6 བཀྲུས་ཏེ། །སྡུག་བསྔལ་ཀུན་ལས་གྲོལ་བར་བྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་སོ་སོ་ཡང་དག་པར་རིག་པ། ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཤིན་ཏུ་རྒྱ་ཆེན་པོ་དང་ལྡན་པ་ཇི་སྙེད
235a7 སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན་ཏུ་བརྟན་པའི་བཟོད་པ་ཆེན་པོའི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་པ་ལྔ་ཡོངས
iiif viewer powered by OpenSeadragon
